US-Israel Iran War: उरणचे दाम्पत्य अॅनिव्हर्सरीसाठी दुबईत गेले, युद्धामुळे विमानसेवा बंद; शेकडो भारतीय अडकले
US-Israel Iran War: उरणचे दाम्पत्य अॅनिव्हर्सरीसाठी दुबईत गेले, युद्धामुळे विमानसेवा बंद; शेकडो भारतीय अडकले
अमेरिका-इस्रायल आणि इराण संघर्षाच्या पार्श्वभूमीवर दुबई विमानतळावरील उड्डाणे बंद झाली आहेत. उरणमधील दाम्पत्य अॅनिव्हर्सरीसाठी गेले असताना दुबईत अडकले असून अनेक भारतीय नागरिक अडचणीत आहेत.
पुणे ०२ मार्च २०२६ : अमेरिका, इस्रायल आणि इराण यांच्यात निर्माण झालेल्या युद्धजन्य परिस्थितीचा फटका आता भारतीय नागरिकांनाही बसत आहे. मध्यपूर्वेत वाढलेल्या तणावामुळे दुबईसह अनेक आखाती देशांतील विमानसेवा विस्कळीत झाली आहे. परिणामी परदेशात गेलेले अनेक भारतीय नागरिक तिथेच अडकले आहेत. उरण तालुक्यातील जसखार गावचे कवीश विजय घरत आणि त्यांची पत्नी प्रांजली घरत हे आपल्या लग्नाच्या दुसऱ्या वाढदिवसानिमित्त दुबईला गेले होते. मात्र अचानक उड्डाणे बंद झाल्यामुळे हे दाम्पत्य सध्या दुबईत अडकून पडले आहे.
मिळालेल्या माहितीनुसार, अमेरिका आणि इस्रायलने इराणवर केलेल्या हल्ल्यांनंतर परिस्थिती अधिक चिघळली. सुरक्षेच्या कारणास्तव अनेक विमानतळ तात्पुरते बंद करण्यात आले. दुबईतील उड्डाणसेवाही ठप्प झाल्याने भारतात परतणाऱ्या प्रवाशांना अडचणींचा सामना करावा लागत आहे. कवीश आणि प्रांजली हे मंगळवारी भारतात परतणार होते. त्यांचे परतीचे तिकीट निश्चित होते; मात्र अचानक उड्डाणे रद्द झाल्याने त्यांना दुबईतच थांबावे लागले आहे. सध्या ते बर दुबई येथील ओमेगा हॉटेलमध्ये सुरक्षित असल्याची माहिती त्यांनी कुटुंबीयांना दिली आहे.
या घटनेमुळे त्यांच्या कुटुंबीयांमध्ये चिंतेचे वातावरण आहे. प्रांजलीचे वडील प्रभाकर घरत यांनी माध्यमांशी बोलताना आपल्या मुलगी आणि जावयाच्या सुरक्षिततेबाबत काळजी व्यक्त केली आहे. दोन वर्षांपूर्वी विवाहबद्ध झालेल्या या दाम्पत्याने खास वाढदिवस साजरा करण्यासाठी दुबईची निवड केली होती. मात्र आनंदाचा क्षण काही तासांतच चिंतेत बदलला.
फक्त उरणचेच नव्हे तर मुंबई, ठाणे आणि शहापूर तालुक्यातील अनेक नागरिक आखाती देशांमध्ये अडकले असल्याची माहिती समोर येत आहे. शहापूर तालुक्यातील तब्बल २३ नागरिक परदेशात अडकले असून त्यांचे २८ फेब्रुवारी रोजी नियोजित असलेले उड्डाण रद्द करण्यात आले. उड्डाणे रद्द झाल्यानंतर हॉटेलचे वाढते बिल, अन्न आणि इतर खर्च यामुळे पर्यटकांना आर्थिक अडचणींचा सामना करावा लागत आहे.
या यादीमध्ये केशव वैखंडे, कविता वेखंडे, शिवराम वाळिंबे, शुभांगी वाळिंबे, एकनाथ धनके, गुलाब धनके, मधुकर पाटील, मीनाक्षी पाटील, बाळू गायकर, दशरथ हरड, शारदा हरड, किसन मोहपे, मीरा मोहपे, सपना शेलार, करुणा कापरे, अनिता धनके, परशुराम गायकवाड, शुभांगी गायकवाड, रमेश चलपे, लता चलपे, वनिता गायकर, वासुदेव शेलार आणि टूर मॅनेजर मनीष सानप यांचा समावेश आहे. स्थानिक प्रशासनाने या सर्व कुटुंबीयांशी संपर्क साधण्यास सुरुवात केली आहे.
शहापूरचे तहसीलदार परमेश्वर कासुळे यांनी तलाठ्यांना संबंधित कुटुंबीयांची माहिती गोळा करण्याच्या सूचना दिल्या आहेत. परिस्थितीवर प्रशासन लक्ष ठेवून असून केंद्र सरकारकडून मार्गदर्शक सूचना येण्याची प्रतीक्षा आहे. दरम्यान, अडकलेल्या नागरिकांनी शांत राहून अधिकृत माहितीवरच विश्वास ठेवावा, असे आवाहन करण्यात येत आहे.
मध्यपूर्वेतील तणाव कमी होईपर्यंत विमानसेवा सुरळीत होण्याची शक्यता कमी असल्याचे संकेत आहेत. त्यामुळे परदेशात अडकलेल्या नागरिकांची चिंता वाढली आहे. सुरक्षिततेला प्राधान्य देत संबंधित देशांचे प्रशासन परिस्थिती हाताळत असल्याचे सांगितले जात आहे.
Follow us on our social media handles:
Instagram – https://www.instagram.com/newsdotz/
YouTube – https://www.youtube.com/@NewsDotz
Facebook – https://www.facebook.com/NewsDotz/
Twitter – https://x.com/NewsDotz
Also Read: Pune’s Latest Information
