Vijay Hazare Trophy 2025: रोहित शर्माचा वादळी कहर! सिक्कीमविरुद्ध 61 चेंडूत शतक, मुंबईचा दणदणीत विजय
रोहित शर्माचा वादळी कहर! सिक्कीमविरुद्ध 61 चेंडूत शतक, मुंबईचा दणदणीत विजय
विजय हजारे ट्रॉफी 2025 च्या पहिल्याच सामन्यात रोहित शर्माने सिक्कीमविरुद्ध 61 चेंडूत शतक आणि 155 धावांची खेळी करत मुंबईला 8 विकेटने शानदार विजय मिळवून दिला.
पुणे २४ डिसेंबर २०२५ : विजय हजारे ट्रॉफी 2025 च्या पहिल्याच सामन्यात मुंबईच्या राजाने आपला स्फोटक अंदाज दाखवत क्रिकेटप्रेमींना थक्क केले. भारताचा स्टार फलंदाज रोहित शर्मा मुंबईकडून खेळताना सिक्कीमविरुद्ध अक्षरशः तुफान फटकेबाजी करताना दिसला. जयपूरमध्ये खेळल्या गेलेल्या या सामन्यात रोहितने अवघ्या 61 चेंडूत शतक झळकावत आपली क्लास आणि अनुभव पुन्हा एकदा सिद्ध केला.
नाणेफेक जिंकून सिक्कीमने प्रथम फलंदाजी करण्याचा निर्णय घेतला. सुरुवातीला संघाची कामगिरी समाधानकारक होती, मात्र मुंबईच्या गोलंदाजांनी मधल्या षटकांत नियंत्रण मिळवले. सात्विक आणि आशिष थापा यांनी दुसऱ्या विकेटसाठी अर्धशतकी भागीदारी करत डाव सावरला. आशिष थापाने 87 चेंडूत 79 धावांची झुंजार खेळी केली. त्याला शार्दुल ठाकूरने माघारी पाठवले. अखेरीस सिक्कीमने 50 षटकांत 236 धावा उभारल्या. मुंबईकडून कर्णधार शार्दुल ठाकूरने किफायतशीर गोलंदाजी करत दोन विकेट्स घेतल्या, तर तुषार देशपांडे, तनुष कोटियन, शम्स मुलानी आणि मुशीर खान यांनी प्रत्येकी एक बळी घेतला.
237 धावांच्या आव्हानाचा पाठलाग करताना सर्वांच्या नजरा रोहित शर्मावर खिळल्या होत्या आणि त्याने अपेक्षांवर पूर्णपणे खरे उतरत जबरदस्त सुरुवात केली. अंगकृष रघुवंशीसोबत रोहितने पहिल्या विकेटसाठी 141 धावांची मोठी भागीदारी रचली. रघुवंशी 38 धावांवर बाद झाला, पण तोपर्यंत मुंबईने सामन्यावर पकड मिळवली होती.
रोहित शर्माने मैदानाच्या चारही बाजूंना फटके मारत सिक्कीमच्या गोलंदाजांवर अक्षरशः दबाव आणला. त्याने केवळ 61 चेंडूत शतक पूर्ण केले आणि प्रेक्षकांचा जल्लोष अनुभवला. या डावात रोहितने षटकार आणि चौकारांचा पाऊस पाडत सामना एकतर्फी केला. अखेर तो 94 चेंडूत 155 धावा करून बाद झाला. या खेळीत त्याने तब्बल 9 षटकार आणि 18 चौकार ठोकले, ज्यामुळे त्याचा स्ट्राईक रेट 164 पेक्षा अधिक राहिला.
रोहित बाद झाला तेव्हा मुंबई विजयाच्या उंबरठ्यावर होती. त्यानंतर मुशीर खान आणि सरफराज खान यांनी उर्वरित औपचारिकता पूर्ण केली. मुंबईने केवळ 30.3 षटकांत 237 धावांचे लक्ष्य गाठत 8 विकेटने दणदणीत विजय मिळवला.
या सामन्यात रोहित शर्माची खेळी केवळ आकडेवारीपुरती मर्यादित नव्हती, तर त्याने देशांतर्गत क्रिकेटमध्येही आपली भूख आणि फिटनेस कायम असल्याचे दाखवून दिले. जयपूरच्या सवाई मानसिंग स्टेडियमवर रोहितला पाहण्यासाठी मोठी गर्दी झाली होती आणि चाहत्यांनी त्याच्या प्रत्येक फटक्याला टाळ्यांचा कडकडाट केला.
मुंबईचा पुढील सामना 26 डिसेंबर रोजी उत्तराखंडविरुद्ध होणार असून रोहित शर्माचा फॉर्म पाहता मुंबईचा आत्मविश्वास नक्कीच वाढलेला असेल. विजय हजारे ट्रॉफी 2025 मध्ये मुंबईचा हा दमदार विजय आणि रोहित शर्माचे वादळी शतक स्पर्धेसाठी मोठा संदेश देणारे ठरले आहे.
Follow us on our social media handles:
Instagram – https://www.instagram.com/newsdotz/
YouTube – https://www.youtube.com/@NewsDotz
Facebook – https://www.facebook.com/NewsDotz/
Twitter – https://x.com/NewsDotz
Also Read: Pune’s Latest Information
