Zomato Healthy Mode: ग्राहकांच्या आरोग्यासाठी झोमॅटोने सुरू केला ‘हेल्दी मोड’, Deepinder Goyal ने व्यक्त केली खंत
ग्राहकांच्या आरोग्यासाठी झोमॅटोने सुरू केला 'हेल्दी मोड', Deepinder Goyal ने व्यक्त केली खंत
झोमॅटो संस्थापक Deepinder Goyal यांनी हेल्दी मोड सुरू केल्याची घोषणा केली; नवीन सुविधा AI आधारित हेल्दी स्कोअरसह पदार्थांची पौष्टिकता दर्शवेल, ग्राहकांना आरोग्यदायी निवडीसाठी मदत होईल.
सायली मेमाणे
पुणे २९ सप्टेंबर २०२५ :ऑनलाइन फूड डिलिव्हरी क्षेत्रात क्रांती घडवणाऱ्या झोमॅटोने ग्राहकांच्या आरोग्याचा विचार करत एक नवीन सुविधा सुरू केली आहे, ज्याला ‘हेल्दी मोड’ (Healthy Mode) म्हणतात. कंपनीचे संस्थापक दीपेंद्र गोएल (Deepinder Goyal) यांनी आपल्या X अकाउंटवर पोस्ट शेअर करून या नव्या सुविधेची घोषणा केली. त्यांनी कबुल केले की, गेल्या अनेक वर्षांपासून त्यांना एक गोष्ट नेहमीच सलत होती; बाहेरून खाणे मागवणे सोपे झाले तरी ग्राहकांना खऱ्या अर्थाने पौष्टिक अन्न मिळण्याची सुविधा पुरवता आली नाही.
गोएल यांच्या म्हणण्यानुसार, झोमॅटोवर सॅलड किंवा स्मूदीसारखे हेल्दी पर्याय उपलब्ध असले तरी, खऱ्या पौष्टिकतेच्या दृष्टीने पदार्थ शोधणे सोपे नव्हते. त्यामुळे ‘जास्तीत जास्त लोकांसाठी उत्तम अन्न’ या मिशनमध्ये ‘उत्तम’ या शब्दाचा योग्य अर्थ लागू पडत नव्हता, आणि याबाबत त्यांना खंत होती. ग्राहकांच्या आरोग्यासाठी हा फक्त साधा पर्याय नाही तर तो डेटा आणि तंत्रज्ञानावर आधारित आहे, असे गोएल यांनी सांगितले.
हेल्दी मोडमध्ये प्रत्येक पदार्थाला ‘हेल्दी स्कोअर’ दिला जाईल. हा स्कोअर लो पासून सुपर पर्यंत श्रेणीत असेल. स्कोअर केवळ कॅलरीवर आधारित न राहता पदार्थातील प्रथिने, कॉम्प्लेक्स कार्बोहायड्रेट्स, फायबर आणि मायक्रोन्यूट्रिएंट्स यांसारख्या घटकांच्या आधारे ठरवला जाईल. त्यामुळे ग्राहकांना पदार्थ हेल्दी का आहे हे समजणे सोपे होईल. ही सुविधा AI आणि रेस्टॉरंट्सकडून मिळालेल्या डेटाच्या आधारे कार्यान्वित केली जाईल.
गोएल यांनी या सुविधेची विश्वासार्हता देखील सांगितली आहे. त्यांचे म्हणणे आहे की, ही सुविधा वापरण्यास सोपी असून सर्वसामान्य ग्राहक तसेच खेळाडूही या सुविधेवर डोळे बंद करून विश्वास ठेवू शकतील. सध्या ही सुविधा गुरूग्राममध्ये सुरू झाली आहे, परंतु लवकरच तिचा विस्तार संपूर्ण देशभर करण्याचा मानस आहे.
वापरकर्त्यांना या नव्या फीचरचा अनुभव घेऊन त्यात आढळलेल्या त्रुटींबाबत मोकळेपणाने सांगण्याचे आवाहनही गोएल यांनी केले आहे. त्यामुळे ग्राहकांना फक्त अन्न मागवण्यासाठी नव्हे तर आरोग्यदृष्ट्या योग्य आणि पौष्टिक निवडी करण्यासाठीही झोमॅटोचा हेल्दी मोड मदत करेल.
या सुविधेमुळे झोमॅटो ग्राहकांसाठी एक नवीन अनुभव निर्माण करणार आहे, ज्यामध्ये पौष्टिकतेसह सोपी आणि विश्वासार्ह अन्न निवड उपलब्ध होईल. हेल्दी मोडचा उद्देश केवळ आहार सुधारण्यापुरता मर्यादित नाही, तर लोकांना त्यांच्या आरोग्याची काळजी घेण्यासाठी डिजिटल माध्यमातून सोपी मदत उपलब्ध करून देणे हा आहे. दीपेंद्र गोएल यांनी म्हटले की, ही सुविधा भविष्यात सर्व झोमॅटो वापरकर्त्यांसाठी उपलब्ध करून दिली जाईल, आणि ग्राहकांना उत्तम अनुभव मिळावा यासाठी सतत सुधारणा केली जाईल.
