आंबेगावमध्ये गॅस टंचाईचा लग्नसराईवर परिणाम जेवणावळी अडकल्या, बजेट कोलमडले

आंबेगाव तालुक्यात गॅस टंचाईमुळे लग्न सोहळ्यांतील जेवणावळी अडचणीत. आचारी पदार्थ कमी करत आहेत, तर गॅसच्या काळाबाजाराची चर्चा. एप्रिल-मे मुहूर्तांमध्ये कुटुंबांचे बजेट विस्कळीत.

पुणे 08 एप्रिल २०२६ : आंबेगाव तालुक्यात गॅस टंचाईचे संकट आता थेट लग्नसराईवर येऊन ठेपले आहे. लग्न समारंभ म्हणजे मोठी जेवणावळ, शेकडो पाहुणे आणि मोठ्या प्रमाणात स्वयंपाक—यासाठी गॅस हा अत्यावश्यक घटक. मात्र सध्या गॅसचा नियमित पुरवठा खंडित झाल्याने अनेक मंगल कार्यालये, आचारी आणि कुटुंबीय अडचणीत सापडले आहेत. नियोजित वेळेत जेवणावळी पार पाडणे कठीण होत असून काही ठिकाणी तर “गॅस तुमचा, स्वयंपाक आमचा” अशी अट घालून कामे स्वीकारली जात असल्याचे चित्र आहे.

जागतिक स्तरावर सुरू असलेल्या तणावपूर्ण परिस्थितीमुळे इंधन आणि गॅस पुरवठ्यावर परिणाम झाल्याचे व्यावसायिकांचे म्हणणे आहे. परिणामी उपहारगृहे, खानावळी आणि केटरिंग व्यवसायासोबतच लग्न समारंभांवरही या टंचाईचा फटका बसू लागला आहे. एप्रिल आणि मे हे लग्नासाठी अत्यंत महत्त्वाचे महिने मानले जातात. या कालावधीत सर्वाधिक मुहूर्त असल्याने दोन ते तीन महिने आधीच हॉल बुकिंग, केटरिंग आणि इतर तयारी पूर्ण झालेली असते. तालुक्यात 100 ते 200 लोकांच्या क्षमतेपासून ते 1000 ते 2000 लोकांच्या मोठ्या हॉलपर्यंत सर्वत्र नोंदणी झालेली आहे. मात्र गॅस अभावी या सर्व नियोजनावर पाणी फिरण्याची वेळ आली आहे.

आचारी गॅसची बचत करण्यासाठी मेनूमधील पदार्थांची संख्या कमी करत आहेत. काही ठिकाणी तळणाचे पदार्थ कमी करून उकडलेले किंवा कमी गॅस लागणारे पदार्थ ठेवले जात आहेत. त्यामुळे पाहुणचाराच्या पद्धतीत बदल दिसू लागला आहे. लग्न सोहळा हा कुटुंबासाठी प्रतिष्ठेचा विषय असल्याने अशा बदलांमुळे मानसिक ताणही वाढत आहे. याचदरम्यान बाजारात गॅसचा काळाबाजार होत असल्याची चर्चा रंगू लागली आहे. नागरिकांच्या म्हणण्यानुसार, गॅस सिलिंडरचे दर दुप्पट-तिप्पट आकारले जात आहेत. वेळेवर गॅस न मिळाल्याने काहींना जादा दराने सिलिंडर घ्यावे लागत आहेत, जे सर्वसामान्यांच्या आवाक्याबाहेरचे ठरत आहे.

या परिस्थितीमुळे लग्न सोहळ्याचे संपूर्ण आर्थिक गणितच बिघडले आहे. आधीच हॉल, केटरिंग, सजावट, वधू-वरांचे साहित्य, पाहुण्यांची व्यवस्था अशा खर्चांनी बजेट ताणलेले असताना गॅससाठी अतिरिक्त खर्च करावा लागल्याने अनेक कुटुंबे अडचणीत आली आहेत. काही ठिकाणी जेवणावळीची वेळ पुढे ढकलावी लागल्याच्या घटनाही समोर आल्या आहेत. पाहुण्यांना थांबवणे, वेळ सांभाळणे आणि व्यवस्थापन करणे हे आयोजकांसाठी मोठे आव्हान ठरत आहे.

जाधववाडी (ता. आंबेगाव) येथील उपसरपंच संपतराव जाधव यांनी प्रशासनाने या प्रश्नाकडे गांभीर्याने लक्ष द्यावे, अशी मागणी केली आहे. लग्नसराईच्या हंगामात तरी गॅसचा पुरवठा सुरळीत व्हावा आणि काळाबाजार रोखण्यासाठी कठोर पावले उचलावीत, अशी अपेक्षा नागरिकांकडून व्यक्त होत आहे. नियमित पुरवठा न झाल्यास पुढील काही आठवड्यांत ही समस्या अधिक तीव्र होण्याची शक्यता आहे.

लग्न सोहळा हा आनंदाचा आणि आयुष्यातील महत्त्वाचा क्षण असतो. मात्र गॅस टंचाईमुळे या आनंदावर विरजण पडताना दिसत आहे. नियोजन करूनही अडचणी येत असल्याने कुटुंबीयांची चिंता वाढली आहे. प्रशासनाने तातडीने हस्तक्षेप करून गॅस पुरवठा सुरळीत केल्यास आणि काळाबाजारावर आळा घातल्यासच या संकटातून मार्ग निघू शकतो, अशी सर्वसामान्यांची अपेक्षा आहे.