काँग्रेसमध्ये इनकमिंगची सुरुवात: बाबाजानी दुर्राणी काँग्रेसमध्ये, शरद पवार गटाला धक्का
काँग्रेसमध्ये इनकमिंगची सुरुवात: बाबाजानी दुर्राणींचा प्रवेश निश्चित, शरद पवार गटाला मोठा धक्का
माजी आमदार बाबाजानी दुर्राणी काँग्रेसमध्ये प्रवेश करणार असल्याची चर्चा जोरात, 7 ऑगस्टला अधिकृत प्रवेशाची शक्यता. शरद पवार गटासाठी मोठा राजकीय झटका.
सायली मेमाणे
पुणे ५ ऑगस्ट २०२५ : महाराष्ट्रातील राजकारणात पुन्हा एकदा मोठा राजकीय भूकंप होण्याची चिन्हं आहेत. गेल्या काही महिन्यांपासून चर्चेत असलेले माजी आमदार बाबाजानी दुर्राणी आता काँग्रेसमध्ये प्रवेश करणार असल्याची माहिती समोर आली आहे. विशेष म्हणजे, दुर्राणी हे शरद पवार यांच्या गटाचे परभणी जिल्हाध्यक्ष होते आणि त्यांचा काँग्रेस प्रवेश हा शरद पवार गटासाठी मोठा धक्का मानला जात आहे.
7 ऑगस्ट रोजी मुंबईत दुर्राणी यांचा काँग्रेस प्रवेश होण्याची शक्यता असून, त्यांच्या समर्थकांनी सोशल मीडियावर बॅनर्स व्हायरल करतच ही बातमी अधोरेखित केली आहे. मागील काही दिवसांत दुर्राणी आणि काँग्रेस नेत्यांमध्ये झालेल्या भेटींमुळेच या चर्चेला बळ मिळालं होतं.
मागील काही काळात काँग्रेसमधून अनेक नेते भाजपकडे वळत असताना, आता उलट्या हालचाली सुरू झाल्याचं चित्र आहे. लोकसभा निवडणुकीतील यशानंतर काँग्रेसकडून ‘इनकमिंग’च्या तयारीला गती दिली जात आहे. मराठवाडा आणि विदर्भासारख्या भागांत काँग्रेस पुन्हा बळकट होण्याच्या दिशेने पावलं टाकत आहे.
याआधी दुर्राणी यांचा उपमुख्यमंत्री अजित पवार यांच्याकडे प्रवेश होण्याची शक्यता होती, मात्र तो निर्णय रखडला आणि आता काँग्रेसमध्ये प्रवेश निश्चित झाल्याचं स्पष्ट होत आहे. परभणीसारख्या जिल्ह्यात हे काँग्रेससाठी महत्त्वाचं पाऊल मानलं जात आहे.
राजकीय निरीक्षकांच्या मते, आगामी विधानसभा निवडणुकीच्या पार्श्वभूमीवर काँग्रेसकडून अशी जोरदार इनकमिंग सुरू राहणार असून, भाजप आणि शरद पवार गटावर दबाव निर्माण होण्याची शक्यता आहे.
