नेपाळमधून वैष्णवी हगवणे प्रकरणातील निलेश चव्हाणला अखेर अटक

वैष्णवी हगवणे आत्महत्या प्रकरणात फरार असलेला निलेश चव्हाण अखेर नेपाळमध्ये सापडला; पिंपरी-चिंचवड पोलिसांनी घेतली कारवाई.
सायली मेमाणे,
पुणे ३० मे २०२५ :

पुणे ३० मे २०२५ : वैष्णवी हगवणे आत्महत्या प्रकरणात गेल्या अनेक दिवसांपासून फरार असलेला निलेश चव्हाण अखेर पोलिसांच्या जाळ्यात सापडला आहे. नेपाळमध्ये लपून बसलेल्या निलेशला पिंपरी-चिंचवड पोलिसांनी अटक केली असून लवकरच त्याला महाराष्ट्रात आणण्यात येणार आहे.

वैष्णवी हगवणे आत्महत्येच्या पार्श्वभूमीवर उभं राहिलेलं हे प्रकरण सामाजिक आणि कायदेशीरदृष्ट्या अत्यंत संवेदनशील ठरलं आहे. निलेश चव्हाणवर वैष्णवीच्या कुटुंबातील सदस्यांना धमकी देणे, मानसिक त्रास देणे, तसेच तिच्या आत्महत्येला अप्रत्यक्ष कारणीभूत ठरण्याचे गंभीर आरोप आहेत. त्यामुळेच तो फरार झाल्यानंतर पोलिसांसमोर मोठं आव्हान उभं राहिलं होतं.

पिंपरी-चिंचवड पोलिसांनी या प्रकरणात सातत्याने तपास सुरू ठेवला होता. विशेष म्हणजे, सहा स्वतंत्र पथकं निलेशचा शोध घेत होती. प्रारंभी त्याच्या भारतातील विविध राज्यांमध्ये असल्याचा संशय व्यक्त केला जात होता. मात्र, पुढील तपासात तो सीमापार नेपाळमध्ये असल्याची खात्री मिळाल्यानंतर पोलिसांनी कार्यवाही सुरू केली.

नेपाळमधील स्थानिक यंत्रणांच्या समन्वयाने ही अटक पार पडली. अटकेनंतर निलेश चव्हाणला भारतात आणण्यासाठी लागणारी प्रक्रिया सुरू झाली आहे. त्याला लवकरच पिंपरी-चिंचवड न्यायालयात हजर केलं जाणार आहे.

वैष्णवी हगवणे प्रकरणामुळे राज्यभरात संतापाची लाट उसळली होती. अनेक सामाजिक संघटना, महिला कार्यकर्त्यांनी न्यायाची मागणी करत जोरदार आंदोलन केलं होतं. निलेश चव्हाणवर यापूर्वीही अनेक गंभीर आरोप नोंदवले गेले होते.

या अटकेमुळे प्रकरणाला नवीन वळण मिळणार असून, तपास अधिक सखोल पातळीवर नेण्यात येईल, अशी माहिती पोलिसांकडून देण्यात आली आहे. पोलिसांच्या मते, निलेशच्या अटकेनंतर आणखी काही महत्त्वाचे तपशील समोर येण्याची शक्यता आहे.