फडणवीस-राऊतांमध्ये नेमकी काय चर्चा झाली ? 'त्या' भेटीमुळे राजकीय समीकरणे बदलणार

मुंबई३ डिसेंबर २०२५ : सध्या राज्यातील नगरपालिका आणि नगरपरिषदा निवडणुकांचा प्रचार शिगेला पोहोचला असतानाच, एका अनपेक्षित भेटीमुळे महाराष्ट्राच्या राजकारणात मोठी खळबळ उडाली आहे. राज्याचे मुख्यमंत्री देवेंद्र फडणवीस आणि शिवसेना (उद्धव बाळासाहेब ठाकरे गट) खासदार संजय राऊत यांची काल (मंगळवारी) रात्री उशिरा मुंबईतील एका खासगी कार्यक्रमात २० मिनिटे चर्चा झाली.
राजकीयदृष्ट्या महत्त्वपूर्ण मानल्या जाणाऱ्या या दोन नेत्यांच्या भेटीने अनेकांच्या भुवया उंचावल्या असून, तर्कवितर्कांना उधाण आले आहे.
२० मिनिटांची चर्चा, मास्कमध्ये राऊत
मिळालेल्या माहितीनुसार, मंगळवारी रात्री उशिरा मुंबईत एका खासगी सोहळ्याचे आयोजन करण्यात आले होते. या कार्यक्रमाला मुख्यमंत्री देवेंद्र फडणवीस आणि खासदार संजय राऊत यांनी उपस्थिती लावली. याच दरम्यान या दोन्ही नेत्यांनी एकमेकांशी संवाद साधला. सूत्रांच्या माहितीनुसार, फडणवीस आणि राऊत यांच्यात सुमारे २० मिनिटे चर्चा झाली.
या भेटीचा एक फोटोही सध्या राजकीय वर्तुळात व्हायरल होत आहे. या छायाचित्रात संजय राऊत तोंडाला मास्क लावून बसलेले असून, मुख्यमंत्री त्यांच्याशी हितगूज करताना दिसत आहेत.
प्रकृतीची विचारपूस की राजकीय चर्चा?
या भेटीमागचे अधिकृत कारण वैयक्तिक असल्याचे सांगितले जात आहे. सूत्रांनी दिलेल्या माहितीनुसार, मुख्यमंत्री देवेंद्र फडणवीस यांनी यावेळी खासदार संजय राऊत यांच्या प्रकृतीची विचारपूस करत त्यांच्या उपचारांबद्दल माहिती घेतली.
मात्र, एका बाजूला राज्यात नगरपालिका निवडणुकांची रणधुमाळी सुरु आहे, तर दुसऱ्या बाजूला सत्तासंघर्ष आणि टीका-टिप्पणीचे राजकारण तापले आहे. अशा परिस्थितीत, कट्टर राजकीय विरोधक मानल्या जाणाऱ्या या दोन बड्या नेत्यांमध्ये झालेली खासगी चर्चा केवळ सदिच्छा भेट होती की यामागे काही मोठे राजकीय संकेत आहेत, याबद्दल राज्यात सध्या जोरदार चर्चा सुरु आहे.