मीरा रोड ‘केम छो’ ऑर्केस्ट्रा बारवर पोलिसांचा छापा; गुप्त खोल्या, अलार्म सिस्टीम आणि बार मुलींचं लपण्याचं जाळं उघड
मीरा रोड ‘केम छो’ ऑर्केस्ट्रा बारवर पोलिसांचा छापा; गुप्त खोल्या, अलार्म सिस्टीम आणि बार मुलींचं लपण्याचं जाळं उघड
मीरा रोडवरील ‘केम छो’ ऑर्केस्ट्रा बारवर पोलिसांच्या छाप्यात गुप्त खोल्या, अलार्म सिस्टीम आणि बार मुलींचं लपण्याचं जाळं उघडकीस. या कारवाईत पोलिसांनी ११ मुलींची सुटका केली.
सायली मेमाणे
पुणे ८ ऑगस्ट २०२५ : मुंबईतील मीरा रोड पुन्हा एकदा चर्चेत आले असून, यावेळी कारण आहे ‘केम छो’ ऑर्केस्ट्रा बारवरील पोलिसांची कारवाई. मुंबई-अहमदाबाद महामार्गावर असलेला हा बार बाहेरून साधा ऑर्केस्ट्रा बार असल्याचे भासत असला, तरी पोलिसांच्या छाप्यात त्यामागचे गुप्त आणि धक्कादायक वास्तव उघड झाले आहे. या छाप्यात पोलिसांनी बारमधील गुप्त खोल्या, अलार्म सिस्टीम आणि मुलींचं लपण्याचं अत्यंत नियोजित जाळं उघड केलं.
पोलिसांच्या मते, बारमध्ये अशा प्रकारे व्यवस्था करण्यात आली होती की, कारवाईपूर्वीच तेथील कर्मचाऱ्यांना माहिती मिळावी. छाप्यावेळी समोर आले की, पोलिस बारच्या दिशेने येताच एक अलार्म वाजायचा. यानंतर ताबडतोब बारमधील वातावरण बदलून ते सुसंस्कृत दिसावे अशी यंत्रणा लावण्यात आली होती. यासाठी लाल दिवा लावण्याची पद्धत वापरली जात होती. लाल दिवा लागताच बारमधील मुली ताबडतोब मागील मेकअप रूममध्ये जायच्या आणि तेथून गुप्त मार्गाने वेगळ्या खोल्यांमध्ये लपून बसायच्या.
तपासात पोलिसांना आणखी एक धक्कादायक गोष्ट समजली. बारमधील मुली प्रत्यक्षात गाणी गात नव्हत्या, तर रेकॉर्ड केलेल्या संगीतावर लिप-सिंक करत होत्या. त्यामागील उद्देश म्हणजे ग्राहकांना ‘लाईव्ह परफॉर्मन्स’ची भासवणूक देणे आणि त्यांना जास्त वेळ बारमध्ये रोखून ठेवणे. या गुप्त मार्गांपैकी एका मार्गातून पोलिसांनी आत प्रवेश केला असता, ११ बार मुली लपलेल्या अवस्थेत सापडल्या.
स्थानिक पोलिसांनी दिलेल्या माहितीनुसार, या संपूर्ण कारवाईत एक संघटित जाळं असल्याचे स्पष्ट झाले आहे. गुप्त खोल्या, अलार्म सिस्टीम आणि ‘कव्हर अप’ तंत्रज्ञान यामुळे हा प्रकार उघड करणं कठीण होतं. परंतु, पोलिसांनी गुप्त माहितीच्या आधारे नियोजित पद्धतीने कारवाई करत ही संपूर्ण व्यवस्था उध्वस्त केली. यानंतर बार व्यवस्थापक, काही कर्मचारी आणि संबंधितांना अटक करण्यात आली आहे.
या प्रकरणामुळे पुन्हा एकदा मुंबई उपनगरातील ऑर्केस्ट्रा बारवरील नियंत्रणाविषयी प्रश्नचिन्ह उभे राहिले आहे. पोलिसांनी या प्रकारातील सर्व संबंधितांचा तपास सुरू केला असून, यामागे आणखी मोठं जाळं कार्यरत असल्याची शक्यता वर्तवली आहे. दरम्यान, स्थानिक प्रशासनाने इतर संशयित बारवरही लक्ष ठेवण्याचे आदेश दिले आहेत.
या छाप्यानंतर परिसरात खळबळ उडाली असून, स्थानिक नागरिकांनी अशा प्रकारच्या बेकायदेशीर क्रियाकलापांवर कडक कारवाई करण्याची मागणी केली आहे. ‘केम छो’ ऑर्केस्ट्रा बारवरील हा छापा केवळ एका ठिकाणी मर्यादित नसून, यामुळे अशा प्रकारचे अनेक गुप्त अड्डे उघड होण्याची शक्यता आहे. पोलिस आता या प्रकरणातील संपूर्ण नेटवर्क उघड करण्याच्या तयारीत आहेत.
