छत्रपती संभाजीनगरात गोवंश तस्करांविरोधात पोलिसांची धडक कारवाई १० दिवसांत ४४ आरोपी अटकेत
छत्रपती संभाजीनगरात गोवंश तस्करांविरोधात पोलिसांची धडक कारवाई १० दिवसांत ४४ आरोपी अटकेत
छत्रपती संभाजीनगर ग्रामीण पोलिसांनी गोवंश तस्करांविरोधात मोठी कारवाई करत २४ गुन्हे दाखल केले. १११ जनावरांची सुटका, ५५ लाखांचा मुद्देमाल जप्त तर अनेक वाहनांचे परवाने निलंबित.
पुणे २८ मे २०२६ : छत्रपती संभाजीनगर ग्रामीण पोलिसांनी गोवंश तस्करी, बेकायदेशीर कत्तलखाने आणि गोमांस विक्री करणाऱ्या टोळ्यांविरोधात आतापर्यंतची सर्वात मोठी आणि धडक कारवाई केली आहे. पोलीस अधीक्षक प्रकाश जाधव यांच्या नेतृत्वाखाली राबवण्यात आलेल्या विशेष मोहिमेमुळे संपूर्ण जिल्ह्यात खळबळ उडाली असून, तस्करांमध्ये भीतीचे वातावरण निर्माण झाले आहे. चोरट्या मार्गाने गोवंश वाहतूक करणाऱ्या टोळ्यांवर पोलिसांनी थेट ‘सर्जिकल स्ट्राईक’ करत अनेक आरोपींना अटक केली आहे.
ग्रामीण पोलिसांनी १६ मे ते २६ मे या अवघ्या दहा दिवसांच्या कालावधीत जिल्ह्यात विविध ठिकाणी नाकाबंदी, गस्त आणि नियोजित छापेमारी करत मोठी कारवाई केली. वैजापूर, गंगापूर, पैठण, कन्नड, सिल्लोड, फुलंब्री आणि करमाडसह अनेक पोलीस ठाण्यांच्या पथकांनी संयुक्तपणे ही मोहीम राबवली. या मोहिमेदरम्यान एकूण २४ गंभीर गुन्हे दाखल करण्यात आले असून ४४ आरोपींना अटक करण्यात आली आहे. आरोपींवर महाराष्ट्र प्राणी रक्षण अधिनियम, भारतीय न्याय संहिता (BNS) आणि मोटार वाहन कायद्यांतर्गत कठोर कारवाई करण्यात आली आहे.
या कारवाईत पोलिसांनी कत्तलीसाठी अमानुष पद्धतीने डांबून ठेवलेली तब्बल १११ जनावरे सुखरूप मुक्त केली. यामध्ये वाहनांमध्ये कोंबलेली ६९ जनावरे आणि छुप्या ठिकाणी ठेवलेली ४२ जनावरे समाविष्ट आहेत. पोलिसांनी या सर्व जनावरांची सुटका करून त्यांना अधिकृत गोशाळांमध्ये हलवले. या जनावरांची किंमत सुमारे ३३ लाख ९९ हजार रुपये असल्याचे सांगण्यात आले आहे. याशिवाय १,९४५ किलो गोमांस, वाहने आणि इतर साहित्य असा एकूण ५५ लाख ४६ हजार ९०० रुपयांचा मुद्देमाल जप्त करण्यात आला आहे.
केवळ गुन्हे दाखल करून पोलिसांनी कारवाई थांबवली नाही, तर तस्करांच्या आर्थिक स्रोतांवरही घाव घालण्यास सुरुवात केली आहे. पोलिसांनी १९ वाहन आणि चालकांचे परवाने निलंबित करण्याचा प्रस्ताव प्रादेशिक परिवहन कार्यालयाकडे पाठवला होता. त्यानंतर आरटीओने पाच वाहनांचे परवाने ३० दिवसांसाठी निलंबित केले असून सहा चालकांचे ड्रायव्हिंग लायसन्स थेट ९० दिवसांसाठी रद्द केले आहेत. इतर जिल्ह्यांतील वाहनांवरही अशीच कठोर कारवाई करण्यासाठी संबंधित आरटीओ कार्यालयांकडे प्रस्ताव पाठवण्यात आले आहेत.
पोलीस अधीक्षक प्रकाश जाधव यांनी नागरिकांना आवाहन करताना सांगितले की, गोवंशाची अवैध वाहतूक किंवा कत्तलीसंदर्भात कोणतीही माहिती मिळाल्यास तात्काळ पोलिसांना माहिती द्यावी. स्थानिक पोलीस ठाणे, पोलीस नियंत्रण कक्ष किंवा डायल ११२ वर संपर्क साधून नागरिकांनी सहकार्य करावे, असे त्यांनी स्पष्ट केले. माहिती देणाऱ्यांची ओळख पूर्णपणे गुप्त ठेवली जाईल, असेही त्यांनी सांगितले.
ग्रामीण पोलिसांच्या या कठोर आणि आक्रमक कारवाईमुळे जिल्ह्यात गोवंश तस्करीविरोधात मोठा संदेश गेला असून, कायद्याचा धाक निर्माण झाल्याचे चित्र पाहायला मिळत आहे. आगामी काळातही अशाच प्रकारे मोहीम सुरू ठेवून अवैध तस्करी आणि बेकायदेशीर कत्तलखान्यांविरोधात कठोर कारवाई केली जाणार असल्याचे पोलिसांनी स्पष्ट केले आहे.
Follow us on our social media handles:
Instagram – https://www.instagram.com/newsdotz/
YouTube – https://www.youtube.com/@NewsDotz
Facebook – https://www.facebook.com/NewsDotz/
Twitter – https://x.com/NewsDotz
Also Read: Pune’s Latest Information
FacebookWhatsAppXTelegramThreadsLinkedInGmailShare
About The Author
