ठाण्यात मराठीला तिसऱ्या क्रमांकाचा दर्जा, मनसेचा आक्रमक इशारा

ठाण्यातील इंग्रजी शाळेने मराठीला तिसऱ्या भाषेचा दर्जा दिल्याने वाद; मनसेने शाळेला ताकीद देत कारवाईचा इशारा दिला आहे.

सायली मेमाणे

१७ जून २०२५ :ठाण्यातील प्रसिद्ध इंग्रजी माध्यम शाळा ‘युरो स्कूल’ने विद्यार्थ्यांसाठी मराठी भाषा तिसऱ्या क्रमांकावर ठेवण्याचा निर्णय घेतल्याने वादंग माजले आहे. विशेष म्हणजे ही घटना मुख्यमंत्री एकनाथ शिंदे यांच्या बालेकिल्ल्यात घडली आहे.

राज्य सरकारने हिंदी अनिवार्य करण्याबाबत घेतलेल्या वादग्रस्त निर्णयाच्या पार्श्वभूमीवर, नंतर सरकारने स्पष्टीकरण देऊन हिंदी ऐच्छिक ठेवण्यात येईल, असे जाहीर केले होते. परंतु, युरो स्कूलने मराठीतून शिक्षण घेणाऱ्या विद्यार्थ्यांनाही हिंदी दुसरी भाषा आणि मराठी तिसरी भाषा असे जाहीर केल्याने संताप व्यक्त केला जात आहे.

मनसेचे ठाणे जिल्हा अध्यक्ष अविनाश जाधव यांनी या प्रकाराला जोरदार विरोध करत शाळेच्या मुख्याध्यापकांची भेट घेतली आणि तोंडी ताकीद दिली. त्यांनी जाहीरपणे सांगितले की, “मराठी ही शाळेतील दुसरी भाषा असावी लागेल, अन्यथा शाळा बंद पाडू.”

जाधव यांनी पालकांच्या तक्रारीच्या आधारे शाळेला भेट दिली असता, त्यांनी सांगितले की, “बहुतेक विद्यार्थी मराठी भाषिक असूनही मराठीला तिसरा दर्जा देणे म्हणजे मराठी भाषेचा अपमान आहे. आमच्या प्रयत्नांनंतर मुख्याध्यापकांनी आश्वासन दिले आहे की, लवकरच मराठी अनिवार्य भाषा म्हणून घोषित केली जाईल.”

दरम्यान, राज्याचे परिवहन मंत्री आणि शिवसेना नेते प्रताप सरनाईक यांनीही या प्रकरणावर प्रतिक्रिया दिली असून म्हटले की, “राज्यातील कोणतीही शाळा मराठीला दुय्यम वागणूक देत असेल तर तिच्यावर कडक कारवाई केली जाईल. गरज पडल्यास शाळेची मान्यता रद्द केली जाईल.“

हा वाद केवळ एका शाळेपुरता मर्यादित नसून, राज्यातील शैक्षणिक धोरणातील भाषाविषयक गोंधळ आणि प्रशासनाच्या दुर्लक्षाचे उदाहरण म्हणून पाहिला जात आहे.

Do-follow Links:
Instagram: https://www.instagram.com/newsdotz/
YouTube: https://www.youtube.com/@NewsDotz
Facebook: https://www.facebook.com/profile.php?id=61573903448264
Twitter: https://x.com/NewsDotz

#ThaneSchoolLanguageRow #मराठीभाषा #MNSAction #EducationControversy #ThaneNews #EuroSchool #LanguageRights #मराठीविरोधातमुजोरी