धाराशिव राजकारण तापलं: तानाजी सावंतांचा राणा जगजितसिंह पाटलांना थेट इशारा

धाराशिवमध्ये भाजप आणि शिवसेना शिंदे गटात कलगीतुरा रंगला असून माजी मंत्री तानाजी सावंत यांनी आमदार राणा जगजितसिंह पाटील यांना जाहीर सभेत कडाडून इशारा दिला आहे.

पुणे 0६ डिसेंबर २०२६ : राज्यात पंचायत समिती, नगरपरिषद आणि आगामी जिल्हा परिषद निवडणुकांच्या पार्श्वभूमीवर राजकीय वातावरण तापत असताना धाराशिव जिल्ह्यात भाजप आणि शिवसेना शिंदे गटामधील अंतर्गत संघर्ष उघडपणे समोर आला आहे. माजी मंत्री आणि शिवसेना शिंदे गटाचे आमदार तानाजी सावंत यांनी भाजपचे आमदार राणा जगजितसिंह पाटील यांच्यावर जोरदार टीका करत थेट इशारा दिल्याने जिल्ह्यातील राजकीय वर्तुळात मोठी खळबळ उडाली आहे. विधानसभा निवडणुकीनंतर प्रथमच जिल्हा परिषद निवडणुकीच्या पार्श्वभूमीवर ढोकी येथील तेरणा शेतकरी सहकारी साखर कारखान्यावर आयोजित मेळाव्यात तानाजी सावंत आक्रमक झाल्याचे पाहायला मिळाले.

या मेळाव्यात भाषण करताना तानाजी सावंत यांनी कोणाचंही नाव थेट न घेता, भाजप आमदार राणा जगजितसिंह पाटील यांच्यावर निशाणा साधला. “सत्ता तुझी असली तरी सत्ता माझीही आहे. मुख्यमंत्री तुझा असेल तर उपमुख्यमंत्री माझाही आहे. त्यामुळे अंगावर यायचं काम करू नका,” असे म्हणत सावंत यांनी राजकीय ताकद दाखवून दिली. आपण बाळासाहेब ठाकरे यांचे कट्टर शिवसैनिक असल्याचे सांगत, कुणाचीही डाळ शिजू देणार नाही, असा इशाराही त्यांनी दिला.

तानाजी सावंत यांचे हे वक्तव्य केवळ वैयक्तिक टीका नसून आगामी स्थानिक स्वराज्य संस्थांच्या निवडणुकांच्या पार्श्वभूमीवर शक्तिप्रदर्शन असल्याचे मानले जात आहे. धाराशिव जिल्ह्यात सत्ताधारी महायुतीतील घटक पक्षांमध्येच कुरबुरी वाढताना दिसत आहेत. एकीकडे भाजप आणि दुसरीकडे शिवसेना शिंदे गट यांच्यातील स्थानिक पातळीवरील वर्चस्वाची लढाई आता उघडपणे रस्त्यावर येऊ लागली आहे.

यानंतर आणखी आक्रमक होत सावंत यांनी “आमचा नाद करू नका, हार-जीत आमच्यासाठी गौण आहे. आमच्या अंगावर येण्याचं धाडस करू नका. आला अंगावर घेतला शिंगावर,” अशा शब्दांत थेट आव्हान दिले. या वक्तव्यातून सावंत यांनी कोणत्याही राजकीय दबावाला न जुमानता आपली भूमिका स्पष्ट केली आहे. जिल्हा परिषद, पंचायत समिती आणि नगरपरिषद निवडणुकांमध्ये आपली ताकद दाखवून देण्याचा हा स्पष्ट संकेत असल्याचे राजकीय विश्लेषक सांगतात.

या घडामोडीनंतर धाराशिवमधील भाजप नेमकी काय भूमिका घेणार, याकडे सर्वांचे लक्ष लागले आहे. राणा जगजितसिंह पाटील यांच्याकडून अद्याप थेट प्रतिक्रिया आलेली नसली तरी, या विधानयुद्धामुळे महायुतीतील अंतर्गत तणाव वाढल्याचे स्पष्ट झाले आहे. स्थानिक स्वराज्य संस्थांच्या निवडणुकांमध्ये या संघर्षाचा थेट परिणाम उमेदवार निवड, प्रचार आणि मतांचे गणित यावर होण्याची शक्यता नाकारता येत नाही.

एकूणच, धाराशिव जिल्ह्यातील राजकारण सध्या आरोप-प्रत्यारोप, इशारे आणि शक्तिप्रदर्शनाने तापले असून, आगामी निवडणुकांच्या पार्श्वभूमीवर हे वाद अधिक तीव्र होण्याची चिन्हे दिसत आहेत.