पुण्यात बाणेर पोलिसांची मोठी कारवाई; ३.४ किलो गांजा जप्त, दोन आरोपी अटकेत
पुण्यात बाणेर पोलिसांची मोठी कारवाई; ३.४ किलो गांजा जप्त, दोन आरोपी अटकेत
बाणेर पोलिसांनी अंमली पदार्थ विक्री प्रकरणी मोठी कारवाई करत ३.४ किलो गांजा जप्त केला. दोन आरोपींना अटक करून NDPS कायद्यानुसार गुन्हा दाखल करण्यात आला.
रिपोर्टर : झोहेब शेख
पुणे २५ ऑगस्ट २०२५ : पुण्यातील बाणेर परिसरात अंमली पदार्थ विक्रीसंदर्भात बाणेर पोलिसांनी मोठी कारवाई केली आहे. २१ ऑगस्ट २०२५ रोजी पोलिसांनी मिळालेल्या माहितीच्या आधारे ब्लुमिंगडेल्स सोसायटी, ज्युपिटर हॉस्पिटल समोर कारवाई करत दोन तरुणांना ताब्यात घेतले. या कारवाईत पोलिसांनी तब्बल ३ किलो ४०० ग्रॅम गांजा जप्त केला असून अंमली पदार्थ विक्री रोखण्यासाठी ही कारवाई महत्त्वाची ठरली आहे.
अटक केलेल्या आरोपींची नावे रवि विजय वर्मा (वय १९) आणि कौशेलेंद्र नथुप्रसाद वर्मा (वय २३) अशी आहेत. हे दोघेही मूळ उत्तर प्रदेशातील चित्रकुट जिल्ह्यातील रहिवासी असून सध्या पुण्यातील पिंपळे सौदागर येथील शिव कॉलनीत राहत होते. पोलिसांच्या माहितीनुसार, हे दोघेही मिळून गांजा विक्रीसाठी आले होते. त्यांच्याकडे ३.४ किलो गांजा आढळून आला.
या प्रकरणी बाणेर पोलीस स्टेशनमध्ये गुन्हा रजि. नं. १९३/२०२५ नोंदवला गेला असून एनडीपीएस कायदा कलम ८ (क), २० (ब)(ii)(ब) आणि २९ अंतर्गत कारवाई करण्यात आली आहे. पोलिसांनी आरोपींना ताब्यात घेत पुढील तपास सुरू केला आहे.
या यशस्वी कारवाईचे श्रेय पोलिसांच्या तात्काळ प्रतिसादाला आणि अचूक माहिती संकलनाला जाते. या संपूर्ण कारवाईत पुणे शहराचे अपर पोलीस आयुक्त (पूर्व प्रादेशिक विभाग) मनोज पाटील, पोलीस उपायुक्त (परि-४) सोमय मुंढे, तसेच खडकी विभागाचे सहाय्यक पोलीस आयुक्त विठ्ठल दबडे यांच्या मार्गदर्शनाखाली ही कारवाई करण्यात आली.
स्थानिक स्तरावर या कारवाईचे नेतृत्व वरिष्ठ पोलीस निरीक्षक चंद्रशेखर सावंत यांनी केले. त्यांना पोलीस निरीक्षक (गुन्हे) अलका सरग, सहाय्यक पोलीस निरीक्षक डाबेराव, नंदकुमार कदम, अनिल माने, तसेच पोलीस उपनिरीक्षक संदेश माने, शैला पाथरे आणि सपोफौ सपकाळ यांचे सहकार्य लाभले. याशिवाय पोलीस अंमलदार गायकवाड, आहेर, शिंगे, इंगळे, गाडेकर, खरात, राऊत, भोरे, काळे, खुडे, पाथरुट आणि बर्गे यांनीही या मोहिमेत सक्रिय सहभाग नोंदवला.
गेल्या काही वर्षांत पुण्यात अंमली पदार्थ विक्री व सेवनाच्या घटना वाढल्या असल्याचे समोर येत आहे. तरुणाईला चुकीच्या मार्गावर नेणाऱ्या या धोकादायक व्यवहारावर आळा घालण्यासाठी पोलिसांकडून अशा प्रकारच्या कारवाया सुरू आहेत. बाणेर पोलिसांची ही कारवाई केवळ गांजा जप्त करण्यापुरती मर्यादित नसून शहरातील अमली पदार्थांच्या साखळीला धक्का देणारी ठरली आहे.
या कारवाईनंतर स्थानिक रहिवाशांनी पोलिसांचे कौतुक केले असून, भविष्यातही अशा मोहिमा अधिक प्रभावीपणे राबवाव्यात अशी अपेक्षा व्यक्त केली आहे. या घटनेमुळे पुण्यातील पोलिसांची सजगता आणि दक्षता पुन्हा एकदा अधोरेखित झाली आहे.
