बावधन गावठाणातील रहिवाशांना मिळणार प्रॉपर्टी कार्ड; भूमी अभिलेख विभागाची मोजणी प्रक्रिया लवकरच सुरू
बावधन गावठाणातील रहिवाशांना मिळणार प्रॉपर्टी कार्ड
पुण्यातील बावधन खुर्द आणि बुद्रुक गावातील रहिवाशांना लवकरच कायदेशीर मालकी हक्क मिळणार आहे. भूमी अभिलेख विभागाने गावठाण मोजणी सुरू करण्याचा निर्णय घेतला असून, त्यानंतर प्रॉपर्टी कार्ड वाटप होणार आहे.
सायली मेमाणे,
पुणे :२९ मे २०२४ : पुणे शहराच्या पश्चिमेकडील परिसरात वसलेल्या बावधन खुर्द आणि बुद्रुक गावातील शेकडो रहिवाशांना आता त्यांच्या जमिनीचा कायदेशीर हक्क मिळण्याची वाट मोकळी झाली आहे. भूमी अभिलेख विभागाने लवकरच या दोन्ही गावठाणांमध्ये आधुनिक पद्धतीने मोजणीचे काम सुरू करण्याचा निर्णय घेतला आहे. या मोजणीच्या आधारे मालकी हक्क निश्चित करून नागरिकांना प्रॉपर्टी कार्ड वाटप केले जाणार आहे.
या दोन्ही गावांमध्ये अनेक पिढ्यांपासून नागरिक वास्तव्यास आहेत, मात्र त्यांच्या मालमत्तेचा कोणताही अधिकृत दस्तऐवज उपलब्ध नव्हता. केवळ ग्रामपंचायतीच्या कराची पावतीच एकमेव पुरावा असल्यामुळे विविध व्यवहारांत अडथळे येत होते. यामुळे अनेक वर्षांपासून रहिवाशांकडून मालकी हक्कासाठी मागणी केली जात होती.
बावधन भागातील विकास झपाट्याने होत असतानाच या गावठाणाचा सुमारे वीस ते बावीस एकर क्षेत्राचा परिसर नव्याने नकाशात मोजला जाणार आहे. त्यात पारंपरिक घरे तसेच उभारण्यात आलेल्या नव्या इमारतींचा समावेश होणार आहे. आधुनिक डिजिटल तंत्रज्ञानाच्या मदतीने ही मोजणी केली जाईल. मोजणी पूर्ण झाल्यानंतर मिळकतींची संख्या निश्चित केली जाईल आणि प्रत्येक मिळकतीचा मालकी हक्क तपासून योग्य त्या नागरिकांना प्रॉपर्टी कार्ड देण्यात येणार आहे.
१९९७ मध्ये पुणे महापालिकेत समाविष्ट झालेल्या बावधनसह एकूण २३ गावांत प्रॉपर्टी कार्ड वाटपाची योजना आखण्यात आली होती. यासाठी महापालिकेने भूमी अभिलेख विभागाला आर्थिक तरतूद देखील केली होती. मात्र काही तांत्रिक परवानग्यांअभावी ही प्रक्रिया ठप्प झाली होती. अलीकडे वडगाव शेरी आणि खराडी या परिसरांत ही प्रक्रिया यशस्वीरित्या पार पडल्याने आता बावधनमध्येही आशा निर्माण झाली आहे.
ही प्रक्रिया पूर्णत्वास गेल्यानंतर रहिवाशांना त्यांच्या मालमत्तेचा कायदेशीर पुरावा मिळणार असून भविष्यातील व्यवहार अधिक पारदर्शक व सुलभ होतील. पुण्याच्या नागरी विस्ताराच्या दृष्टीने हा महत्त्वाचा टप्पा ठरणार आहे.
About The Author
