भारतीय फुटबॉलचा ऐतिहासिक क्षण! 20 वर्षांनंतर U20 आशियाई कपमध्ये भारताची एन्ट्री

बांगलादेशचा 3-0 ने पराभव करत भारताने AFC U20 आशियाई कप चीन 2027 स्पर्धेसाठी पात्रता मिळवली. तब्बल 20 वर्षांनंतर भारताने ही कामगिरी केली.

पुणे, ०७ सप्टेंबर २०२६ : भारतीय फुटबॉलसाठी एक ऐतिहासिक आणि अभिमानाचा क्षण समोर आला आहे. AFC U20 आशियाई कप 2027 पात्रता फेरीतील अंतिम सामन्यात भारताच्या युवा संघाने बांगलादेशचा 3-0 असा दणदणीत पराभव करत स्पर्धेतील आपले स्थान निश्चित केले आहे. ताश्कंदमधील दोस्तलिक स्टेडियमवर झालेल्या या सामन्यात भारतीय संघाने सुरुवातीपासूनच आक्रमक खेळ करत बांगलादेशवर दबाव कायम ठेवला. या विजयासह तब्बल 20 वर्षांनंतर भारताने AFC U20 आशियाई कपमध्ये प्रवेश मिळवला आहे.

भारताच्या या शानदार विजयात डॅनी मेईतेई लैश्राम, विशाल यादव आणि मोहम्मद अरबाश यांनी महत्त्वाची भूमिका बजावली. सामन्याच्या 25व्या मिनिटाला डॅनीने भारताचे खाते उघडले. सुरुवातीपासूनच बांगलादेशच्या बचावफळीवर दबाव निर्माण करण्यात भारतीय खेळाडूंना यश आले होते. मिळालेल्या संधीचा योग्य फायदा घेत डॅनीने गोल करत भारताला आघाडी मिळवून दिली.

पहिल्या गोलनंतर भारतीय संघाने आपला आक्रमक खेळ कायम ठेवला. बांगलादेशने प्रतिकार करण्याचा प्रयत्न केला असला तरी भारताच्या वेगवान हालचाली आणि चांगल्या पासिंगमुळे त्यांना बचावावर लक्ष केंद्रित करावे लागले. पहिल्या हाफमध्ये भारताने आणखी गोल करण्याच्या काही संधी निर्माण केल्या. डॅनीच्या फ्री-किकवरही गोलची संधी निर्माण झाली होती; मात्र बांगलादेशच्या गोलरक्षकाने चांगला बचाव करत भारताला दुसरा गोल करण्यापासून रोखले.

दुसऱ्या हाफमध्येही भारतीय संघाने आक्रमणाची धार कायम ठेवली. जवळपास एक तासाचा खेळ झाल्यानंतर भारताला दुसरे यश मिळाले. बॉक्समध्ये आलेल्या चेंडूवर विशाल यादवने शानदार कसरत करत अप्रतिम गोल केला आणि भारताची आघाडी 2-0 अशी केली. या गोलमुळे भारतीय खेळाडूंचा आत्मविश्वास आणखी वाढला, तर बांगलादेशवर दबाव वाढला.

दोन गोलची आघाडी घेतल्यानंतर भारताने बचाव आणि आक्रमणाचा योग्य समतोल साधला. बांगलादेशने सामन्याच्या शेवटच्या टप्प्यात आक्रमक होण्याचा प्रयत्न केला. मात्र, भारतीय बचावफळीने त्यांचे प्रयत्न हाणून पाडले. 72व्या मिनिटाला भारताने डॅनी आणि विशाल यांना विश्रांती देत मोहम्मद अरबाश आणि प्रशांत जाजो यांना मैदानात उतरवले.

मैदानात येताच मोहम्मद अरबाशने आपली छाप पाडली. 79व्या मिनिटाला त्याने डाव्या पायाने घेतलेला जोरदार फटका थेट जाळ्यात धाडला आणि भारताची आघाडी 3-0 अशी केली. त्यानंतर बांगलादेशला पुनरागमनाची कोणतीही संधी न देता भारतीय संघाने सामना आपल्या नियंत्रणात ठेवला.

या विजयामुळे भारताने गट ‘ब’मध्ये सहा गुणांसह दुसरे स्थान मिळवत AFC U20 आशियाई कप चीन 2027 साठी पात्रता निश्चित केली. तब्बल दोन दशकांनंतर भारतीय युवा फुटबॉल संघाने आशियाई स्तरावरील या प्रतिष्ठेच्या स्पर्धेत प्रवेश मिळवल्याने भारतीय फुटबॉलसाठी हा मोठा टप्पा मानला जात आहे. या कामगिरीमुळे देशातील युवा फुटबॉलपटूंना मोठी प्रेरणा मिळण्याची अपेक्षा आहे.

Also Read: Pune’s Latest Information
Instagram – https://www.instagram.com/newsdotz/
YouTube – https://www.youtube.com/@NewsDotz
Facebook – https://www.facebook.com/NewsDotz/

Twitter – https://x.com/NewsDotz

Also Read: Pune’s Latest Information

FacebookWhatsAppXTelegramThreadsLinkedInGmailShare

About The Author

Sayali Memane

Sayali Memane is a Pune-based journalist at NewsDotz, covering Maharashtra news, current affairs, and trending updates. She focuses on clear, factual, and fast digital reporting, delivering reliable news content tailored for modern audiences across platforms.

See author's posts