मंचरजवळ भीषण अपघात कार डिव्हायडर तोडून बसला धडकली, तिघांचा मृत्यू

पुणे-नाशिक महामार्गावर मंचरजवळील एकलहरे येथे भीषण अपघात; एकाच कुटुंबातील तिघांचा मृत्यू, दोन मुले जखमी.

पुणे २३ मार्च २०२६ : पुणे-नाशिक महामार्गावर रविवारी रात्री उशिरा झालेल्या भीषण अपघाताने परिसर हादरला आहे. Manchar जवळील एकलहरे (ता. आंबेगाव) येथे कारचा ताबा सुटून ती डिव्हायडर तोडत समोरून येणाऱ्या बसला धडकली. या अपघातात एकाच कुटुंबातील तिघांचा जागीच मृत्यू झाला असून दोन मुले गंभीर जखमी झाली आहेत.

मिळालेल्या माहितीनुसार, Mallikarjun Ambegave (वय 42) हे आपल्या कुटुंबासह नाशिकहून पुण्याकडे कारने प्रवास करत होते. रात्री साडेअकराच्या सुमारास एकलहरे गावाजवळ त्यांच्या कारवरील नियंत्रण अचानक सुटले. कारने डिव्हायडर तोडून समोरून येणाऱ्या बसला जोरदार धडक दिली.

या भीषण अपघातात मल्लिकार्जुन आंबेगावे, त्यांची पत्नी आरती आंबेगावे (वय 40) आणि सासू लता तूपलोंढे (वय 60) यांचा जागीच मृत्यू झाला. तर मुलगा प्रेम (वय 20) आणि मुलगी मृणाल (वय 16) गंभीर जखमी झाले असून त्यांच्यावर स्थानिक रुग्णालयात उपचार सुरू आहेत.

अपघात इतका भीषण होता की कारचा अक्षरशः चक्काचूर झाला. प्राथमिक तपासात कारचे दोन्ही टायर फुटल्याचे समोर आले आहे. त्यामुळे टायर फुटल्याने किंवा मागून आलेल्या वाहनाने धक्का दिल्याने चालकाचा ताबा सुटला असावा, अशी शक्यता पोलिसांकडून व्यक्त करण्यात येत आहे.

अपघातात बसच्या पुढील भागाचेही नुकसान झाले आहे. घटनेची माहिती मिळताच Manchar Police Station चे अधिकारी घटनास्थळी दाखल झाले आणि पंचनामा केला. या प्रकरणी बस चालकाने दिलेल्या फिर्यादीवरून कारचालकाविरोधात गुन्हा दाखल करण्यात आला आहे.

दरम्यान, या अपघातात मृत्यू झालेल्या मल्लिकार्जुन आंबेगावे हे एक यशस्वी वास्तु अभियंता होते. त्यांनी पीसीएमसी परिसरात आपल्या कौशल्याच्या जोरावर मोठे नाव कमावले होते. ‘शिव असोसिएट्स’ या कंपनीत काम करत त्यांनी आपली कारकीर्द घडवली होती. पुढे स्वतःची फर्म सुरू करून त्यांनी पीएमआरडीए अंतर्गत 60 हून अधिक प्रकल्प पूर्ण केले होते.

त्यांच्या आयुष्यातील एक भावनिक बाजू म्हणजे, सुमारे दहा वर्षांपूर्वी त्यांना मूत्रपिंडाचा गंभीर आजार झाला होता. त्या वेळी त्यांच्या पत्नीने त्यांना किडनी दान करून त्यांचे प्राण वाचवले होते. मात्र, नियतीने या कुटुंबावर पुन्हा एकदा दुःखाचा डोंगर कोसळला आहे.

या अपघातामुळे संपूर्ण परिसरात हळहळ व्यक्त केली जात आहे. महामार्गावरील सुरक्षिततेबाबतही पुन्हा एकदा प्रश्न उपस्थित झाले आहेत. पुढील तपास पोलीसांकडून सुरू आहे.