युद्धात जिंकलो, पण तहात हरलो! एमपीएसी आंदोलनावर सुषमा अंधारेंचा सरकारला सवाल

एमपीएसीआंदोलनावर सुषमा अंधारे यांनी सरकारवर टीका केली. विवेक भीमनवार यांच्या राजीनाम्याची मागणी, आंदोलकांवरील गुन्हे, घरमालकांना नोटिसा आणि परीक्षार्थ्यांच्या भवितव्याबाबत त्यांनी गंभीर प्रश्न उपस्थित केले.

पुणे १३ ऑक्टोबर २०२६ :महाराष्ट्र लोकसेवा आयोगाच्या (एमपीएसी) परीक्षार्थ्यांनी आपल्या विविध मागण्यांसाठी केलेल्या आंदोलनावरून राज्यातील राजकीय वातावरण पुन्हा तापले आहे. आंदोलनानंतर सरकारने मागण्या मान्य केल्याचा दावा केला जात असला, तरी परीक्षार्थ्यांच्या हाती नेमके काय लागले, असा सवाल शिवसेना (उद्धव बाळासाहेब ठाकरे) पक्षाच्या नेत्या सुषमा अंधारे यांनी उपस्थित केला आहे. ‘युद्धात जिंकलो, पण तहात हरलो,’ अशी उपरोधिक प्रतिक्रिया देत त्यांनी सरकारच्या भूमिकेवर टीका केली.

MPSC अध्यक्षांच्या राजीनाम्याची मागणी अपूर्ण?

महाराष्ट्र लोकसेवा आयोगाचे अध्यक्ष विवेक भीमनवार यांच्या राजीनाम्याच्या मागणीसाठी परीक्षार्थ्यांचे आंदोलन ११ दिवस सुरू होते. या आंदोलनातील प्रमुख मागण्यांपैकी अध्यक्षांचा राजीनामा ही महत्त्वाची मागणी होती. मात्र, राजीनामा झालेला नसल्याने आंदोलनाला संपूर्ण यश मिळाल्याचे म्हणता येणार नाही, अशी भूमिका सुषमा अंधारे यांनी मांडली.

भीमनवार यांना सक्तीच्या रजेवर पाठविण्यात आले असते, तर मुख्यमंत्री देवेंद्र फडणवीस यांनी त्याबाबत स्पष्ट माहिती दिली असती. मग भीमनवार यांनी स्वतः यासंदर्भात ट्विट का केले, असा सवालही अंधारे यांनी उपस्थित केला. त्यामुळे सरकारने मागण्या मान्य केल्याच्या दाव्याबाबत त्यांनी प्रश्नचिन्ह उपस्थित केले.

आंदोलकांवरील गुन्हे आणि घरमालकांना नोटिसांचा मुद्दा

MPSC आंदोलनादरम्यान सहभागी झालेल्या परीक्षार्थ्यांवरील गुन्हे मागे घेतल्याचे सांगितले जात असले, तरी आंदोलनकर्ते ज्या घरांमध्ये राहत आहेत, त्या घरमालकांना नोटिसा का देण्यात आल्या, असा प्रश्न अंधारे यांनी विचारला.

आंदोलनकर्त्यांवरील कारवाई मागे घेण्याबाबत सरकारची भूमिका स्पष्ट असणे आवश्यक आहे. केवळ घोषणा करून प्रश्न सुटत नाहीत, तर त्यांची प्रत्यक्ष अंमलबजावणी झाली पाहिजे, असा सूर त्यांच्या टीकेतून दिसून आला.

याशिवाय सार्वजनिक बांधकाम मंत्री शिवेंद्रराजे भोसले आणि आमदार रोहित पवार यांच्यात नेमकी कधी भेट झाली आणि त्या भेटीत कोणत्या मुद्द्यांवर चर्चा झाली, याबाबतही स्पष्टता नसल्याचे अंधारे यांनी म्हटले.

‘परीक्षार्थ्यांसोबत क्रूर चेष्टा’

सरकारने MPSC परीक्षार्थ्यांची केवळ दिशाभूल केली नाही, तर त्यांच्यासोबत क्रूर चेष्टा केल्याचा गंभीर आरोप सुषमा अंधारे यांनी केला. आंदोलनात सरकारविरोधात भूमिका घेणाऱ्या परीक्षार्थ्यांची नावे भविष्यात गोपनीय अहवालांमध्ये नोंदवली जातील का, अशी भीतीही त्यांनी व्यक्त केली.

आंदोलनात सहभागी झालेल्या विद्यार्थ्यांना भविष्यात सरकारकडून सूडबुद्धीने वागवले जाणार नाही, याची खात्री काय, असा सवाल त्यांनी उपस्थित केला. आंदोलनातून पुढे आलेले विद्यार्थी भविष्यात स्पर्धा परीक्षा उत्तीर्ण झाल्यानंतर त्यांना सरकारी सेवेत सामावून घेतले जाईल का, हा प्रश्नही त्यांनी उपस्थित केला.

रोहित पवारांच्या भूमिकेचे कौतुक

आंदोलनादरम्यान आमदार रोहित पवार यांनी वेळ देऊन परीक्षार्थ्यांची बाजू मांडली, याचे अंधारे यांनी कौतुक केले. आंदोलनातील विद्यार्थ्यांच्या प्रश्नांना राजकीय पातळीवर आवाज मिळणे महत्त्वाचे असल्याचे त्यांनी नमूद केले.

दरम्यान, पदवीधर निवडणुकीवर या आंदोलनाचा परिणाम होऊ नये, यासाठी सरकारने सारवासारव केल्याचा आरोपही अंधारे यांनी केला.

एमपीएसी आंदोलनाचा पुढील परिणाम काय?

एमपीएसीआंदोलनानंतर सरकारच्या दाव्यांची प्रत्यक्ष अंमलबजावणी होते का, अध्यक्षांच्या राजीनाम्याच्या मागणीबाबत पुढे काय निर्णय होतो आणि आंदोलनकर्त्या परीक्षार्थ्यांच्या भवितव्याबाबत कोणती स्पष्ट भूमिका घेतली जाते, याकडे आता लक्ष लागले आहे.

परीक्षार्थ्यांच्या मागण्या, सरकारी निर्णय आणि आंदोलनातील सहभागी विद्यार्थ्यांच्या सुरक्षिततेबाबत निर्माण झालेले प्रश्न यामुळे हा मुद्दा चर्चेत राहण्याची शक्यता आहे. सरकारकडून या आरोपांवर काय स्पष्टीकरण दिले जाते, हे पाहणे महत्त्वाचे ठरणार आहे.