संत सोपानदेव पालखी सोहळ्याला वेग 12 जुलैला सासवडहून पंढरपूरकडे प्रस्थान, वारकऱ्यांमध्ये उत्साह

आषाढी वारीनिमित्त संत सोपानदेव महाराज पालखी सोहळा 12 जुलै रोजी सासवड येथून पंढरपूरकडे प्रस्थान करणार आहे. 24 जुलैला पालखी पंढरपूरात दाखल होणार असून रिंगण आणि बंधूभेट सोहळ्यांची तयारी सुरू आहे.

पुणे ०३ जून २०२६ : आषाढी वारीच्या पार्श्वभूमीवर वारकरी संप्रदायात उत्साहाचे वातावरण निर्माण झाले असून संत सोपानदेव महाराज पालखी सोहळ्याच्या तयारीला वेग आला आहे. वारकऱ्यांचे श्रद्धास्थान असलेल्या संत सोपानदेव महाराजांची पालखी 12 जुलै रोजी सासवड येथून पंढरपूरकडे प्रस्थान करणार आहे. या सोहळ्यात हजारो वारकरी आणि भाविक सहभागी होणार असून प्रशासन आणि देवस्थान समितीकडून नियोजनाची तयारी अंतिम टप्प्यात पोहोचली आहे.

आषाढी एकादशीच्या वारीसाठी दरवर्षीप्रमाणे यंदाही राज्यभरातील लाखो वारकरी पंढरपूरकडे मार्गस्थ होणार आहेत. 7 जुलै रोजी देहू येथून संत तुकाराम महाराज पालखी सोहळा तर 8 जुलै रोजी आळंदी येथून संत ज्ञानेश्वर महाराज पालखी सोहळ्याचे प्रस्थान होणार आहे. संत ज्ञानेश्वर महाराजांची पालखी 11 जुलै रोजी सासवड येथे दाखल होणार असून त्यानंतर त्यांच्या धाकट्या बंधूंची संत सोपानदेव महाराज पालखी 12 जुलै रोजी सकाळी 11 वाजता मंदिराच्या देऊळवाड्यातून पंढरपूरच्या दिशेने मार्गस्थ होईल.

टाळ-मृदुंगाच्या गजरात, विठ्ठल नामाच्या जयघोषात आणि अभंगांच्या सुरावटीत पालखी सोहळ्याला प्रारंभ होणार आहे. पालखीच्या पहिल्या दिवसाच्या प्रवासात पिंपळे येथे दुपारचा विसावा तर पांगारे येथे रात्रीचा मुक्काम असेल. त्यानंतर पालखी बारामती, इंदापूर, अकलूज आणि इतर गावांमधून मार्गक्रमण करत पंढरपूरकडे रवाना होईल.

पालखी मार्गावरील विविध ठिकाणी वारकऱ्यांच्या स्वागतासाठी विशेष व्यवस्था करण्यात आली आहे. विसावे, महाप्रसाद, नैवेद्य, भजन-कीर्तन आणि रिंगण सोहळ्यांचे आयोजन करण्यात येणार आहे. बारामती तालुक्यातील वाघळवाडी येथे 15 जुलै रोजी पहिले गोल रिंगण होणार असून हा सोहळा वारकऱ्यांसाठी विशेष आकर्षणाचा केंद्रबिंदू असतो. त्यानंतर 18 जुलै रोजी पिंपळी येथे पहिले बकरी रिंगण पार पडणार आहे.

यंदाच्या पालखी सोहळ्यात 22 जुलै रोजी टप्पा येथे होणारा बंधूभेट सोहळा आणि 23 जुलै रोजी वाखरी येथे होणारे उभे रिंगण तसेच विविध पालख्यांची भेट हा देखील विशेष आकर्षणाचा भाग असेल. या धार्मिक परंपरांना वारकरी संप्रदायात अत्यंत महत्त्वाचे स्थान आहे. अखेर 24 जुलै रोजी संत सोपानदेव महाराजांची पालखी पंढरपूर येथे दाखल होणार आहे.

दरम्यान, आषाढी वारीच्या तयारीचा आढावा घेत जिल्हाधिकारी एस. कार्तीकेयन यांनी पंढरपूर परिसरातील विविध विकास आणि सुविधा कामांची पाहणी केली. श्री विठ्ठल-रुक्मिणी मंदिर परिसरातील पडसाळ, देणगी कक्ष, अर्धमंडप आणि पश्चिमद्वाराच्या कामांना गती देण्याच्या सूचना त्यांनी संबंधित विभागांना दिल्या आहेत. तसेच चंद्रभागा वाळवंट, सीसीटीव्ही नियंत्रण कक्ष, वाखरी पालखीतळ आणि वाखरी-पंढरपूर मार्गाची पाहणी करून आवश्यक निर्देश दिले.

आषाढी वारी ही महाराष्ट्राच्या सांस्कृतिक आणि आध्यात्मिक परंपरेचा अविभाज्य भाग मानली जाते. संत सोपानदेव महाराज पालखी सोहळ्यामुळे वारकरी भक्ती, समता आणि अध्यात्माचा संदेश घेऊन विठुरायाच्या भेटीसाठी पंढरपूरकडे मार्गस्थ होणार आहेत.

Follow us on our social media handles:
Instagram – https://www.instagram.com/newsdotz/
YouTube – https://www.youtube.com/@NewsDotz
Facebook – https://www.facebook.com/NewsDotz/

Twitter – https://x.com/NewsDotz

Also Read: Pune’s Latest Information

FacebookWhatsAppXTelegramThreadsLinkedInGmailShare

About The Author

Sayali Memane

Sayali Memane is a Pune-based journalist at NewsDotz, covering Maharashtra news, current affairs, and trending updates. She focuses on clear, factual, and fast digital reporting, delivering reliable news content tailored for modern audiences across platforms.

See author's posts