कल्याण-डोंबिवलीत पोलिसांची धडक ‘ऑल आऊट’ मोहीम; ३५० हून अधिक गुंड, मद्यपी ताब्यात!
कल्याण-डोंबिवलीत पोलिसांची धडक ‘ऑल आऊट’ मोहीम; ३५० हून अधिक गुंड, मद्यपी ताब्यात!
कल्याण-डोंबिवली परिसरात पोलिसांची मोठी छापा मोहीम; ३५० हून अधिक गुंड, मद्यपी व गैरधंदे करणाऱ्यांना ताब्यात. ‘नशामुक्त शहर’ मोहिमेचा भाग म्हणून ही कारवाई पार पडली.
सायली मेमाणे
पुणे २७ ऑक्टोबर २०२५ : कल्याण-डोंबिवली परिसरात पोलिसांनी शनिवारी रात्री मोठी ‘ऑल आऊट’ मोहीम राबवली. मागील काही दिवसांपासून शहरात भुरट्या चोऱ्या, अवैध मद्यविक्री, तसेच सार्वजनिक ठिकाणी मद्यपान व अंमली पदार्थांचे सेवन वाढल्याच्या तक्रारी वाढल्या होत्या. या पार्श्वभूमीवर पोलिस उपायुक्त अतुल झेंडे यांच्या मार्गदर्शनाखाली रात्री आठपासून पहाटे चारपर्यंत धडक छापा टाकण्यात आला. या कारवाईत तब्बल २४० पोलिस अधिकारी आणि कर्मचारी सहभागी झाले होते.
पोलिसांनी एकाच रात्री ३५० हून अधिक समाजकंटक, गुंड, मद्यपी आणि गैरधंदे करणाऱ्यांना ताब्यात घेतले. कल्याण आणि डोंबिवली शहरातील रेल्वे स्थानक परिसर, रिकामे प्लॉट, वाहनतळ आणि झाडाझुडपांमध्ये लपून बसलेल्या संशयितांना पोलिसांनी वेढा घालून पकडले. काही आरोपींनी पळून जाण्याचा प्रयत्न केला; मात्र पोलिसांनी चारही दिशांनी घेराव घालून त्यांना अटक केली.
या मोहिमेचा उद्देश ‘कल्याण-डोंबिवली नशामुक्त शहर’ हे ध्येय साध्य करणे असल्याचे पोलिसांनी सांगितले. शहरात पूर्वी अशाच प्रकारच्या मोहिमेद्वारे अनेक अवैध अड्डे उद्ध्वस्त करण्यात आले होते. तथापि, अलीकडे पुन्हा काही ठिकाणी गैरधंद्यांना उधाण आल्याची माहिती पोलिसांना मिळाली. त्यानंतर उपायुक्त अतुल झेंडे यांनी अचानक आदेश देऊन सर्व आठ पोलिस ठाण्यांच्या वरिष्ठ अधिकाऱ्यांना तातडीने मोहीम राबवण्याचे निर्देश दिले.
या कारवाईत उपायुक्त झेंडे आणि साहाय्यक पोलिस आयुक्त स्वतः सहभागी झाले. पोलिसांनी स्थानिक नागरिकांच्या तक्रारींच्या आधारे मद्यविक्री, जुगार अड्डे, आणि अवैध व्यवसायांवर छापे टाकले. अनेक ठिकाणी पोलिसांनी मद्यपान करणाऱ्यांना थेट घटनास्थळावरून पोलिस ठाण्यात आणले. काही ठिकाणी मद्यधुंद अवस्थेत सापडलेल्या व्यक्तींना वैद्यकीय तपासणीसाठी पाठवण्यात आले.
या कारवाईदरम्यान मद्यपान करून वाहन चालविणाऱ्यांकडून तब्बल ४५ हजार रुपयांचा दंड वसूल करण्यात आला. सहा खतरनाक गुंडांना अटक करण्यात आली, तर २७ तडीपार गुंडांची चौकशी करण्यात आली. पोलिसांच्या तपासात असेही आढळले की, अटक करण्यात आलेल्या अनेक मद्यपींमध्ये सुस्थितीत घरातील तरुणांचाही समावेश होता.
पोलिसांनी स्पष्ट केले की, या मोहिमेचा उद्देश नागरिकांच्या सुरक्षेसाठी आणि शहरातील गुन्हेगारी आटोक्यात आणण्यासाठी आहे. पुढील काही आठवडे या प्रकारच्या धडक छापेमारी मोहीमा सातत्याने राबवण्याची तयारी असल्याचे पोलिस सूत्रांनी सांगितले.
शहरातील नागरिकांनी या कारवाईचे स्वागत केले असून, रात्रीच्या वेळेत रस्त्यांवर वाढलेली पोलिसांची उपस्थिती पाहून नागरिकांना दिलासा मिळाला आहे. गुन्हेगारीवर नियंत्रण आणि सार्वजनिक ठिकाणी अवैध मद्यसेवन थांबवण्यासाठी ही कारवाई प्रभावी ठरल्याचे स्थानिकांनी म्हटले आहे.
कल्याण-डोंबिवली परिसरातील वाढत्या गुन्हेगारीवर आळा घालण्यासाठी पोलिसांचे हे पाऊल अत्यंत महत्त्वाचे ठरत आहे. प्रशासनाने यापुढेही अशा प्रकारे ‘ऑल आऊट’ मोहिमा राबवून शहरात कायदा आणि सुव्यवस्था राखण्याचा निर्धार व्यक्त केला आहे.
