कार्तिकी वारीसाठी पंढरपुरात विठ्ठलाचे 24 तास दर्शन; भक्तांसाठी आनंदाची बातमी
कार्तिकी वारीसाठी पंढरपुरात विठ्ठलाचे 24 तास दर्शन; भक्तांसाठी आनंदाची बातमी
कार्तिकी एकादशी यात्रेनिमित्त पंढरपुरात येणाऱ्या भाविकांसाठी मोठी सोय करण्यात आली आहे. मंदिर समितीने 9 नोव्हेंबरपर्यंत विठ्ठलाचे 24 तास दर्शन सुरू ठेवण्याचा निर्णय घेतला आहे.
सायली मेमाणे
पुणे २७ ऑक्टोबर २०२५ : पंढरपूर : कार्तिकी एकादशी यात्रेनिमित्त राज्यभरातून लाखो भाविक पंढरपुरात दाखल होतात. भाविकांच्या सोयीसाठी यंदा श्री विठ्ठल-रुक्मिणी मंदिर समितीकडून महत्त्वाचा निर्णय घेण्यात आला आहे. आता भाविकांना विठ्ठलाचे दर्शन 24 तास उपलब्ध राहणार असून, ही सुविधा 9 नोव्हेंबरपर्यंत सुरू राहील, अशी माहिती मंदिर समितीकडून देण्यात आली आहे.
दरवर्षीप्रमाणे यंदाही कार्तिकी वारीनिमित्त पंढरपूरात भक्तांची प्रचंड गर्दी होण्याची अपेक्षा आहे. यात्रेच्या काळात दर्शनासाठी लागणारी लांबच लांब रांगा आणि वेळ लक्षात घेऊन, मंदिर समितीने अखंड दर्शनाची सुविधा उपलब्ध करून दिली आहे. यामुळे राज्यातील विविध जिल्ह्यांतून आलेल्या वारकऱ्यांना कोणत्याही वेळेस विठ्ठलाचे दर्शन घेता येईल.
मंदिर प्रशासनाने सांगितले की, कार्तिकी एकादशीच्या कालावधीत मंदिर परिसरातील सुरक्षा, स्वच्छता आणि व्यवस्थापन यावर विशेष लक्ष दिले जात आहे. भाविकांच्या गर्दीचे नियंत्रण राखण्यासाठी पोलिस दल, स्वयंसेवक आणि मंदिर कर्मचारी 24 तास कार्यरत राहतील. तसेच गर्दीच्या ठिकाणी सीसीटीव्ही कॅमेरे बसवण्यात आले असून, भाविकांच्या हालचालींवर सतत नजर ठेवली जाणार आहे.
या निर्णयामुळे भाविकांमध्ये आनंदाचे वातावरण निर्माण झाले आहे. अनेक वारकरी संघटनांनी मंदिर समितीचे आभार मानले असून, “विठ्ठलाचे दर्शन कोणत्याही प्रतीक्षेशिवाय घेता येणे ही आमच्यासाठी मोठी सोय आहे,” अशी भावना भाविकांनी व्यक्त केली.
याचबरोबर, पंढरपूर नगरपरिषद, आरोग्य विभाग आणि वाहतूक विभागाने यात्रेच्या काळात स्वच्छता, वैद्यकीय सेवा आणि वाहतूक नियंत्रणासाठी संयुक्त कृती आराखडा तयार केला आहे. यात्रेकरूंना मार्गदर्शनासाठी विशेष माहिती केंद्रे उभारण्यात आली आहेत.
कार्तिकी वारी ही महाराष्ट्रातील सर्वात महत्त्वाच्या धार्मिक परंपरांपैकी एक मानली जाते. आषाढी वारीनंतर कार्तिकी वारीला विठ्ठल भक्तांसाठी वेगळेच स्थान आहे. हजारो वारकरी टाळ-मृदुंगाच्या गजरात पंढरपुरात दाखल होतात आणि “ज्ञानबा-तुकाराम”च्या जयघोषात विठ्ठलाचे दर्शन घेतात.
यंदाच्या कार्तिकी वारीत दर्शनाची 24 तास सुविधा सुरू असल्याने भाविकांना अधिक सुलभ आणि शांततेत विठ्ठलाचे दर्शन घेता येणार आहे. मंदिर समितीने भाविकांना आवाहन केले आहे की, दर्शनासाठी शिस्त राखावी, लांबून आलेल्या वारकऱ्यांना प्राधान्य द्यावे आणि मंदिर परिसरात स्वच्छता राखावी.
