गणेशोत्सवात पावसाची हजेरी! घाटमाथ्यावर हवामान खात्याचा ‘ऑरेंज अलर्ट’
गणेशोत्सवात पावसाची हजेरी! घाटमाथ्यावर हवामान खात्याचा ‘ऑरेंज अलर्ट’
गणेशोत्सवात महाराष्ट्रात पावसाचा जोर वाढणार, हवामान विभागाने पुणे, सातारा, कोल्हापूर घाटमाथ्यावर ‘ऑरेंज अलर्ट’ जारी केला. मुंबईसह अनेक जिल्ह्यांसाठी ‘यलो अलर्ट’. नागरिकांना सतर्कतेचा इशारा.
सायली मेमाणे
पुणे २८ ऑगस्ट २०२५ : गणेशोत्सवाचा उत्साह साजरा होत असताना राज्यात पुन्हा एकदा पावसाचे आगमन झाले आहे. मागील काही दिवसांपासून पावसाने विश्रांती घेतली होती, परंतु हवामान विभागाच्या अंदाजानुसार आजपासून अनेक जिल्ह्यांत पावसाचा जोर वाढण्याची शक्यता वर्तवण्यात आली आहे. बंगालच्या उपसागरात तयार झालेल्या कमी दाबाच्या क्षेत्रामुळे राज्यात पावसासाठी अनुकूल वातावरण तयार झाले आहे.
भारतीय हवामान विभागाने पश्चिम महाराष्ट्रातील घाटमाथ्यांवर मुसळधार पावसाचा इशारा दिला असून, पुणे, सातारा आणि कोल्हापूर जिल्ह्यांसाठी ‘ऑरेंज अलर्ट’ जारी केला आहे. या भागांमध्ये जोरदार ते अतिजोरदार पाऊस कोसळण्याची शक्यता आहे. घाटमाथ्यावरील भागांमध्ये मुसळधार पावसामुळे भूस्खलनाचा धोका निर्माण होऊ शकतो, त्यामुळे नागरिकांना सावधगिरी बाळगण्याचे आवाहन करण्यात आले आहे.
दरम्यान, मुंबई आणि आसपासच्या भागांत हलका ते मध्यम पाऊस पडेल असा अंदाज वर्तवण्यात आला आहे. मात्र, काही ठिकाणी जोरदार सरी कोसळू शकतात. कोकण किनारपट्टीसह ठाणे, पालघर, रायगड, रत्नागिरी आणि सिंधुदुर्ग या जिल्ह्यांत मध्यम ते जोरदार पावसाचा अंदाज आहे. तसेच, उत्तर महाराष्ट्र आणि विदर्भातील नाशिक, नंदुरबार, जळगाव, धुळे, जालना, परभणी, नांदेड, भंडारा, गोंदिया, चंद्रपूर आणि गडचिरोली या जिल्ह्यांसाठी ‘यलो अलर्ट’ जारी करण्यात आला आहे.
कोल्हापूर आणि सांगली जिल्ह्यांत पावसाचा जोर वाढल्याने नद्यांच्या पातळीत वाढ झाली आहे. कोल्हापुरातील पंचगंगा नदी धोक्याची पातळी ओलांडली असून, काही भागातील बंधारे पाण्याखाली गेले आहेत. नदीकाठच्या नागरिकांना सतर्क राहण्याचा सल्ला प्रशासनाने दिला आहे. मुसळधार पावसामुळे ग्रामीण भागात पिकांचे नुकसान होण्याची शक्यता आहे. त्यामुळे शेतकऱ्यांनीही हवामान खात्याच्या सूचनांनुसार आवश्यक ती खबरदारी घ्यावी, असे आवाहन करण्यात आले आहे.
गणेशोत्सवाच्या पार्श्वभूमीवर पावसाचा वाढता जोर हा नागरिकांसाठी त्रासदायक ठरू शकतो. विशेषतः विसर्जन मिरवणुकीदरम्यान पावसामुळे अडचणी निर्माण होण्याची शक्यता आहे. प्रशासनाने आपत्कालीन यंत्रणा सज्ज ठेवली असून, नद्या, ओढे आणि धरण क्षेत्रात नागरिकांनी अनावश्यक प्रवास टाळण्याचे आवाहन करण्यात आले आहे.
राज्यातील अनेक ठिकाणी हवामान विभागाचे पथक परिस्थितीवर बारकाईने लक्ष ठेवून आहे. नागरिकांनी हवामान खात्याच्या अधिकृत अंदाजांवर विश्वास ठेवूनच प्रवास, शेती किंवा अन्य नियोजन करावे, असे आवाहन करण्यात आले आहे. एकंदरीत, राज्यात आज आणि पुढील काही दिवस पावसाचा जोर कायम राहण्याची शक्यता आहे, त्यामुळे सतर्क राहणे आणि खबरदारी घेणे आवश्यक ठरणार आहे.
