गणेश काळे हत्येप्रकरणी बंडू आंदेकर, कृष्णा आंदेकरसह नऊ जणांवर गुन्हा; कोंढवा पोलिसांची कारवाई सुरू
गणेश काळे हत्येप्रकरणी बंडू आंदेकर, कृष्णा आंदेकरसह नऊ जणांवर गुन्हा; कोंढवा पोलिसांची कारवाई सुरू
गणेश काळे हत्येप्रकरणी टोळी युद्धातून झालेल्या खुनाच्या घटनेत बंडू आंदेकर, कृष्णा आंदेकर यांच्यासह नऊ जणांवर कोंढवा पोलीस ठाण्यात गुन्हा दाखल करण्यात आला आहे. आरोपींमध्ये दोन अल्पवयीन मुलांचाही समावेश आहे.
सायली मेमाणे
पुणे २ ऑक्टोबर २०२५ : पुणे शहरातील कोंढवा परिसरात झालेल्या गणेश काळे हत्येप्रकरणी पोलिसांनी मोठी कारवाई करत बंडू आंदेकर आणि कृष्णा आंदेकर यांच्यासह नऊ जणांवर गुन्हा दाखल केला आहे. या घटनेमुळे शहरात पुन्हा एकदा टोळी युद्धाचा विषय गाजू लागला आहे. गणेश काळे याची हत्या ही दोन टोळ्यांमधील वैरातून झाल्याची प्राथमिक माहिती पोलिस तपासातून समोर आली आहे.
कोंढवा पोलीस ठाण्यात दाखल करण्यात आलेल्या या गुन्ह्यात आरोपी म्हणून बंडू आंदेकर, कृष्णा आंदेकर, आमिर खान, मयूर वाघमारे, स्वराज वाडेकर, अमन शेख, अरबाज पटेल आणि दोन अल्पवयीन मुलांचा समावेश आहे. पोलिसांकडून या सर्व आरोपींवर खून, कटकारस्थान, आणि गुन्हेगारी संघटनेत सहभाग या गंभीर कलमांखाली गुन्हा दाखल करण्यात आला आहे.
घटनेनंतर परिसरात तणावाचे वातावरण निर्माण झाले होते. कोंढवा पोलीस ठाण्याचे वरिष्ठ अधिकारी आणि गुन्हे शाखेच्या पथकाने घटनास्थळी धाव घेतली आणि सुरक्षेच्या दृष्टीने पोलिस बंदोबस्त वाढविण्यात आला. प्राथमिक तपासात उघड झाले आहे की गणेश काळे आणि आरोपी यांच्यात काही दिवसांपासून वाद सुरू होता. या वादातूनच टोळीतील सदस्यांनी गणेश काळे याची हत्या करण्याचा कट रचला होता.
पोलिसांनी घटनास्थळावरून काही पुरावे जप्त केले असून, साक्षीदारांचे जबाब नोंदविण्याचे काम सुरू आहे. आरोपींचा मागोवा घेण्यासाठी तांत्रिक तपासासह सीसीटीव्ही फुटेजचा वापर करण्यात येत आहे. पोलिसांकडून हत्येच्या पार्श्वभूमीचा आणि टोळीतील वैराचा सखोल तपास केला जात आहे.
या घटनेनंतर कोंढवा परिसरात नागरिकांमध्ये भीतीचे वातावरण निर्माण झाले आहे. काही दिवसांपासून या भागात गुन्हेगारी टोळ्यांच्या हालचाली वाढल्या असल्याची चर्चा आहे. त्यामुळे पोलिसांनी संबंधित टोळ्यांवर विशेष लक्ष ठेवले असून, शहरातील संवेदनशील भागात गस्त वाढविण्यात आली आहे.
या हत्येच्या घटनेमुळे पुणे पोलिसांच्या गुन्हे शाखेनेही स्वतंत्र तपास सुरू केला आहे. काही आरोपी आधीपासूनच गुन्हेगारी पार्श्वभूमी असलेले असून, त्यांच्याविरुद्ध पूर्वीचेही गुन्हे दाखल असल्याची माहिती मिळत आहे. पोलिसांकडून या सर्व आरोपींवर महाराष्ट्र संघटित गुन्हेगारी नियंत्रण कायदा (MCOCA) लागू करण्याचाही विचार सुरू आहे.
स्थानिक नागरिकांनी पोलिसांकडे मागणी केली आहे की या टोळ्यांवर तात्काळ कठोर कारवाई करण्यात यावी, जेणेकरून परिसरात शांतता प्रस्थापित होईल. पोलिसांनी नागरिकांना सहकार्य करण्याचे आणि कोणतीही संशयास्पद हालचाल आढळल्यास तात्काळ माहिती देण्याचे आवाहन केले आहे.
दरम्यान, कोंढवा पोलिसांकडून हत्येतील आरोपींना अटक करण्यासाठी विशेष पथके तयार करण्यात आली आहेत. काही संशयितांच्या शोधासाठी पुणे आणि आसपासच्या जिल्ह्यांमध्ये सापळे लावण्यात आले आहेत. गणेश काळे हत्या प्रकरणामुळे शहरातील कायदा-सुव्यवस्था पुन्हा चर्चेत आली आहे आणि या प्रकरणातील पुढील घडामोडींवर सर्वांचे लक्ष केंद्रीत झाले आहे.
