तरुणांसाठी मोठी संधी! ‘सेवा फर्स्ट इनोव्हेशन चॅलेंज’मध्ये महाराष्ट्रातून ३,८७८ अर्ज; १७ ऑक्टोबरपर्यंत करता येणार नोंदणी

महाराष्ट्रात ‘सेवा फर्स्ट इनोव्हेशन चॅलेंज’ स्पर्धेला प्रतिसाद. आतापर्यंत ३,८७८ अर्ज दाखल. विद्यार्थी, संशोधक, स्टार्टअप्स आणि नवकल्पकांना १७ ऑक्टोबर २०२६ पर्यंत ऑनलाइन अर्ज करता येणार.

पुणे ०९ ऑक्टोबर २०२६ :विद्यार्थ्यांपासून स्टार्टअप्स आणि संशोधकांपर्यंत सर्वांना आपल्या नवकल्पना सादर करण्याची संधी देणाऱ्या ‘सेवा फर्स्ट इनोव्हेशन चॅलेंज’ स्पर्धेला महाराष्ट्रातून चांगला प्रतिसाद मिळत आहे. या स्पर्धेसाठी राज्यातून आतापर्यंत ३,८७८ अर्ज प्राप्त झाले आहेत. इच्छुक उमेदवारांना १७ ऑक्टोबर २०२६ पर्यंत ऑनलाइन अर्ज करता येणार आहे. कौशल्य, रोजगार, उद्योजकता व नाविन्यता मंत्री मंगलप्रभात लोढा यांनी अधिकाधिक युवकांनी या स्पर्धेत सहभागी होण्याचे आवाहन केले आहे.

नवकल्पनांना मिळणार राष्ट्रीय व्यासपीठ

मंगळप्रभात लोढा यांनी मंत्रालयातील विधिमंडळ वार्ताहर कक्षात आयोजित पत्रकार परिषदेत या स्पर्धेची माहिती दिली. प्रधानमंत्री नरेंद्र मोदी यांच्या वाढदिवसानिमित्त देशभरात सुरू असलेल्या सेवा संकल्प अभियानांतर्गत केंद्रीय कौशल्य विभागाच्या माध्यमातून या बहुराज्यीय नवोपक्रम स्पर्धेचे आयोजन करण्यात आले आहे.

मुख्यमंत्री देवेंद्र फडणवीस यांच्या नेतृत्वाखाली महाराष्ट्राच्या कौशल्य, रोजगार, उद्योजकता व नाविन्यता विभागामार्फतही या उपक्रमाची अंमलबजावणी केली जात आहे. राज्यात २१ सप्टेंबर २०२६ पासून अर्ज प्रक्रिया सुरू झाली आहे.

या स्पर्धेच्या माध्यमातून युवकांना सामाजिक आणि राष्ट्रीय स्तरावरील समस्यांवर नाविन्यपूर्ण उपाय शोधण्याची संधी उपलब्ध होणार आहे. विद्यार्थ्यांच्या कल्पनांना प्रत्यक्ष प्रकल्पाचे स्वरूप देण्यासाठीही हा उपक्रम महत्त्वाचा ठरू शकतो.

कृषीपासून कृत्रिम बुद्धिमत्तेपर्यंत विविध विषय

‘सेवा फर्स्ट इनोव्हेशन चॅलेंज’मध्ये अनेक महत्त्वाच्या क्षेत्रांतील समस्या सोडवण्यासाठी प्रकल्प सादर करता येणार आहेत. त्यामध्ये कृषी, आरोग्य, महिला सुरक्षा, नागरी विकास, पर्यावरण, संरक्षण, कृत्रिम बुद्धिमत्ता, शिक्षण आणि रोजगारक्षमता या क्षेत्रांचा समावेश आहे.

शालेय आणि महाविद्यालयीन विद्यार्थ्यांसह नवोन्मेषक, विद्यार्थी गट, संशोधक, प्राध्यापक, स्टार्टअप्स, सूक्ष्म, लघु आणि मध्यम उद्योग, कंपन्या, सामाजिक संस्था तसेच शैक्षणिक व संशोधन संस्थांना या स्पर्धेत सहभागी होता येणार आहे.

या स्पर्धेसाठी वयोमर्यादा नसल्याचे मंत्री मंगलप्रभात लोढा यांनी स्पष्ट केले. त्यामुळे विविध वयोगटांतील व्यक्तींना आपल्या कल्पना मांडण्याची संधी मिळणार आहे.

ग्रामीण भागातील विद्यार्थ्यांच्या सहभागावर भर

स्पर्धेत ग्रामीण भागातील विद्यार्थ्यांचा सहभाग वाढवण्यासाठी विशेष प्रयत्न करण्यात येत आहेत. यासाठी कौशल्य विकास विभागाने पुण्यातील सृजन ट्रस्ट आणि विज्ञान भारती कोकण प्रांत यांच्यासोबत सामंजस्य करार केला आहे.

या संस्थांच्या माध्यमातून विद्यार्थ्यांमध्ये स्पर्धेबाबत जागरूकता निर्माण करणे, अधिकाधिक अर्ज मिळवणे आणि प्रकल्प तयार करण्यासाठी मार्गदर्शन करणे, अशी कामे केली जाणार आहेत.

विज्ञान भारती कोकण प्रांताच्या माध्यमातून प्रकल्प अहवाल तयार करण्यासाठी विद्यार्थ्यांना मार्गदर्शन मिळणार आहे. तर सृजन ट्रस्टच्या माध्यमातून स्पर्धेचा प्रचार आणि प्रसार करून युवक-युवतींचा सहभाग वाढवण्यावर भर दिला जाणार आहे.

ऑनलाइन अर्ज कसा कराल?

इच्छुक उमेदवारांना स्पर्धेसाठी ऑनलाइन अर्ज करता येणार आहे. अर्ज करण्यासाठी अधिकृत संकेतस्थळाला भेट द्यावी.

अधिकृत संकेतस्थळ: https://sevainnovationchallenge.in/

अर्ज प्रक्रियेत पहिल्या टप्प्यात प्राथमिक माहितीची नोंदणी करावी लागेल. त्यानंतर प्रकल्प सादर करताना आधारशी संलग्न वैयक्तिक माहिती आणि प्रकल्पासंबंधी आवश्यक तपशील भरावे लागतील. संपूर्ण प्रक्रिया ऑनलाइन पद्धतीने होणार असून उमेदवारांच्या शंकांचे निरसन करण्यासाठी संकेतस्थळावर चॅटबॉटची सुविधाही उपलब्ध असल्याचे सांगण्यात आले आहे.

अर्जासाठी अंतिम मुदत १७ ऑक्टोबर

या स्पर्धेसाठी अर्ज करण्याची अंतिम मुदत १७ ऑक्टोबर २०२६ आहे. त्यामुळे विद्यार्थ्यांनी, संशोधकांनी आणि नवकल्पकांनी मुदतीपूर्वी नोंदणी करून आपले प्रकल्प सादर करावेत, असे आवाहन करण्यात आले आहे.

युवकांच्या कल्पनांना प्रोत्साहन देणे, संशोधनाला चालना देणे आणि सामाजिक समस्यांवर तंत्रज्ञानाधारित उपाय विकसित करणे, हा या उपक्रमाचा मुख्य उद्देश आहे. विशेषतः ग्रामीण भागातील विद्यार्थ्यांना नवकल्पनांच्या क्षेत्रात संधी मिळाल्यास राज्यातील उद्योजकता आणि संशोधन परिसंस्थेला बळ मिळू शकते.