दौंड नगरपालिकेच्या निवडणुकीत ‘वेट अँड वॉच’ धोरण; उमेदवारीवर अद्याप निर्णय नाही
दौंड नगरपालिकेच्या निवडणुकीत ‘वेट अँड वॉच’ धोरण; उमेदवारीवर अद्याप निर्णय नाही
दौंड नगरपालिकेच्या निवडणुकीची रणधुमाळी सुरू असूनही प्रमुख पक्षांकडून उमेदवारी जाहीर करण्यात आलेली नाही. मुस्लिम, मागासवर्गीय आणि ख्रिश्चन मतदारसंघ निर्णायक ठरण्याची शक्यता असल्याने सामाजिक संतुलन राखणे सर्व पक्षांसाठी आव्हान ठरत आहे.
सायली मेमाणे
१२ नोव्हेंबर २०२५ : दौंड – आगामी दौंड नगरपालिकेच्या सार्वत्रिक निवडणुकीच्या पार्श्वभूमीवर शहरातील राजकीय वातावरण तापत असले तरी प्रमुख पक्षांकडून उमेदवारीची घोषणा अद्याप झालेली नाही. उमेदवारी भरण्याचा तिसरा दिवस संपला असतानाही भाजप, राष्ट्रवादी काँग्रेस (अजित पवार गट व शरद पवार गट), शिवसेना (उद्धव ठाकरे गट), रिपाइं, पीपल्स रिपब्लिकन पार्टी आणि नागरिक हित संरक्षण मंडळ या सर्व पक्षांनी ‘वेट अँड वॉच’ धोरण स्वीकारले आहे. त्यामुळे इच्छुक उमेदवारांमध्ये उत्सुकता आणि कार्यकर्त्यांमध्ये संभ्रमाचं वातावरण निर्माण झालं आहे.
भाजप आणि नागरिक हित संरक्षण मंडळ यांनी एकत्रितपणे निवडणूक लढविण्याचे संकेत दिले आहेत. या पार्श्वभूमीवर आमदार राहुल कुल आणि ज्येष्ठ नगरसेवक प्रेमसुख कटारिया यांनी बैठकींचा धडाका सुरू केला आहे. मात्र, अद्याप अधिकृत उमेदवारी जाहीर न झाल्याने कार्यकर्त्यांमध्ये असमाधान वाढत आहे. पक्षांतर्गत मतभेद आणि संभाव्य बंडाळी टाळण्यासाठी निर्णय लांबविला जात असल्याची चर्चा राजकीय वर्तुळात सुरू आहे.
दरम्यान, महाविकास आघाडीने सर्व जागांवर निवडणूक लढविण्याचा निर्णय घेतला असला तरी त्यांनीदेखील उमेदवारांची नावे जाहीर केलेली नाहीत. आघाडीतील घटक पक्षांमध्ये मतभेद असल्याने, दौंडमध्ये नवी राजकीय युती घडण्याची शक्यता नाकारता येत नाही. राष्ट्रवादी काँग्रेसच्या दोन्ही गटांनी (अजित पवार व शरद पवार) स्वतंत्र रणनीती आखण्यास सुरुवात केली आहे. अजित पवार गटाकडून प्रभागनिहाय चाचपणी विरधवल जगदाळे यांच्या नेतृत्वाखाली सुरू आहे, तर शरद पवार गट आपली स्वतंत्र भूमिका ठेऊन राजकीय समीकरणं तपासत आहे.
नगराध्यक्षपद हे ओबीसी महिला राखीव असल्याने सर्वच पक्षांत चर्चेला जोर आला आहे. या पदासाठी मराठा–कुणबी समाजातील अनेक इच्छुकांनी भाजप–नागरिक हित संरक्षण मंडळ आघाडी आणि राष्ट्रवादी काँग्रेस या दोन्हींकडून उमेदवारीची मागणी केली आहे. त्यामुळे या गटांसमोर उमेदवारी ठरविण्याचा पेच निर्माण झाला आहे. दुसरीकडे, महाविकास आघाडीने नगराध्यक्षपदासाठी आपली रणनीती गुप्त ठेवली असून, आतापर्यंत केवळ अंतर्गत चर्चाच सुरू असल्याचं समजतं.
शहरातील मुस्लिम, मागासवर्गीय आणि ख्रिश्चन मतदारसंघ निर्णायक ठरण्याची शक्यता वर्तवली जात आहे. त्यामुळे सर्वच पक्ष सामाजिक संतुलन राखण्यावर विशेष भर देत आहेत. या मतदारसंघांतील मतविभाजन निवडणुकीच्या निकालावर थेट परिणाम करू शकतं. प्रत्येक पक्ष प्रयत्न करत आहे की त्यांची उमेदवारी जातीय आणि धार्मिक संतुलन लक्षात घेऊन जाहीर केली जावी, ज्यामुळे कोणत्याही समाजाची नाराजी ओढवू नये.
राजकीय विश्लेषकांच्या मते, दौंड नगरपालिकेची ही निवडणूक चुरशीची आणि रंगतदार ठरणार आहे. सर्व पक्ष आपापले गटबांधणीचे गणित जुळवत आहेत. भाजपा-आघाडी गटाने विकासाच्या मुद्द्यावर प्रचाराची तयारी सुरू केली आहे, तर राष्ट्रवादी काँग्रेस गट स्थानिक नेतृत्व आणि संघटनशक्तीवर भर देत आहे. आघाड्यांतील अंतर्गत मतभेदामुळे शेवटच्या क्षणी नवीन समीकरणे घडू शकतात.
सध्या उमेदवारी ठरविण्यात झालेल्या विलंबामुळे इच्छुक उमेदवारांमध्ये संभ्रम आणि कार्यकर्त्यांमध्ये नाराजी दिसून येत आहे. मात्र, पक्षांतर्गत चर्चेनंतर पुढील काही दिवसांत उमेदवारांची घोषणा होण्याची शक्यता आहे. दौंड शहरातील आगामी निवडणूक राजकीय दृष्टीने महत्त्वाची मानली जात असून, येत्या काही दिवसांत येथे राजकीय हालचालींना वेग येणार आहे.
एकंदरीत, दौंड नगरपालिका निवडणूक ही सध्या “वेट अँड वॉच” टप्प्यात असली तरी, पुढील आठवड्यात राजकीय समीकरणे स्पष्ट होण्याची आणि निवडणुकीचा रंग आणखी गडद होण्याची चिन्हे दिसत आहेत.
