नाशिक सिंहस्थ कुंभमेळा: 6,042 कोटींच्या 55 कामांचे आचारसंहितेपूर्वी भूमिपूजन व उद्घाटन
नाशिक सिंहस्थ कुंभमेळा: 6,042 कोटींच्या 55 कामांचे आचारसंहितेपूर्वी भूमिपूजन व उद्घाटन
नाशिकमध्ये सिंहस्थ कुंभमेळ्याच्या तयारीला वेग आला असून, आचारसंहिता लागू होण्यापूर्वीच 6,042 कोटींच्या खर्चातील 55 प्रकल्पांचे उद्घाटन होणार आहे. मुख्यमंत्री देवेंद्र फडणवीस आणि मंत्रिमंडळातील प्रमुख सदस्य यांच्या उपस्थितीत हे काम पार पडणार आहे.
सायली मेमाणे
पुणे २ ऑक्टोबर २०२५ : नाशिक : नाशिकमध्ये 2027 मध्ये होणाऱ्या सिंहस्थ कुंभमेळ्याच्या तयारीला आता गती मिळाली आहे. स्थानिक स्वराज्य संस्थांच्या निवडणुकीची आचारसंहिता लागू होण्यापूर्वीच कुंभमेळ्याशी संबंधित 55 महत्त्वाच्या प्रकल्पांचे उद्घाटन आणि भूमिपूजन करण्याची तयारी सुरू झाली आहे. या कामांसाठी एकूण 6,042 कोटी रुपयांचा खर्च अपेक्षित आहे.
कुंभमेळा प्राधिकरणाने या सर्व कामांची यादी तयार केली असून, त्यात रस्ते, पाणीपुरवठा, वीज, आरोग्य सुविधा, वाहतूक व्यवस्थापन, नदी स्वच्छता, सुरक्षा नियंत्रण केंद्र आणि स्मार्ट शहराशी निगडित प्रकल्पांचा समावेश आहे. हे सर्व प्रकल्प कुंभमेळ्यादरम्यान लाखो भाविकांच्या सोयीसाठी आणि व्यवस्थापनाच्या दृष्टीने महत्त्वाचे ठरणार आहेत.
ही सर्व कामे लवकरात लवकर सुरू करण्यासाठी राज्य सरकारकडून गतीने नियोजन करण्यात आले आहे. येत्या काही दिवसांत मुख्यमंत्री देवेंद्र फडणवीस, तसेच मंत्रिमंडळातील डझनभर मंत्री आणि वरिष्ठ अधिकारी यांच्या उपस्थितीत या प्रकल्पांचे उद्घाटन आणि भूमिपूजन होणार आहे. कार्यक्रमाची तारीख आणि वेळ निश्चित करण्याचे काम अंतिम टप्प्यात आले आहे.
कुंभमेळा प्राधिकरणाच्या सूत्रांच्या माहितीनुसार, नाशिकच्या त्र्यंबकेश्वर परिसरात आणि गोदावरी नदीकाठी विशेष धार्मिक, वाहतूक आणि स्वच्छता प्रकल्प राबवले जातील. त्याचबरोबर, भाविकांच्या निवास व वाहतुकीसाठी तात्पुरत्या शिबिरांची उभारणी, आरोग्य केंद्रे, अग्निशमन सुविधा आणि सीसीटीव्ही नियंत्रण व्यवस्था देखील उभारली जाणार आहे.
दरम्यान, आचारसंहिता लागू होण्याआधीच या प्रकल्पांचे उद्घाटन करण्यात येणार असल्याने प्रशासन आणि राजकीय वर्तुळात चर्चा रंगली आहे. विरोधकांकडून या हालचालीवर प्रश्न उपस्थित केले जात असून, आचारसंहितेचा भंग होऊ नये म्हणून सावधगिरी बाळगण्याचे निर्देशही देण्यात आले आहेत.
राज्य सरकारकडून कुंभमेळ्याच्या आयोजनासाठी विशेष निधी मंजूर करण्यात आला आहे. तसेच, या प्रकल्पांच्या अंमलबजावणीवर नियंत्रण ठेवण्यासाठी मुख्य सचिवांच्या अध्यक्षतेखाली उच्चस्तरीय समिती स्थापन करण्यात आली आहे. कामांच्या प्रगतीचा आढावा नियमितपणे घेण्यात येईल, असे प्रशासनाकडून सांगण्यात आले आहे.
नाशिकमधील स्थानिक नागरिक आणि व्यापारी वर्गाने या कामांचे स्वागत केले असून, यामुळे शहराच्या पायाभूत सुविधांना मोठी चालना मिळेल, असा विश्वास व्यक्त करण्यात येत आहे. कुंभमेळा हा नाशिकच्या धार्मिक, सांस्कृतिक आणि आर्थिक दृष्टिकोनातून ऐतिहासिक ठरणार आहे.
