पंढरपूरात चंद्रभागा नदीला पूरजन्य स्थिती, उजनी धरणाच्या विसर्गात घट
पंढरपूर चंद्रभागा नदीला पूराचा इशारा; सलग तिसऱ्या दिवशी पाणी पातळी वाढली, प्रशासन सतर्क
चंद्रभागा नदीच्या पाणी पातळीत सलग तिसऱ्या दिवशी वाढ झाली असून उजनी धरणातील विसर्गामुळे पूरजन्य परिस्थिती निर्माण झाली आहे. विसर्गात घट झाल्याने प्रवाहात घट होण्याची शक्यता वर्तवली जात आहे.
सायली मेमाणे
पुणे 30 जुलै २०२५ : पंढरपूर शहरात चंद्रभागा नदीची पाणी पातळी सलग तिसऱ्या दिवशी वाढल्याने परिसरात पूरजन्य परिस्थिती निर्माण झाली आहे. उजनी आणि वीर धरणातून मोठ्या प्रमाणात सोडण्यात आलेल्या पाण्यामुळे चंद्रभागा नदीचा प्रवाह ८० हजार क्युसेकच्या वेगाने वाहत आहे. त्यामुळे नदीकाठच्या अनेक वसाहतींमध्ये पाणी शिरले असून स्थानिक नागरिकांमध्ये भीतीचे वातावरण निर्माण झाले आहे. प्रशासनाने दिलेल्या माहितीनुसार, उजनी धरणाचा विसर्ग १० हजार क्युसेकने कमी करण्यात आला असून नीरा-भीमा संगमावरून होणारा विसर्गही आटोक्यात आणण्यात आला आहे. त्यामुळे पुढील काही तासांत नदीच्या प्रवाहात घट होण्याची शक्यता वर्तवण्यात येत आहे. मात्र धोका पूर्णतः टळलेला नसल्यामुळे प्रशासनाकडून सतर्कता पाळण्यात येत आहे.
स्थानिक प्रशासनाने नदीकाठच्या नागरिकांना सुरक्षित स्थळी स्थलांतर करण्याचे आवाहन केले असून आपत्कालीन परिस्थितीत तातडीने मदत करता यावी यासाठी राष्ट्रीय आपत्ती निवारण पथक (NDRF), पोलीस यंत्रणा आणि नगरपरिषदेच्या कर्मचाऱ्यांना तैनात करण्यात आले आहे. नदीकाठी धोका असलेल्या भागांमध्ये बचावनौका आणि तात्पुरती मदत केंद्रे उभारण्यात आली आहेत. पंढरपूरातील संत तुकाराम महाराज पालखी मार्ग, होटगी रोड, इस्लामपूर रोड आणि इतर नाल्यालगतच्या वसाहतींमध्ये पुराचे पाणी शिरू नये म्हणून जलपंप, सॅन्ड बॅग्स आणि नाले सफाईसारखे प्रतिबंधात्मक उपाय त्वरित राबवले जात आहेत. नगरपालिकेने नियंत्रण कक्ष कार्यान्वित केले असून नागरिकांना सतत सूचना दिल्या जात आहेत.
प्रशासनाने अंदाज वर्तवला आहे की, उजनी व वीर धरणांचा विसर्ग कमी केल्याने चंद्रभागेच्या प्रवाहात आजपासून घट होऊ शकते. मात्र पूरजन्य परिस्थितीच्या पार्श्वभूमीवर प्रशासनाकडून कोणतीही जोखीम न पत्करता आवश्यक ती सर्व उपाययोजना करण्यात येत आहेत. नागरिकांनी सोशल मीडियावर अफवा पसरवू नयेत, आणि अधिकृत सूत्रांवर विश्वास ठेवावा, असे आवाहन जिल्हाधिकाऱ्यांनी केले आहे. सध्याच्या गंभीर स्थितीवर प्रशासन बारकाईने लक्ष ठेवून असून नागरिकांनी प्रशासनाच्या सूचनांचे पालन करणे आणि आवश्यक ती काळजी घेणे अत्यावश्यक आहे.
