पुणे ग्रँड टूर 2027: प्रजासत्ताक दिनी सुरुवात, रविवारी समारोप; पुण्यात आंतरराष्ट्रीय सायकल स्पर्धेची मेजवानी

पुणे जिल्ह्यात 26 ते 31 जानेवारी 2027 दरम्यान ‘पुणे ग्रँड टूर 2027’ ही आंतरराष्ट्रीय सायकल स्पर्धा रंगणार. मोशी ते बाळगंधर्व असा मार्ग, वाहतूक व सुरक्षेचे नियोजन, पर्यटन आणि क्रीडा विकासाला चालना.

पुणे 0९ एप्रिल २०२६ : पुणेकरांसाठी नववर्षाची मोठी क्रीडामेजवानी ठरणारी पुणे ग्रँड टूर 2027 ही आंतरराष्ट्रीय दर्जाची सायकल स्पर्धा 26 ते 31 जानेवारी 2027 दरम्यान पुणे जिल्ह्यात रंगणार आहे. प्रजासत्ताक दिनाच्या औचित्याने स्पर्धेचा शुभारंभ 26 जानेवारीला होणार असून समारोप 31 जानेवारी, रविवारी होणार आहे. स्पर्धेची सुरुवात आणि अंतिम टप्पा सुट्टीच्या दिवशी ठेवण्यामागे पुणेकरांना गैरसोय होऊ नये आणि नागरिकांना प्रत्यक्ष स्पर्धा अनुभवता यावी, हा उद्देश असल्याची माहिती जिल्हाधिकारी जितेंद्र डुडी यांनी दिली. जिल्हाधिकारी कार्यालयात झालेल्या प्राथमिक बैठकीत रस्ते, वाहतूक व्यवस्थापन, सुरक्षा आणि स्पर्धेच्या मार्गनिश्चितीवर सविस्तर चर्चा झाली.

या स्पर्धेचा पहिला टप्पा मोशी आंतरराष्ट्रीय कन्व्हेन्शन सेंटर येथून सुरू होऊन हिंजवडी येथे संपणार आहे. आयटी हब आणि निसर्गरम्य परिसर यांचा संगम या मार्गावर अनुभवता येणार असल्याने हा टप्पा विशेष आकर्षणाचा ठरणार आहे. पुढील टप्प्यांमध्ये बारामती–सासवड, जुन्नर–राजगुरुनगर, आळंदी–लोणावळा/खंडाळा, लोणावळा–हिंजवडी असे विविध मार्ग निश्चित करण्यात आले आहेत. अंतिम टप्पा पीसीएमसी येथून सुरू होऊन बालगंधर्व रंगमंदिर येथे समारोप होणार आहे. या संपूर्ण मार्गक्रमणात पुणे जिल्ह्याच्या ऐतिहासिक, धार्मिक आणि नैसर्गिक वैभवाची झलक एकाच व्यासपीठावर पाहायला मिळणार आहे.

स्पर्धेमुळे सासवडचा वारसा, जुन्नर आणि राजगुरुनगरचा ऐतिहासिक पट्टा तसेच लोणावळा–खंडाळ्याचा निसर्गरम्य घाट देश-विदेशातील खेळाडू आणि प्रेक्षकांना अनुभवता येणार आहे. ही स्पर्धा केवळ क्रीडा उपक्रम न राहता पुणे जिल्ह्याच्या पर्यटन, स्थानिक अर्थव्यवस्था आणि क्रीडा संस्कृतीला चालना देणारी ठरणार असल्याचा विश्वास प्रशासनाने व्यक्त केला आहे. यावर्षी झालेल्या स्पर्धेमुळे पुण्याची ओळख जागतिक स्तरावर अधोरेखित झाली असून आगामी आवृत्ती त्यापेक्षा अधिक भव्य आणि नियोजनबद्ध करण्याचा प्रयत्न सुरू आहे.

वाहतूक खोळंबा टाळण्यासाठी प्रशासनाने आतापासूनच सविस्तर नियोजन सुरू केले आहे. वाहतूक पोलिस, आरोग्य विभाग, आपत्कालीन सेवा, स्वयंसेवक आणि स्थानिक प्रशासन यांच्यात समन्वय साधून प्रत्येक टप्प्यावर सुरक्षा आणि वैद्यकीय सुविधा उपलब्ध करून दिल्या जाणार आहेत. नागरिकांच्या दैनंदिन जीवनावर कमीत कमी परिणाम होईल, यासाठी पर्यायी मार्ग, वेळापत्रक आणि सूचना वेळोवेळी जाहीर केल्या जातील. स्पर्धेमुळे पुणेकरांना आंतरराष्ट्रीय दर्जाच्या क्रीडा स्पर्धेचा अनुभव घराजवळच घेता येणार असून युवकांमध्ये सायकलिंग आणि फिटनेसबाबत प्रेरणा निर्माण होईल.

‘पुणे ग्रँड टूर 2027’ ही स्पर्धा पुण्याच्या ओळखीला नवे परिमाण देणारी ठरणार आहे. क्रीडा, पर्यटन, संस्कृती आणि आर्थिक विकास या सर्व घटकांना जोडणारा हा उपक्रम प्रशासनासाठीही महत्त्वाचा आहे. सुयोग्य नियोजन, सुरक्षितता आणि नागरिकांच्या सहभागामुळे ही स्पर्धा यशस्वी ठरेल, असा विश्वास व्यक्त केला जात आहे. जानेवारी 2027 मध्ये पुणे जिल्हा पुन्हा एकदा आंतरराष्ट्रीय क्रीडामंचावर झळकणार असून पुणेकरांसाठी हा अभिमानाचा क्षण ठरणार आहे.