पुणे-नाशिक महामार्गावर पाच तासांचा रास्ता रोको; दोन्ही बाजूला वाहनांच्या लांबच लांब रांगा
पुणे-नाशिक महामार्गावर पाच तासांचा रास्ता रोको; दोन्ही बाजूला वाहनांच्या लांबच लांब रांगा
पुणे-नाशिक महामार्गावर बिबट्या हल्ल्याच्या निषेधार्थ सुरू असलेले रास्ता रोको आंदोलन पाच तासांहून अधिक काळ सुरू आहे. दोन्ही बाजूंनी वाहनांच्या मोठ्या रांगा लागल्या असून, पालकमंत्री आणि वनमंत्री येईपर्यंत आंदोलन थांबवणार नसल्याचा इशारा आंदोलकांनी दिला आहे.
सायली मेमाणे
पुणे ३ ऑक्टोबर २०२५ : पुणे-नाशिक महामार्गावर आज सकाळपासून मोठ्या प्रमाणावर रास्ता रोको आंदोलन सुरू आहे. या आंदोलनाला पाच तासांहून अधिक वेळ झाला असून, दोन्ही बाजूंनी वाहनांच्या मोठ्या रांगा लागल्या आहेत. या आंदोलनामुळे महामार्गावरील वाहतूक पूर्णपणे ठप्प झाली असून, नागरिकांना प्रचंड अडचणींचा सामना करावा लागत आहे. पिंपरखेड येथे रोहन बोंबे या तरुणावर बिबट्याने हल्ला करून त्याचा मृत्यू झाला होता. या घटनेला २४ तास उलटून गेले असतानाही मृतदेहावर अंत्यसंस्कार झालेले नाहीत. मृतदेह अजूनही मंचर उपजिल्हा रुग्णालयात ठेवण्यात आला असून, ठोस उपाययोजना होईपर्यंत तो ताब्यात घेणार नसल्याची भूमिका नातेवाईक आणि ग्रामस्थांनी घेतली आहे.
स्थानिकांनी प्रशासनाविरोधात संतप्त प्रतिक्रिया व्यक्त केली आहे. रोहन बोंबे यांच्या मृत्यूनंतर वनविभाग आणि प्रशासनाकडून कोणतीही ठोस कारवाई झाली नसल्याचा आरोप ग्रामस्थांनी केला. वारंवार बिबट्यांच्या हल्ल्यामुळे गावातील नागरिकांमध्ये भीतीचे वातावरण निर्माण झाले असून, या घटनेने प्रशासनाच्या निष्क्रियतेकडे लक्ष वेधले आहे. ग्रामस्थांनी स्पष्ट शब्दांत सांगितले आहे की, पालकमंत्री आणि वनमंत्री घटनास्थळी येईपर्यंत आंदोलन थांबवले जाणार नाही.
या आंदोलनामुळे पुणे आणि नाशिक या दोन्ही दिशांना जाणाऱ्या वाहनांच्या लांबच लांब रांगा लागल्या आहेत. काही ठिकाणी अन्न-पाण्याचा तुटवडा निर्माण झाला असून, प्रवाशांना महामार्गावरच ताटकळत थांबावे लागत आहे. पोलिसांनी परिस्थिती नियंत्रणात आणण्याचा प्रयत्न केला असला तरी आंदोलक ठाम आहेत. बिबट्यांच्या हल्ल्यांवर नियंत्रण ठेवण्यासाठी आणि मृतकाच्या कुटुंबाला तातडीने मदत देण्यासाठी ठोस निर्णय घेण्याची मागणी केली जात आहे.
दरम्यान, स्थानिक प्रशासनाने आंदोलनकर्त्यांशी संवाद साधण्याचा प्रयत्न सुरू केला आहे. मात्र, अद्याप कोणताही तोडगा निघालेला नाही. वाहतूक कोंडीमुळे आपत्कालीन वाहनांनाही अडथळा निर्माण झाला आहे. नागरिकांनी प्रशासनाने त्वरित उपाययोजना करून वाहतूक सुरळीत करण्याची मागणी केली आहे.
या घटनेने वनविभाग आणि प्रशासनाच्या कामकाजावर पुन्हा एकदा प्रश्नचिन्ह निर्माण केले आहे. बिबट्यांच्या सततच्या हल्ल्यामुळे ग्रामीण भागात सुरक्षा उपायांची मागणी वाढली आहे. आंदोलन किती काळ सुरू राहणार आणि सरकार यावर काय निर्णय घेते, याकडे सर्वांचे लक्ष लागले आहे.
