पुणे : बिलात १० रुपये कमी दिल्यामुळे ग्राहकाच्या डोक्यात बिअरची बाटली फोडली, तीन बार कर्मचाऱ्यांवर गुन्हा
ग्राहकाच्या डोक्यात बिअरची बाटली फोडली - पुण्यातील चैतन्य बारमधील धक्कादायक प्रकार
पुण्यातील चैतन्य बारमध्ये बिलाच्या वादातून ग्राहकाच्या डोक्यात बिअरची बाटली फोडल्याची घटना. तीन बार कर्मचाऱ्यांवर सिंहगड रोड पोलिस ठाण्यात गुन्हा दाखल.
सायली मेमाणे
पुणे २४ जुलै २०२५ : पुण्यातील सिंहगड रोड परिसरात असलेल्या नवले पुलाजवळील चैतन्य बारमध्ये एका तरुण ग्राहकावर गंभीर हल्ला झाल्याची धक्कादायक घटना समोर आली आहे. दारूच्या बिलात केवळ दहा रुपये कमी दिल्याचा राग बार कर्मचाऱ्यांनी इतका मनावर घेतला की त्यांनी ग्राहकाला शिवीगाळ करून बेदम मारहाण केली. एवढ्यावरच न थांबता, त्याच्या डोक्यावर बिअरची बाटली फोडून गंभीर इजा केली.
ही घटना पोलिसांकडे तक्रार दाखल झाल्यानंतर उजेडात आली. नऱ्हे येथील मानाजीनगर येथे राहणाऱ्या पीडित तरुणाने सिंहगड रोड पोलिस ठाण्यात तक्रार दिली असून त्यावरून पोलिसांनी चैतन्य बारमधील तीन कर्मचाऱ्यांविरोधात गुन्हा दाखल केला आहे.
या हल्ल्यामुळे स्थानिक नागरिकांमध्ये संतापाची लाट पसरली असून बारमधील सुरक्षेच्या पातळीबाबत प्रश्नचिन्ह उपस्थित केले जात आहेत. अल्पशा पैशांवरून इतक्या टोकाची हिंसक प्रतिक्रिया दाखवणे अत्यंत निंदनीय आहे, अशी भावना सोशल मीडियावर व्यक्त केली जात आहे.
पोलिसांनी संबंधित कर्मचाऱ्यांविरोधात भारतीय दंड विधानाच्या संबंधित कलमांअंतर्गत आणि हाणामारीसाठी जबाबदार धरून गुन्हा नोंदवला आहे. पुढील तपास सुरु आहे.
