पुणे वडगाव मावळातील कुख्यात गुंड किरण मोहिते टोळीवर मोक्का कारवाई; ७ आरोपींवर गुन्हेगारी थरकाप
पुणे वडगाव मावळातील कुख्यात गुंड किरण मोहिते टोळीवर मोक्का कारवाई; ७ आरोपींवर गुन्हेगारी थरकाप
पुणे वडगाव मावळ परिसरात दहशत माजवणाऱ्या किरण मोहिते व त्याच्या ६ साथीदारांवर मोक्का अंतर्गत कारवाई. खंडणी, मारामारी, खुनाचा प्रयत्नासह ९ गंभीर गुन्ह्यांमुळे विशेष पोलीस आयजी सुनील फुलारी यांनी दिली मंजुरी.
सायली मेमाणे
पुणे २५ ऑगस्ट २०२५ : पुणे जिल्ह्यातील वडगाव मावळ परिसरात कुख्यात गुंड म्हणून ओळखल्या जाणाऱ्या किरण मोहिते आणि त्याच्या सहा साथीदारांवर महाराष्ट्र संघटित गुन्हेगारी नियंत्रण कायदा (मोक्का) अंतर्गत कारवाई करण्यात आली आहे. या टोळीने केवळ मावळच नव्हे तर सातारा आणि रायगड जिल्ह्यातही गंभीर गुन्ह्यांची मालिका घडवली होती. या कारवाईसाठीचा प्रस्ताव पोलिस अधीक्षक संदीपसिंग गिल यांच्या मार्गदर्शनाखाली तयार करण्यात आला होता, तर कोल्हापूर परिक्षेत्राचे विशेष पोलीस महानिरीक्षक सुनील फुलारी यांनी त्याला मंजुरी दिली.
गुंड किरण एकनाथ मोहिते (वय २९, रा. जांभुळ, मावळ) हा या टोळीचा प्रमुख असून त्याच्यासोबत एकनाथ अर्जुन मोहिते (वय ५३), रवींद्र लक्ष्मण मोहिते (वय ३३), मयूर उर्फ चण्या मोढवे (वय २६), करण रमेश पवार (वय २५), सुशांत अनिल साबळे (वय २४) यांचा समावेश आहे. या टोळीने परिसरात निर्माण केलेली दहशत इतकी होती की स्थानिक रहिवासी व व्यापारी सतत भयभीत राहत होते.
मोहित टोळीवर मारामारी करणे, खुनाचा प्रयत्न करणे, खंडणी उकळणे, जबरी चोरी, डॉक्टरांवर हल्ला, कट करून खंडणी मिळवण्यासाठी खुनाचा प्रयत्न असे नऊ गंभीर गुन्हे नोंदले गेले आहेत. यामध्ये सर्वात चर्चित प्रकरण म्हणजे १० नोव्हेंबर २०२४ रोजी वडगाव मावळ येथील एका हॉटेलमध्ये झालेला हल्ला. या प्रकरणी संतोष रामभाऊ साळुंखे यांच्यावर किरण मोहिते आणि त्याच्या साथीदारांनी जीवघेणा हल्ला केला होता. याबाबत शाहरुख हनिफ अत्तार यांनी तक्रार दिल्यानंतर पोलिसांनी या गुन्ह्याचा तपास सुरू केला. या घटनेत सात आरोपी सामील असल्याचे उघडकीस आले.
पोलिसांनी या प्रकरणी पाच आरोपींना अटक केली असून, ते न्यायालयीन कोठडीत आहेत. उपनिरीक्षक आर. आर. मोहिते यांनी सातही आरोपींविरुद्ध न्यायालयात आरोपपत्र दाखल केले आहे. त्यानंतर गुन्ह्यांचे गांभीर्य लक्षात घेऊन मोक्का अंतर्गत कारवाईचा प्रस्ताव तयार करण्यात आला आणि त्याला वरिष्ठ अधिकाऱ्यांनी मंजुरी दिली.
ही कारवाई पोलीस अधीक्षक संदीपसिंग गिल, अपर पोलीस अधीक्षक रमेश चोपडे यांच्या मार्गदर्शनाखाली करण्यात आली. तपासासाठी उपविभागीय पोलीस अधिकारी गजानन टोम्पे कार्यरत आहेत. वडगाव मावळ पोलीस ठाण्याचे निरीक्षक कुमार कदम, पोलीस निरीक्षक अविनाश शिळीमकर, तसेच इतर पोलिस कर्मचाऱ्यांनी या कारवाईत महत्त्वपूर्ण भूमिका बजावली.
स्थानिक नागरिकांच्या मते, या टोळीमुळे व्यापारी, डॉक्टर आणि सामान्य नागरिकांना खंडणी व दहशतीचा सामना करावा लागत होता. मोहिते टोळीवर कारवाई झाल्याने नागरिकांनी पोलिसांचे कौतुक केले असून परिसरात दिलासा निर्माण झाला आहे.
गुन्हेगारी टोळ्यांवर कठोर कारवाई करण्याचा निर्णय हा प्रशासनाचा मोठा पाऊल मानला जात आहे. यामुळे मावळ परिसरातील कायदा व सुव्यवस्था मजबूत होईल, तसेच भविष्यात अशा टोळ्यांना आळा बसेल, अशी अपेक्षा व्यक्त केली जात आहे.
