बाजीराव पेशवे यांच्या पुतळ्याचे अमित शहा यांच्या हस्ते अनावरण; वंशज शादाब अली बहादुर पेशवे संतप्त
बाजीराव पेशवे यांच्या पुतळ्याचे अमित शहा यांच्या हस्ते अनावरण वंशज शादाब अली बहादुर पेशवे संतप्त
अमित शहा यांच्या हस्ते बाजीराव पेशवे पुतळ्याचे अनावरण; वंशज शादाब अली बहादुर यांना व्यासपीठावर न दिलेल्या जागेमुळे संताप.
सायली मेमाणे
पुणे ४ जुलै २०२५ : पुणे शहरात शुक्रवारी (४ जुलै २०२५) केंद्रीय गृहमंत्री अमित शहा यांच्या उपस्थितीत बाजीराव पेशवे यांच्या अश्वारूढ पुतळ्याचे अनावरण करण्यात आले. एनडीएम मैदानात पार पडलेल्या या अनावरण सोहळ्यासाठी सुरक्षा व्यवस्था कडक ठेवण्यात आली होती आणि अनेक मान्यवर उपस्थित होते. मात्र या सोहळ्याला एक वेगळा वाद निर्माण झाला — कारण बाजीराव मस्तानी यांचे आठवे वंशज शादाब अली बहादुर पेशवे यांनी आयोजकांविरोधात नाराजी व्यक्त केली.
शादाब अली बहादुर पेशवे यांनी स्पष्टपणे सांगितले की त्यांना या कार्यक्रमाचे निमंत्रण खूप उशिरा मिळाले आणि सर्वात मोठी खंत म्हणजे व्यासपीठावर त्यांना बसण्याची संधीच मिळाली नाही. त्यांच्या मते, बाजीराव पेशवे यांचे थेट रक्तसंबंध असलेले वंशज असूनही त्यांना दुर्लक्षित केले गेले हे अपमानास्पद आहे. “शेर का बच्चा शेर होता है या बकरी का बच्चा शेर होता है?” असा थेट सवाल त्यांनी आयोजकांना विचारत आपली संतप्त भावना व्यक्त केली.
ते पुढे म्हणाले की, “मी पेशव्यांच्या रक्ताचा वंशज आहे. मला वादग्रस्तपणे मागे ठेवून ज्या व्यक्तीला व्यासपीठावर स्थान दिलं — ते पुष्कर पेशवे दत्तक पुत्र आहेत. हा फरक उपस्थित मान्यवरांनी आणि उपस्थितांनी समजून घेतला पाहिजे.” शादाब यांनी असेही सांगितले की, “अमित शहा यांच्यासारख्या इतिहास व संस्कृतीचा आदर करणाऱ्या व्यक्तीस ही बाब निश्चितच आवडली नसती.”
या घटनेवर उपस्थित काही पाहुण्यांनी व सामाजिक कार्यकर्त्यांनीही प्रतिक्रिया दिली असून, वंशज म्हणून शादाब अली बहादुर यांना अशा कार्यक्रमात स्थान न देणे योग्य नव्हते, असे मत व्यक्त केले आहे. शहरातील ऐतिहासिक परंपरा आणि पेशव्यांच्या वारशाचा सन्मान राखण्याची जबाबदारी प्रत्येक कार्यक्रम आयोजकांची असते, असेही मत काही जाणकारांनी मांडले.
पुणे हे ऐतिहासिकदृष्ट्या पेशवे कालखंडाचे केंद्रस्थान आहे. अशा पारंपरिक आणि ऐतिहासिक स्मारकाच्या अनावरण सोहळ्यात पेशवे घराण्याचे थेट वारसदार दुर्लक्षित केल्याने वादाला तोंड फुटले आहे. यावर आयोजकांकडून अजून कोणतीही अधिकृत प्रतिक्रिया देण्यात आलेली नाही.
अखेर, इतिहासातील प्रतिष्ठित व्यक्तिमत्त्वांच्या स्मरणार्थ होणाऱ्या कार्यक्रमात वंशजांना योग्य सन्मान मिळणं अपेक्षितच असतं. अन्यथा, अशा घटना भविष्यातील कार्यक्रमांमध्येही सामाजिक असंतोष निर्माण करू शकतात.
