बेंगळुरूतील सॉफ्टवेअर इंजिनिअर शिल्पाची आत्महत्या; हुंडा आणि रंगावरून छळाचा आरोप
बेंगळुरूतील सॉफ्टवेअर इंजिनिअर शिल्पाची आत्महत्या; हुंडा आणि रंगावरून छळाचा आरोप
बेंगळुरूमधील 27 वर्षीय सॉफ्टवेअर इंजिनिअर शिल्पाने हुंड्यासाठी आणि रंगावरून होणाऱ्या मानसिक छळाला कंटाळून आत्महत्या केली. कुटुंबाने पती व सासरच्यांवर गंभीर आरोप केले.
सायली मेमाणे
पुणे २९ ऑगस्ट २०२५ : बेंगळुरूमधील एका 27 वर्षीय सॉफ्टवेअर इंजिनिअरने हुंडा आणि रंगावरून होणाऱ्या सततच्या मानसिक छळाला कंटाळून आत्महत्या केली आहे. शिल्पा असे या तरुणीचे नाव असून, ती एका आयटी कंपनीत काम करत होती. तिचा मृतदेह घरात गळफास घेतलेल्या अवस्थेत सापडल्याने परिसरात खळबळ माजली आहे. या घटनेनंतर तिच्या कुटुंबियांनी तिचा पती प्रवीण आणि सासरच्या लोकांविरुद्ध पोलिसांत तक्रार दाखल केली आहे.
शिल्पाचे लग्न अडीच वर्षांपूर्वी प्रवीण नावाच्या युवकासोबत झाले होते. लग्नाच्या वेळी प्रवीणच्या कुटुंबाने 15 लाख रुपये रोख, 150 ग्रॅम सोन्याचे दागिने आणि घरगुती साहित्याची मागणी केली होती. शिल्पाच्या आई-वडिलांनी ही मागणी पूर्ण केली होती. मात्र, लग्नानंतर काही महिन्यांतच तिच्यावर अधिक हुंडा आणि मौल्यवान वस्तूंच्या मागण्या सुरू झाल्या. तिच्या कुटुंबाने दिलेल्या माहितीनुसार, प्रवीणने एक वर्षानंतर नोकरी सोडून खाद्य व्यवसाय सुरू केला. त्यासाठी त्याच्या कुटुंबाने शिल्पाच्या आई-वडिलांकडून पाच लाख रुपये आणण्याची मागणी केली. अखेर ही रक्कम दिली गेली, तरी शिल्पाला शांतता लाभली नाही.
या आर्थिक छळासोबतच शिल्पाला रंगावरूनही अपमानास्पद टोमणे मारले जात होते. तक्रारीनुसार, तिच्या सासूने तिला वारंवार “तू काळी आहेस, माझ्या मुलासाठी योग्य जोडी नाहीस. त्याला सोडून दे, आम्ही दुसरी वधू शोधतो,” असे म्हणत मानसिक त्रास दिला होता. अशा प्रकारचे वक्तव्य ऐकून शिल्पा खूप खचली होती. या सर्व घटनांमुळे ती गंभीर नैराश्यात गेल्याचे तिच्या जवळच्या लोकांनी सांगितले.
शिल्पाला एक दीड वर्षांचे बाळ आहे. त्यामुळे तिच्या आत्महत्येने सर्वांना धक्का बसला आहे. तिच्या कुटुंबाचा आरोप आहे की, सततच्या छळामुळे आणि अपमानामुळेच तिने आपले जीवन संपवले. पोलिसांनी या प्रकरणी हुंड्यासाठी छळ आणि अपघाती मृत्यूचा गुन्हा दाखल केला आहे. पती प्रवीणला पोलिसांनी चौकशीसाठी ताब्यात घेतले असून, सासरच्या मंडळींचीही कसून चौकशी सुरू आहे.
या घटनेने पुन्हा एकदा समाजातील हुंडा प्रथेचे विदारक वास्तव आणि महिलांविरुद्ध होणारा भेदभाव समोर आणला आहे. रंग, रूप आणि हुंड्याच्या नावाखाली महिलांवर होणारा छळ अजूनही सुरू असल्याचे या घटनेवरून स्पष्ट होते. शिल्पाच्या मृत्यूने अनेक प्रश्न उपस्थित केले असून, तिच्यासाठी न्याय मिळावा अशी मागणी सोशल मीडियावर मोठ्या प्रमाणावर होत आहे.
