भाजप खासदार मेधा कुलकर्णी रुग्णालयात दाखल; निवडणुकीच्या तोंडावर फायरब्रँड नेत्यांची प्रकृती बिघडली
भाजप खासदार मेधा कुलकर्णी रुग्णालयात दाखल; निवडणुकीच्या तोंडावर फायरब्रँड नेत्यांची प्रकृती बिघडली
निवडणुका जवळ येत असताना संजय राऊत, नवनीत राणा यांच्यानंतर आता भाजप खासदार मेधा कुलकर्णी रुग्णालयात दाखल. सोशल मीडियावरून त्यांनी प्रकृती अस्वस्थ असल्याची माहिती कार्यकर्त्यांना दिली.
सायली मेमाणे
६ ऑक्टोबर २०२५ : राज्यात निवडणुकीची धामधूम सुरू असताना एकामागून एक फायरब्रँड नेत्यांची प्रकृती बिघडण्याच्या बातम्या समोर येत आहेत. काही दिवसांपूर्वी शिवसेनेचे खासदार संजय राऊत आणि त्याआधी भाजप नेत्या नवनीत राणा रुग्णालयात दाखल झाल्याची माहिती समोर आली होती. त्यानंतर आता पुण्याच्या राज्यसभेच्या खासदार मेधा कुलकर्णी यांची प्रकृती अचानक बिघडल्याने त्यांना तातडीने रुग्णालयात दाखल करण्यात आले आहे. निवडणुका अगदी जवळ असताना या सलग घडणाऱ्या घटनांमुळे राजकीय वर्तुळातही चर्चा रंगल्या आहेत.
मेधा कुलकर्णी यांनी स्वतः सोशल मीडियावर पोस्ट करत आपल्या प्रकृतीबद्दल माहिती दिली. त्यांनी लिहिले आहे की, “प्रकृती अस्वस्थतेमुळे मी उपचारार्थ रुग्णालयामध्ये दाखल झाले आहे. काही दिवस आपणांच्या संपर्कात राहू शकणार नाही. काही काम असल्यास माझ्या कार्यालयाशी संपर्क साधावा. प्रकृतीत सुधारणा झाल्यावर लवकरच भेटू.” मात्र त्यांना नेमका कोणता आजार झाला आहे याबाबत अद्याप कोणतीही अधिकृत माहिती उपलब्ध झालेली नाही. त्यांच्या पोस्टमुळे समर्थक आणि कार्यकर्त्यांमध्ये चिंता व्यक्त होत असून लवकर बरे होण्याच्या शुभेच्छाही मोठ्या प्रमाणात व्यक्त केल्या जात आहेत.
दरम्यान, शिवसेनेचे खासदार संजय राऊत हेही काही दिवसांपूर्वी हॉस्पिटलमध्ये दाखल झाले होते. सुरुवातीला हे फक्त नियमित वैद्यकीय तपासणीसाठी असल्याचे सांगितले जात होते, मात्र नंतर त्यांच्या प्रकृतीबाबत गंभीर माहिती समोर आली. त्यांनी सोशल मीडियावरूनच कळवले की, चार महिने आपण सार्वजनिक जीवनात उपलब्ध राहणार नाही. त्यांच्या आरोग्यासंदर्भातील या संदेशाने शिवसेनेच्या कार्यकर्त्यांमध्ये मोठी खळबळ उडाली होती.
त्याचप्रमाणे, स्वतंत्र खासदार नवनीत राणा याही काही दिवसांपूर्वी प्रकृती बिघडल्याने रुग्णालयात दाखल झाल्या. त्यांच्यावर उपचार सुरू असून त्यांच्या रुग्णालयातील काही छायाचित्रे सोशल मीडियावर व्हायरल झाली होती. नवनीत राणा यांच्याही प्रकृतीबाबत अधिकृत तपशील समोर आला नसला तरी त्या हळूहळू बऱ्या होत असल्याची माहिती त्यांच्या जवळच्या सूत्रांनी दिली होती.
एकाच वेळी राज्यातील तीन प्रभावी नेते आजारी पडल्याने राजकीय वर्तुळात विविध चर्चांना सुरूवात झाली आहे. निवडणूक पूर्व मोहीम, जोरदार प्रवास, सततचा ताण आणि व्यस्त कामकाजामुळे नेत्यांच्या आरोग्यावर परिणाम होत असल्याचे तज्ज्ञांचे मत आहे. निवडणुकीचा काळ हा कोणत्याही पक्षासाठी अत्यंत महत्त्वाचा असतो. प्रचार मोहीम, सभा, दौरे, रणनीती तयार करणे या सर्व गोष्टींमुळे नेते सतत कामात व्यस्त असतात. अशा वेळी अचानक प्रकृती बिघडल्यास कार्यकर्त्यांमध्ये अनिश्चितता निर्माण होऊ शकते.
मेधा कुलकर्णी यांच्या बाबतीतही पक्षातल्या अनेक नेत्यांनी त्यांच्या प्रकृतीत लवकर सुधारणा व्हावी अशी अपेक्षा व्यक्त केली आहे. आगामी काळात निवडणुका जवळ आल्याने भाजपकडून मोठ्या प्रमाणात प्रचार मोहीम राबवली जाणार आहे. अशा वेळी महत्त्वाच्या नेत्यांची अनुपस्थिती प्रचाराच्या रणनीतीवर परिणाम करू शकते, अशी चर्चा राजकीय निरीक्षक करत आहेत.
संजय राऊत, नवनीत राणा आणि आता मेधा कुलकर्णी—या तिघांचेही राजकारणात महत्त्वाचे स्थान आहे. त्यामुळे त्यांची प्रकृती बिघडल्याच्या सलग बातम्यांनी राजकीय वातावरणात वेगवेगळे अंदाज व्यक्त होत आहेत. मात्र, सध्या तिघांवरील उपचार सुरू असून सर्वजण लवकर बरे व्हावेत, अशीच जनतेची इच्छा आहे.
