मराठा युवकांच्या शिक्षण व रोजगारासाठी सरकार कटिबद्ध ‘सारथी’च्या कार्याचे मुख्यमंत्री देवेंद्र फडणवीसांकडून कौतुक
मराठा युवकांच्या शिक्षण व रोजगारासाठी सरकार कटिबद्ध ‘सारथी’च्या कार्याचे मुख्यमंत्री देवेंद्र फडणवीसांकडून कौतुक
मुख्यमंत्री देवेंद्र फडणवीस यांनी सारथी संस्थेच्या कार्याचे कौतुक करत मराठा समाजातील युवकांच्या शिक्षण, कौशल्य विकास आणि रोजगारासाठी सरकार कटिबद्ध असल्याचे सांगितले. UPSC, MPSC यश, शुल्क सवलत आणि ‘निपुण सेतू’ उपक्रमाबाबतही महत्त्वपूर्ण घोषणा.
पुणे २७ जून २०२६ : मराठा समाजातील युवकांना शिक्षण, कौशल्य विकास आणि रोजगाराच्या अधिकाधिक संधी उपलब्ध करून देण्यासाठी राज्य सरकार कटिबद्ध असल्याची ग्वाही मुख्यमंत्री देवेंद्र फडणवीस यांनी दिली. पुण्यातील गणेश कला क्रीडा मंच येथे छत्रपती शाहू महाराज संशोधन, प्रशिक्षण व मानव विकास संस्था (सारथी) आयोजित स्पर्धा परीक्षांमध्ये यशस्वी झालेल्या विद्यार्थ्यांच्या सत्कार सोहळ्यात ते बोलत होते. यावेळी त्यांनी सारथी संस्थेच्या कार्याचे कौतुक करत शिक्षण, प्रशिक्षण, उद्योजकता आणि आधुनिक कौशल्य विकासासाठी सरकार विविध योजना राबवत असल्याची माहिती दिली.
मुख्यमंत्री फडणवीस यांनी सांगितले की, सारथी संस्थेच्या माध्यमातून आतापर्यंत 140 विद्यार्थ्यांनी केंद्रीय लोकसेवा आयोग (UPSC) परीक्षेत, तर 1,124 विद्यार्थ्यांनी महाराष्ट्र लोकसेवा आयोग (MPSC) परीक्षेत यश मिळवले आहे. याशिवाय 500 हून अधिक युवक-युवतींनी बँकिंग क्षेत्रात यश संपादन केले असून, विविध कौशल्य विकास प्रशिक्षणांमधून 13 हजारांहून अधिक युवक रोजगारक्षम झाले आहेत. दोन लाखांहून अधिक विद्यार्थ्यांना विविध प्रशिक्षणांचा लाभ मिळाल्याची माहितीही त्यांनी दिली.
मराठा समाजातील आर्थिक आणि शैक्षणिकदृष्ट्या मागास विद्यार्थ्यांना मुख्य प्रवाहात आणण्यासाठी शिक्षण, प्रशिक्षण आणि रोजगार या तीन प्रमुख घटकांवर आधारित धोरण राबविण्यात येत असल्याचे मुख्यमंत्र्यांनी स्पष्ट केले. व्यावसायिक शिक्षण घेणाऱ्या विद्यार्थ्यांसाठी शैक्षणिक शुल्कात 50 टक्के सवलत देण्याचा निर्णय घेण्यात आला असून, मोठ्या शहरांमध्ये शिक्षण घेणाऱ्या विद्यार्थ्यांसाठी वसतिगृह सुविधा आणि भाऊसाहेब पंजाबराव देशमुख निर्वाह भत्ता योजनेअंतर्गत 60 हजार रुपयांपर्यंत आर्थिक सहाय्य उपलब्ध करून देण्यात येत आहे.
उद्योजकतेला चालना देण्यासाठी अण्णासाहेब पाटील आर्थिक मागास विकास महामंडळ अधिक सक्षम करण्यात आले असून, व्याज सवलतीच्या योजनांमुळे आतापर्यंत सुमारे 1.75 लाखांहून अधिक उद्योजक तयार झाले आहेत. या माध्यमातून साडेसात हजार कोटी रुपयांपेक्षा अधिक कर्ज वितरित करण्यात आले असून राज्य सरकार दरवर्षी 1,500 कोटी रुपयांचा निधी उपलब्ध करून देत असल्याचेही त्यांनी सांगितले.
मुख्यमंत्री फडणवीस यांनी विद्यार्थ्यांना बदलत्या काळानुसार आधुनिक तंत्रज्ञान आत्मसात करण्याचे आवाहन केले. कृत्रिम बुद्धिमत्ता (AI), संगणक तंत्रज्ञान, भाषा प्रयोगशाळा, ड्रोन तंत्रज्ञान आणि टूल लॅब यांसारख्या नव्या क्षेत्रांमध्ये मोठ्या प्रमाणावर रोजगाराच्या संधी निर्माण होत असल्याचे त्यांनी नमूद केले. शेती क्षेत्रातही कृत्रिम बुद्धिमत्तेवर आधारित ‘महाविस्तार’ अॅप सुरू करण्यात आले असून सुमारे 50 लाख शेतकरी त्याचा वापर करत असल्याची माहिती त्यांनी दिली. तसेच ड्रोन पायलट प्रशिक्षणाची सुविधाही सारथीच्या माध्यमातून उपलब्ध करून देण्यात आली आहे.
स्पर्धा परीक्षांमध्ये गुणवत्तेने पात्र ठरूनही जागा कमी असल्यामुळे नियुक्ती न मिळालेल्या विद्यार्थ्यांसाठी ‘निपुण सेतू’ हा नवीन उपक्रम सुरू करण्यात येणार असल्याची घोषणाही मुख्यमंत्र्यांनी केली. या उपक्रमाच्या माध्यमातून पात्र उमेदवारांना खासगी क्षेत्रात रोजगाराच्या संधी उपलब्ध करून दिल्या जाणार असून त्यांच्या प्रशिक्षणाचा संपूर्ण खर्च राज्य सरकार उचलणार आहे. तसेच सारथी आणि अण्णासाहेब पाटील आर्थिक मागास विकास महामंडळाची कार्यालये एकत्र आणून विद्यार्थ्यांना एकाच ठिकाणी सर्व सुविधा उपलब्ध करून देण्याचा विचार सुरू असल्याचेही त्यांनी स्पष्ट केले.
Follow us on our social media handles:
Instagram – https://www.instagram.com/newsdotz/
YouTube – https://www.youtube.com/@NewsDotz
Facebook – https://www.facebook.com/NewsDotz/
Twitter – https://x.com/NewsDotz
Also Read: Pune’s Latest Information
FacebookWhatsAppXTelegramThreadsLinkedInGmailShare
About The Author
