मीठी नदी गाळ प्रकरणात ईडीची एंट्री, बीएमसी अधिकाऱ्यांची चौकशी सुरू

बीएमसीच्या मीठी नदीतील गाळ प्रकरणात आर्थिक गैरव्यवहाराच्या तपासासाठी ईडीने हस्तक्षेप केला आहे. बीएमसी अधिकारी, ठेकेदार आणि इतरांवर धनशोधनाचा संशय.
सायली मेमाणे,

पुणे २३ मे २०२४ : मुंबईतील मीठी नदीतील गाळ काढण्याच्या कामात मोठ्या प्रमाणावर आर्थिक गैरव्यवहार झाल्याचा आरोप असून, आता या प्रकरणात प्रवर्तन संचालनालयाने (ईडी) हस्तक्षेप केला आहे. मुंबई महापालिकेच्या (बीएमसी) अधिकाऱ्यांसह ठेकेदार आणि इतरांविरोधात या गैरव्यवहाराशी संबंधित धनशोधन प्रकरणाची चौकशी सुरू करण्यात आली आहे.

या प्रकरणात आर्थिक गुन्हे शाखेच्या (ईओडब्ल्यू) विशेष तपास पथकाचे (एसआयटी) निरीक्षक बिलाल शेख यांनी तक्रारदार म्हणून भूमिका घेतली आहे. केंद्र सरकारच्या या तपास यंत्रणेने अद्याप अधिकृत गुन्हा दाखल केलेला नसला, तरी मुंबई पोलिसांनी दाखल केलेल्या गुन्ह्याच्या आधारावर लवकरच अधिकृत गुन्हा नोंदवण्याची शक्यता सूत्रांनी वर्तवली आहे.

ईडीकडून प्रकरणी संबंधित बीएमसी अधिकारी, ठेकेदार व इतर संबंधित व्यक्तींना लवकरच चौकशीसाठी बोलावले जाणार असल्याचे समजते. या प्रकरणात आर्थिक गुन्हे शाखेच्या एसआयटीने यापूर्वी १३ व्यक्तींविरोधात एफआयआर दाखल केला आहे, ज्यात पाच खासगी ठेकेदार, तीन बीएमसी अधिकारी, तीन बिचौलिए आणि दोन खासगी कंपन्यांचे अधिकारी यांचा समावेश आहे.

सदर गाळ काढण्याचे कंत्राट सुमारे १,१०० कोटी रुपयांचे असून, यातून मुंबई महापालिकेला ६५.५४ कोटी रुपयांचे नुकसान झाल्याचा आरोप आहे. ईडीने सुरू केलेला तपास आर्थिक गैरव्यवहार व सार्वजनिक निधीच्या वापरासंदर्भातील गंभीर प्रश्न उपस्थित करत आहे.