मीरा रोडमध्ये राजकीय पक्षांना प्रवेशबंदी; इंद्रप्रस्थ सोसायटीचा प्रचाराविरोधात ठाम पवित्रा
मीरा रोडमध्ये राजकीय पक्षांना प्रवेशबंदी; इंद्रप्रस्थ सोसायटीचा प्रचाराविरोधात ठाम पवित्रा
मीरा रोड पूर्व येथील इंद्रप्रस्थ सोसायटीतील रहिवाशांनी आवाज व ट्रॅफिक समस्यांमुळे राजकीय पक्षांच्या प्रचाराला मज्जाव केला आहे. बापा सीताराम मंदिरातील लग्नकार्यांमुळे होणाऱ्या त्रासावरून रहिवाशांचा संताप उफाळला आहे.
पुणे ३० डिसेंबर २०२५ : मुंबई महानगर परिसरातील मीरा रोडमध्ये निवडणुकीच्या पार्श्वभूमीवर एक वेगळीच राजकीय हालचाल पाहायला मिळत आहे. मीरा रोड पूर्व येथील इंद्रप्रस्थ सोसायटीमधील सुमारे ८०० रहिवाशांनी राजकीय पक्षांविरोधात उघड नाराजी व्यक्त करत आपल्या सोसायटीत प्रचारासाठी येण्यास स्पष्ट मनाई केली आहे. “इथे प्रचाराला येऊ नका” असा मजकूर असलेला बॅनर थेट सोसायटीच्या मुख्य प्रवेशद्वारावर लावण्यात आला असून, यामागील कारण केवळ राजकीय नसून दैनंदिन त्रासाशी जोडलेलं आहे.
सोसायटीसमोर असलेल्या बापा सीताराम मंदिरात होणाऱ्या लग्नसमारंभांमुळे निर्माण होणारा प्रचंड आवाज, ट्रॅफिक कोंडी आणि रात्री उशिरापर्यंत सुरू असलेला गोंगाट यामुळे रहिवासी हैराण झाले आहेत. लग्नाच्या वराती, बँड-बाजा आणि फटाक्यांमुळे अनेकदा रात्री १२.३० ते १ वाजेपर्यंत आवाज सुरू राहतो, असा आरोप रहिवाशांनी केला आहे. विशेष म्हणजे दिवाळी, नवरात्रीसारख्या सणांमध्ये रात्री १० नंतर डीजेवर बंदी असताना लग्नसमारंभांसाठी नियम डावलले जात असल्याचा दावा करण्यात आला आहे.
रहिवाशांच्या म्हणण्यानुसार, या विषयावर त्यांनी स्थानिक पोलीस आणि लोकप्रतिनिधींकडे वारंवार तक्रारी केल्या, मात्र ठोस कारवाई झालेली नाही. पोलिस काही वेळासाठी येऊन आवाज बंद करतात, पण ते निघून गेल्यानंतर पुन्हा दणदणाट सुरू होतो, असा अनुभव रहिवाशांनी मांडला आहे. यामुळे स्थानिक प्रशासन आणि राजकीय नेत्यांबद्दल तीव्र नाराजी निर्माण झाली आहे.
लग्नाच्या वरातीमुळे सोसायटीचे मुख्य प्रवेशद्वार तासन्तास बंद राहते. परिणामी वृद्ध नागरिक, रुग्ण आणि गर्भवती महिलांना रिक्षातून उतरून पायी चालावे लागते, अशी गंभीर बाबही समोर आली आहे. रुग्णवाहिकेला वेळेत प्रवेश मिळण्याबाबतही रहिवाशांनी चिंता व्यक्त केली आहे. हा त्रास केवळ सोयीपुरता मर्यादित न राहता आरोग्य आणि सुरक्षिततेचा प्रश्न बनला असल्याचं ते सांगतात.
शिक्षणावरही याचा मोठा परिणाम होत आहे. सोसायटीकडे जाणारा रस्ता पूर्वी सायलेंट झोन म्हणून घोषित करण्यात आला होता, मात्र सायलेंट झोनचे बोर्ड काढून टाकण्यात आल्याचा आरोप रहिवाशांनी केला आहे. सततच्या आवाजामुळे विद्यार्थ्यांना अभ्यास करणे अशक्य होत असून, परीक्षेच्या काळात परिस्थिती अधिकच गंभीर होते, अशी व्यथा पालकांनी मांडली आहे.
दरम्यान, या प्रकरणावर बापा सीताराम मंदिर ट्रस्टचे विश्वस्त आणि मीरा रोडमधील भाजप नेते अनिल विराणी यांनी आपली भूमिका स्पष्ट केली आहे. त्यांनी सांगितले की, मंदिर ट्रस्टकडून आतापर्यंत ४०० हून अधिक विवाह विनामूल्य लावून दिले असून हे समाजसेवेच्या उद्देशाने केले जाते. यातून कोणताही आर्थिक लाभ घेतला जात नाही, असे त्यांनी स्पष्ट केले. रहिवाशांना होत असलेल्या त्रासाबाबत चर्चा करून तोडगा काढण्याचा प्रयत्न केला जाईल, असे आश्वासनही त्यांनी दिले आहे.
निवडणुकांच्या काळात मतदारांचा हा थेट विरोध राजकीय पक्षांसाठी चिंतेचा विषय ठरत असून, स्थानिक प्रश्नांकडे दुर्लक्ष केल्यास त्याचा फटका कसा बसू शकतो याचं हे ठळक उदाहरण मानलं जात आहे.
Follow us on our social media handles:
Instagram – https://www.instagram.com/newsdotz/
YouTube – https://www.youtube.com/@NewsDotz
Facebook – https://www.facebook.com/NewsDotz/
Twitter – https://x.com/NewsDotz
Also Read: Pune’s Latest Information
FacebookWhatsAppXTelegramThreadsLinkedInGmailShare
About The Author
