मुंबईत प्रसिद्ध अभिनेत्रीला सायबर ठगांनी डिजिटल अरेस्ट करून 6.5 लाखांचा गंडा; 7 तास चालला ऑनलाइन छळ
मुंबईत प्रसिद्ध अभिनेत्रीला सायबर ठगांनी डिजिटल अरेस्ट करून 6.5 लाखांचा गंडा; 7 तास चालला ऑनलाइन छळ
मुंबईतील 26 वर्षीय टीव्ही अभिनेत्रीला सायबर फसवणूक करणाऱ्यांनी दिल्ली पोलिस अधिकारी असल्याचे भासवून डिजिटल अरेस्ट केले. 7 तास चाललेल्या या फसवणुकीत अभिनेत्रीने 6.5 लाख रुपये गमावले. ओशिवरा पोलिस ठाण्यात गुन्हा दाखल.
सायली मेमाणे
पुणे १७ ऑक्टोबर २०२५ : मुंबईत एका प्रसिद्ध टेलिव्हिजन अभिनेत्रीला सायबर ठगांनी अत्यंत चलाखीने फसवून तब्बल 6.5 लाख रुपयांचा गंडा घातल्याची धक्कादायक घटना समोर आली आहे. 26 वर्षीय या अभिनेत्रीला डिजिटल अरेस्ट करून तब्बल सात तास ऑनलाइन ठेवण्यात आले. या संपूर्ण घटनेमुळे पुन्हा एकदा सायबर गुन्ह्यांबाबत नागरिकांना सतर्कतेचा इशारा देण्यात आला आहे.
मिळालेल्या माहितीनुसार, पीडित अभिनेत्रीने अनेक बंगाली टेलिव्हिजन मालिका आणि काही हिंदी शोमध्ये काम केले असून बॉलिवूडमध्ये करिअर करण्यासाठी ती अलीकडेच मुंबईत आली होती. सध्या ती जोगेश्वरी (पश्चिम) येथे राहते. सोमवारी सकाळी तिला एका अनोळखी व्यक्तीचा फोन आला, ज्याने स्वतःला मोबाईल सर्व्हिस प्रोव्हायडर कंपनीचा अधिकारी असल्याचे सांगितले. त्याने दावा केला की, तिचा मोबाईल नंबर बेकायदेशीर बँक व्यवहारांमध्ये वापरला गेला असून लवकरच तो बंद केला जाणार आहे.
थोड्याच वेळात त्या अभिनेत्रीला एका व्हॉट्सॲप व्हिडिओ कॉलद्वारे पोलिसांच्या गणवेशातील व्यक्तीने संपर्क साधला. त्याने स्वतःची ओळख दिल्ली पोलिसांच्या सायबर क्राईम विभागातील वरिष्ठ अधिकारी अशी करून दिली. व्हिडिओ कॉलदरम्यान त्याने अभिनेत्रीला एकटीने बसून आधार कार्ड दाखवण्याचे व ओळख पडताळणीसाठी पूर्ण सहकार्य करण्याचे आदेश दिले. त्याने धमकी दिली की, तिचा नंबर व बँक खाते अनेक आर्थिक फसवणुकींशी जोडले गेले आहे आणि तिने सहकार्य केले नाही तर तिचा पासपोर्ट आणि बँक खाती गोठवली जातील.
फसवणूक करणाऱ्यांनी विश्वासार्हतेसाठी बनावट सर्वोच्च न्यायालयाचे दस्तऐवज आणि कायदेशीर नोटिसाही दाखवल्या. दबावाखाली आलेल्या अभिनेत्रीने स्वतः निर्दोष असल्याचे सिद्ध करण्यासाठी ‘टेम्पररी व्हेरिफिकेशन’च्या नावाखाली पैसे जमा करण्यास मान्यता दिली. त्यानुसार फसवणूक करणाऱ्याने दिलेल्या खात्यात तिने 6.5 लाख रुपये ट्रान्सफर केले. आरोपीने आश्वासन दिले की, एकदा पडताळणी पूर्ण झाल्यानंतर पैसे परत केले जातील.
सुमारे सात तास चाललेल्या या डिजिटल अरेस्टनंतर अभिनेत्रीला संशय आला. व्हिडिओ कॉल संपल्यानंतर तिने Truecaller वर कॉलरचा नंबर तपासला, त्यावेळी तो बनावट असल्याचे स्पष्ट झाले. फसवणुकीची जाणीव होताच, तिने तात्काळ ओशिवरा पोलिस ठाण्यात धाव घेत तक्रार नोंदवली. पोलिसांनी तत्काळ गुन्हा दाखल करून तपास सुरू केला आहे.
सायबर पोलिसांच्या मते, हे प्रकरण देशभर वाढत असलेल्या “डिजिटल अरेस्ट” फसवणुकीचे आणखी एक उदाहरण आहे. ठग स्वतःला पोलिस किंवा सरकारी अधिकारी म्हणून सादर करून भीती निर्माण करतात आणि नागरिकांकडून पैसे उकळतात. अशा कोणत्याही परिस्थितीत नागरिकांनी घाबरून न जाता, त्वरित स्थानिक पोलीस ठाण्याशी किंवा सायबर हेल्पलाइन 1930 वर संपर्क साधावा, असा सल्ला पोलिसांनी दिला आहे.
