मुंबई महापालिका निवडणूक जाहीर; ठाकरे बंधूंच्या संभाव्य युतीकडे राजकीय वर्तुळाचे लक्ष
मुंबई महापालिका निवडणूक जाहीर; ठाकरे बंधूंच्या संभाव्य युतीकडे राजकीय वर्तुळाचे लक्ष
मुंबई महापालिका निवडणुकीची घोषणा झाली असून 15 जानेवारीला मतदान, 16 जानेवारीला निकाल लागणार आहे. ठाकरे बंधूंच्या संभाव्य युतीवर राज्याचे लक्ष केंद्रित झाले आहे.
पुणे १६ डिसेंबर २०२५ : राज्य निवडणूक आयोगाने सोमवारी महाराष्ट्रातील २९ महानगरपालिकांच्या निवडणूक कार्यक्रमाची अधिकृत घोषणा केल्यानंतर राज्याच्या राजकारणात मोठी हालचाल सुरू झाली आहे. या घोषणेमध्ये मुंबई महानगरपालिकेचाही समावेश असून, मुंबईसाठी १५ जानेवारी रोजी मतदान तर १६ जानेवारी २०२६ रोजी मतमोजणी व निकाल जाहीर होणार आहे. निवडणुकीसाठी अवघा एक महिना शिल्लक राहिल्याने सर्व प्रमुख राजकीय पक्षांनी तयारीला वेग दिला आहे.
मुंबई महापालिका ही देशातील सर्वात श्रीमंत आणि राजकीयदृष्ट्या महत्त्वाची महापालिका मानली जाते. त्यामुळे येथील निवडणूक केवळ स्थानिक स्वराज्य संस्थेपुरती मर्यादित न राहता, आगामी राज्य राजकारणाची दिशा ठरवणारी ठरणार आहे. याच पार्श्वभूमीवर सत्ताधारी महायुती, महाविकास आघाडी तसेच इतर पक्षांनी आपापल्या रणनिती आखण्यास सुरुवात केली आहे.
या निवडणुकीत सर्वाधिक लक्ष वेधले जात आहे ते ठाकरे बंधूंच्या संभाव्य युतीकडे. मनसेप्रमुख राज ठाकरे आणि ठाकरे गटाचे प्रमुख उद्धव ठाकरे यांची युती होणार का, याबाबत राजकीय वर्तुळात जोरदार चर्चा सुरू आहे. सूत्रांच्या माहितीनुसार, निवडणूक कार्यक्रम जाहीर झाल्यानंतर पुढील दोन ते तीन दिवसांत ठाकरे बंधू युतीबाबत अधिकृत घोषणा करण्याची शक्यता आहे.
काँग्रेसकडून अपेक्षित प्रतिसाद न मिळाल्यामुळे ठाकरे गटाने पर्यायी राजकीय समीकरणांचा विचार सुरू केला असल्याचेही बोलले जात आहे. त्यामुळे काही ठिकाणी युती तर काही ठिकाणी आघाडी करत ठाकरे गट महापालिका निवडणुका लढवू शकतो, असे संकेत मिळत आहेत. जर ठाकरे बंधू एकत्र आले, तर मुंबईतील राजकीय गणिते पूर्णपणे बदलू शकतात, असे राजकीय विश्लेषकांचे मत आहे.
दुसरीकडे, भाजप, शिवसेना शिंदे गट आणि राष्ट्रवादी काँग्रेस अजित पवार गट यांची महायुतीही आपली ताकद दाखवण्याच्या तयारीत आहे. मुंबईत सत्ता राखण्यासाठी महायुतीकडून मजबूत उमेदवारांची निवड, आक्रमक प्रचार आणि विकासाचा मुद्दा पुढे केला जाण्याची शक्यता आहे.
मुंबईतील २२७ जागांसाठी होणारी ही निवडणूक अत्यंत चुरशीची ठरणार आहे. यामध्ये स्थानिक प्रश्न, पायाभूत सुविधा, पुनर्विकास प्रकल्प, वाहतूक, पाणीपुरवठा आणि स्वच्छता हे मुद्दे निर्णायक ठरणार आहेत. मात्र त्याचबरोबर ठाकरे बंधूंची संभाव्य युती ही निवडणुकीतील सर्वात मोठी राजकीय घडामोड ठरण्याची चिन्हे आहेत.
आता सर्वांचे लक्ष येत्या काही दिवसांत होणाऱ्या अधिकृत घोषणांकडे लागले असून, मुंबई महापालिका निवडणूक राजकीयदृष्ट्या ऐतिहासिक ठरण्याची शक्यता नाकारता येत नाही.
Follow us on our social media handles:
Instagram – https://www.instagram.com/newsdotz/
YouTube – https://www.youtube.com/@NewsDotz
Facebook – https://www.facebook.com/NewsDotz/
Twitter – https://x.com/NewsDotz
Also Read: Pune’s Latest Information
