राज ठाकरेंचे मुख्यमंत्र्यांना पत्र: मुंबईत मुलींच्या अपहरणावर सरकार गप्प का? अधिवेशनावरून तीव्र नाराजी
राज ठाकरेंचे मुख्यमंत्र्यांना पत्र: मुंबईत मुलींच्या अपहरणावर सरकार गप्प का? अधिवेशनावरून तीव्र नाराजी
मुंबईत गेल्या 10 महिन्यांत 1,187 मुली बेपत्ता झाल्याच्या पार्श्वभूमीवर मनसे अध्यक्ष राज ठाकरे यांनी मुख्यमंत्री देवेंद्र फडणवीसांना पत्र लिहून गंभीर सवाल उपस्थित केले असून, अधिवेशनात या मुद्द्यावर चर्चा न झाल्याबद्दल संताप व्यक्त केला आहे.
पुणे १३ डिसेंबर २०२५ : मुंबईसह महाराष्ट्रात मुली आणि लहान मुलांच्या अपहरणाच्या वाढत्या घटनांवरून मनसे अध्यक्ष राज ठाकरे यांनी मुख्यमंत्री देवेंद्र फडणवीस यांना थेट पत्र लिहून सरकारच्या भूमिकेवर गंभीर प्रश्न उपस्थित केले आहेत. देशाची आर्थिक राजधानी असलेल्या मुंबईतच मुली बेपत्ता होण्याचे प्रमाण चिंताजनक पातळीवर पोहोचले असताना, विधिमंडळाच्या अधिवेशनात या मुद्द्यावर अपेक्षित चर्चा होत नसल्याने राज ठाकरे यांनी तीव्र नाराजी व्यक्त केली आहे.
राज ठाकरे यांनी पत्रात नमूद केले आहे की, गेल्या दहा महिन्यांत केवळ मुंबईतच 1,187 मुलींच्या अपहरणाचे गुन्हे दाखल झाले आहेत. याचा अर्थ दररोज सरासरी चार ते पाच मुली गायब होत आहेत. ही आकडेवारी केवळ कागदावरची नसून, प्रत्येक आकड्यामागे एका कुटुंबाचे दुःख, भीती आणि असुरक्षितता दडलेली आहे. एनसीआरबीच्या आकडेवारीनुसार 2021 ते 2024 या कालावधीत लहान मुलांच्या अपहरणाच्या घटनांमध्ये सुमारे 30 टक्क्यांनी वाढ झाली आहे, हेही त्यांनी अधोरेखित केले.
राज ठाकरे यांच्या मते, लहान मुलांना पळवून नेऊन त्यांना भीक मागायला लावणाऱ्या किंवा बालमजुरीसाठी वापरणाऱ्या आंतरराज्य टोळ्या आज सर्रासपणे कार्यरत आहेत. या टोळ्या इतक्या निर्धास्तपणे काम करत असतील तर त्यामागे कोणाचे दुर्लक्ष आहे, याचा शोध सरकारने घेतला पाहिजे, असा सवाल त्यांनी उपस्थित केला आहे. अपहरणाच्या किती केसेस दाखल झाल्या आणि त्यापैकी किती मुले सापडली, एवढी माहिती देऊन सरकार आपली जबाबदारी झटकू शकत नाही, असेही त्यांनी स्पष्ट शब्दांत सांगितले.
पत्रात त्यांनी आणखी एक महत्त्वाचा मुद्दा मांडला आहे. अनेक पालक पोलिसांकडे तक्रारच दाखल करत नाहीत, त्यामुळे प्रत्यक्षात अपहरणाच्या घटनांची संख्या अधिक असण्याची शक्यता नाकारता येत नाही. शिवाय, एखादे मूल परत सापडले तरी त्याच्या मनावर होणारा मानसिक आघात कोण भरून काढणार, असा प्रश्नही त्यांनी विचारला आहे. रस्त्यावर, रेल्वे स्थानकांवर किंवा बसस्थानकांवर भीक मागणारी लहान मुले दिसतात, ती खरोखरच त्यांच्या सोबत असलेल्या व्यक्तींचीच आहेत का, याची तपासणी करण्यासाठी डीएनए चाचणीसारखी कडक पावले उचलली जाणार का, अशी अपेक्षा त्यांनी व्यक्त केली आहे.
राज ठाकरे यांनी विधिमंडळाच्या हिवाळी अधिवेशनावरही टीका केली आहे. अधिवेशन केवळ पुरवणी मागण्या मंजूर करण्यापुरतेच मर्यादित राहिले असून, राज्यातील गंभीर सामाजिक प्रश्नांवर चर्चा होत नसल्याचे त्यांनी नमूद केले. अनेकदा मंत्री सभागृहात उपस्थित नसतात, त्यामुळे जनतेच्या प्रश्नांना न्याय मिळण्याची अपेक्षा करणेही अवघड झाले आहे, असे ते म्हणाले.
पत्राच्या शेवटी, मुख्यमंत्री आणि गृहमंत्री या नात्याने देवेंद्र फडणवीस यांनी या विषयात वैयक्तिक लक्ष घालून केवळ चर्चा नव्हे तर ठोस कृती करावी, ही महाराष्ट्राची अपेक्षा असल्याचे राज ठाकरे यांनी स्पष्टपणे मांडले आहे.
Follow us on our social media handles:
Instagram – https://www.instagram.com/newsdotz/
YouTube – https://www.youtube.com/@NewsDotz
Facebook – https://www.facebook.com/NewsDotz/
Twitter – https://x.com/NewsDotz
Also Read: Pune’s Latest Information
