रीलचा नाद अंगलट! धावत्या बाईकवर स्टंट करताना तरुणाचा भीषण अपघात, VIDEO VIRAL

सोशल मीडियावर रीलसाठी धावत्या बाईकवर स्टंट करणाऱ्या तरुणाचा भीषण अपघात झाला असून हा व्हिडिओ सध्या तुफान व्हायरल होत आहे. धोकादायक स्टंटचा धक्का बसवणारा व्हिडिओ.

पुणे 2४ जानेवारी २०२६ : सोशल मीडियाच्या युगात प्रसिद्धी मिळवण्यासाठी अनेक तरुण धोकादायक कृत्ये करताना दिसत आहेत. काही सेकंदांच्या लाईक्स, व्ह्यूज आणि शेअर्ससाठी स्वतःचा तसेच इतरांचा जीव धोक्यात घालण्याची प्रवृत्ती वाढताना दिसते. सध्या असाच एक धक्कादायक स्टंटबाजीचा व्हिडिओ सोशल मीडियावर मोठ्या प्रमाणात व्हायरल होत आहे. या व्हिडिओत धावत्या बाईकवर स्टंट करताना एका तरुणाचा तोल जाऊन तो थेट रस्त्यावर आदळल्याचे दिसत आहे.

व्हायरल होत असलेल्या या व्हिडिओमध्ये काही तरुण गावकडच्या रस्त्यावर दुचाकी चालवत मस्ती करताना दिसतात. सुरुवातीला सगळं नेहमीसारखं वाटतं, मात्र काही क्षणांतच परिस्थिती भीषण वळण घेते. बाईक चालवणारा तरुण अचानक हँडल सोडतो आणि दोन्ही पाय हवेत उचलून झोपलेल्या अवस्थेत दुचाकी चालवण्याचा धोकादायक स्टंट करतो. काही सेकंदातच त्याचा तोल जातो आणि तो जोरात रस्त्यावर कोसळतो.

अपघात इतक्यावरच थांबत नाही. मागून येणाऱ्या दुसऱ्या बाईकवरील तरुणालाही परिस्थिती हाताळता येत नाही आणि तो पडलेल्या तरुणाला जोरात धडक देत पुढे निघून जातो. या घटनेनंतर संबंधित तरुणांची नेमकी अवस्था काय झाली, याची माहिती समोर आलेली नाही. मात्र संपूर्ण प्रकार त्यांच्या मित्राने मोबाईल कॅमेऱ्यात टिपला असून हाच व्हिडिओ सध्या सोशल मीडियावर वेगाने व्हायरल होत आहे.

हा व्हिडिओ सोशल मीडिया प्लॅटफॉर्म एक्स (पूर्वीचा ट्विटर) वर @mdtanveer87 या अकाउंटवर शेअर करण्यात आला आहे. काही तासांतच या व्हिडिओला हजारो लाईक्स आणि व्ह्यूज मिळाले असून नेटकऱ्यांनी संतप्त प्रतिक्रिया दिल्या आहेत. अनेकांनी “कशाला उगाच स्टंट करून हवा करायची?” अशा शब्दांत नाराजी व्यक्त केली आहे. तर काहींनी अशा धोकादायक कृत्यांमुळे गंभीर अपघात आणि जीवितहानी होऊ शकते, याकडे लक्ष वेधले आहे.

अलीकडे अशा प्रकारच्या स्टंटबाजीच्या घटनांमध्ये सातत्याने वाढ होताना दिसते. वाहतुकीचे नियम धाब्यावर बसवून, सुरक्षिततेकडे दुर्लक्ष करून केलेले स्टंट केवळ स्टंट करणाऱ्यालाच नाही, तर रस्त्यावरून जाणाऱ्या सामान्य नागरिकांनाही धोका निर्माण करतात. काही सेकंदांची प्रसिद्धी आणि सोशल मीडिया एंगेजमेंटसाठी जीव धोक्यात घालण्याची मानसिकता चिंताजनक आहे.

हा व्हायरल व्हिडिओ केवळ मनोरंजन म्हणून पाहण्याऐवजी एक गंभीर इशारा म्हणून पाहण्याची गरज आहे. अशा घटनांमधून धडा घेऊन तरुणांनी सुरक्षिततेला प्राधान्य देणे आवश्यक आहे. अन्यथा रीलचा नाद कधी जीवावर बेततो, हे सांगता येत नाही.

Follow us on our social media handles:
Instagram – https://www.instagram.com/newsdotz/
YouTube – https://www.youtube.com/@NewsDotz
Facebook – https://www.facebook.com/NewsDotz/
Twitter – https://x.com/NewsDotz

Also Read: Pune’s Latest Information

FacebookWhatsAppXTelegramThreadsLinkedInGmailShare