वनऔषधी शोधात महाराज डोंगराकडे गेले अन् 200 फूट दरीत कोसळले; उपचाराअभावी मृत्यू, सिल्लोडमध्ये हळहळ
वनऔषधी शोधात महाराज डोंगराकडे गेले अन् 200 फूट दरीत कोसळले; उपचाराअभावी मृत्यू, सिल्लोडमध्ये हळहळ
सिल्लोड तालुक्यातील मुर्डेश्वर मंदिर परिसरात वनस्पतीच्या शोधात गेलेले कमलगिरी महाराज 200 फूट खोल दरीत कोसळले. सात तासांच्या प्रयत्नानंतरही उपचारास उशीर झाल्याने त्यांचा मृत्यू झाला.
पुणे ०७ जानेवारी २०२६ : छत्रपती संभाजीनगर जिल्ह्यातील सिल्लोड तालुक्यातून एक अत्यंत हृदयद्रावक घटना समोर आली असून वनऔषधीच्या शोधात डोंगरावर गेलेल्या एका महाराजांचा २०० फूट खोल दरीत कोसळून दुर्दैवी मृत्यू झाला आहे. मुर्डेश्वर मंदिर परिसरात ही घटना घडली असून बचावकार्याला मोठा विलंब झाल्याने उपचाराअभावी त्यांचा जीव वाचू शकला नाही, यामुळे परिसरात हळहळ व्यक्त केली जात आहे.
राजू बाबूराव राजगुरे ऊर्फ कमलगिरी महाराज (वय ५८, रा. जटवाडा, छत्रपती संभाजीनगर) असे मृत्यूमुखी पडलेल्या महाराजांचे नाव आहे. ते श्री कमलगिरी मठ देवस्थान विश्वस्त मंडळाचे सदस्य होते. जटवाडा रोडवरील हरिओमनगर परिसरात त्यांचा मठ असून धार्मिक व आध्यात्मिक क्षेत्रात त्यांची ओळख होती. हरिनाम सप्ताहानिमित्त ते केळगाव येथील मुर्डेश्वर मंदिर परिसरात आले होते.
गुरुवारी सकाळी वनऔषधीच्या शोधासाठी महाराज मुर्डेश्वरच्या डोंगराकडे एकटेच गेले होते. याच दरम्यान त्यांचा पाय घसरून ते सुमारे २०० फूट खोल दरीत कोसळले. कोसळल्यानंतरही महाराज शुद्धीत होते. दरीत अडकलेल्या अवस्थेत त्यांनी मोबाईलद्वारे पत्नी व मुलगा वैभव यांच्याशी संपर्क साधून आपली स्थिती सांगितली. मात्र, घटनास्थळ अत्यंत दुर्गम आणि अवघड असल्याने मदत पोहोचण्यास मोठा विलंब झाला.
महाराज सकाळी सुमारे ९ वाजता दरीत कोसळले होते. माहिती मिळताच परिसरातील ग्रामस्थ घटनास्थळी जमा झाले. मुर्डेश्वर येथील एकनाथ कोठाळे, समाधान कोठाळे आणि सीताराम इवरे यांनी मदतीसाठी पुढाकार घेत दरीत उतरण्याचा प्रयत्न केला. मात्र, दरीचा भूभाग अत्यंत खडतर, घसरणारा आणि धोकादायक असल्याने बचावकार्य सोपे नव्हते. ग्रामस्थांनी मिळून सुमारे २०० फुटांचा मार्ग तयार करत महाराजांना बाहेर काढण्यासाठी प्रयत्न सुरू ठेवले.
दरीत अडकलेल्या अवस्थेत महाराजांना गंभीर दुखापत झाली होती. तरीही ते पूर्ण शुद्धीत असल्याचे ग्रामस्थांनी सांगितले. मात्र, घटनास्थळी रुग्णवाहिका किंवा तत्काळ वैद्यकीय मदत पोहोचू शकली नाही. मुलगा वैभव दुपारी सुमारे ३ वाजता घटनास्थळी पोहोचला. अखेर दुपारी ४ वाजण्याच्या सुमारास महाराजांना दरीतून बाहेर काढण्यात यश आले. त्यानंतर त्यांना रुग्णवाहिकेतून सिल्लोड ग्रामीण रुग्णालयात नेण्यात येत असताना वाटेतच त्यांची प्राणज्योत मालवली.
गंभीर मार लागणे आणि वेळेत उपचार न मिळाल्यामुळेच महाराजांचा मृत्यू झाल्याचे प्राथमिक तपासात स्पष्ट झाले आहे. या घटनेमुळे संपूर्ण परिसरात शोककळा पसरली असून ग्रामस्थांनी बचावकार्याला झालेल्या विलंबाबाबत तीव्र नाराजी व्यक्त केली आहे. महाराजांच्या पश्चात पत्नी, दोन मुले, एक मुलगी, सुना आणि नातवंडे असा मोठा परिवार आहे. त्यांच्या आकस्मिक निधनाने धार्मिक व सामाजिक क्षेत्रात मोठी पोकळी निर्माण झाली आहे.
Follow us on our social media handles:
Instagram – https://www.instagram.com/newsdotz/
YouTube – https://www.youtube.com/@NewsDotz
Facebook – https://www.facebook.com/NewsDotz/
Twitter – https://x.com/NewsDotz
Also Read: Pune’s Latest Information
