वनमंत्र्यांच्या बैठकीवर ग्रामस्थांचा बहिष्कार; बिबट्याच्या दहशतीत आंदोलन स्थगित, पुढील लढ्याची तयारी
वनमंत्र्यांच्या बैठकीवर ग्रामस्थांचा बहिष्कार; बिबट्याच्या दहशतीत आंदोलन स्थगित, पुढील लढ्याची तयारी
नाशिक महामार्गावरील बिबट्या प्रकरणानंतर ग्रामस्थांचा रोष कायम आहे. वनमंत्री गणेश नाईक आणि पालकमंत्री अजित पवार यांनी घटनास्थळी भेट न दिल्याने ग्रामस्थांनी मंत्रालयातील बैठकीवर बहिष्कार टाकला आहे. रास्तारोको आंदोलनाला तूर्त स्थगिती देण्यात आली असून पुढील दिशा ठरवण्यासाठी ग्रामस्थांची बैठक सुरु आहे.
सायली मेमाणे
४ ऑक्टोबर २०२५ : नाशिक महामार्गावरील बिबट्या प्रकरणानंतर परिसरात तणावाचे वातावरण निर्माण झाले आहे. गेल्या काही दिवसांपासून या परिसरात बिबट्यांच्या वाढत्या हालचालींमुळे ग्रामस्थ भयभीत झाले आहेत. अलीकडेच एका बिबट्याला जेरबंद करण्यात आलं असलं तरी, तोच नरभक्षक बिबट्या आहे याची खात्री अद्याप झालेली नाही. त्यामुळे परिसरातील नागरिकांचा संताप आणि असुरक्षिततेची भावना अधिकच तीव्र झाली आहे. या पार्श्वभूमीवर ग्रामस्थांनी आंदोलन सुरू केले होते. मात्र, सध्या रास्तारोको आंदोलनाला तूर्तास स्थगिती देण्यात आली आहे.
ग्रामस्थांनी स्पष्टपणे सांगितले आहे की, जोपर्यंत प्रशासनाकडून ठोस आश्वासन आणि बिबट्यांच्या समस्येवर कायमस्वरूपी उपाययोजना होत नाहीत, तोपर्यंत त्यांचा संघर्ष सुरूच राहणार आहे. “एका बिबट्याला पकडून प्रशासन जबाबदारीतून सुटू शकत नाही, कारण अजून किती बिबटे परिसरात फिरत आहेत याची कोणालाही कल्पना नाही,” असा प्रश्न ग्रामस्थांनी उपस्थित केला आहे.
दरम्यान, आजवर पालकमंत्री अजित पवार आणि वनमंत्री गणेश नाईक यांनी घटनास्थळी भेट न दिल्यामुळे ग्रामस्थांमध्ये नाराजीचा सुर अधिक वाढला आहे. स्थानिकांच्या अपेक्षा होत्या की, राज्यातील वरिष्ठ मंत्री या घटनास्थळी येऊन प्रत्यक्ष पाहणी करतील आणि त्यांच्या समस्यांना ऐकून घेतील. मात्र, तसे झाले नाही. परिणामी ग्रामस्थांनी मंत्रालयातील आजच्या वनमंत्र्यांच्या बैठकीवर बहिष्कार टाकला आहे.
ग्रामस्थांचा आरोप आहे की, प्रशासन आणि सरकार दोन्हीही या गंभीर विषयाकडे दुर्लक्ष करत आहेत. “गावातील मुलं शाळेला जाण्यास घाबरत आहेत, शेतकरी रात्री शेतात काम करू शकत नाहीत, आणि तरीही आमच्या सुरक्षिततेसाठी कोणतीही ठोस कारवाई होत नाही,” असे ग्रामस्थांचे म्हणणे आहे. त्यांनी वन खात्याच्या निष्क्रियतेवर प्रश्न उपस्थित करत तातडीने सर्व बिबट्यांचा शोध घेण्याची मागणी केली आहे.
या आंदोलनाचं पुढचं पाऊल काय असणार याबाबत ग्रामस्थांमध्ये मोठी चर्चा सुरू आहे. काहींनी पुन्हा रास्तारोकोचा इशारा दिला असून, काही ग्रामस्थांनी मंत्रालयाबाहेर ठिय्या आंदोलनाची तयारी सुरू केली आहे. दरम्यान, पोलिस आणि वन विभाग प्रशासन परिस्थिती नियंत्रणात ठेवण्यासाठी प्रयत्न करत आहेत.
ही संपूर्ण कारवाई आणि स्थानिकांचा विरोध यावरून स्पष्ट होतं की, ग्रामीण भागातील नागरिकांच्या सुरक्षेचा मुद्दा अद्याप गंभीरच आहे. एका बिबट्याला पकडून हा विषय संपलेला नाही, तर त्यावर दीर्घकालीन उपाययोजना गरजेची आहे. ग्रामस्थांनी आजचा बहिष्कार नोंदवून सरकारला स्पष्ट संदेश दिला आहे — “आमच्या सुरक्षेच्या प्रश्नावर तडजोड होणार नाही.”
या पार्श्वभूमीवर सुनील थिगळे यांनी आंदोलन स्थळावरून परिस्थितीचा प्रत्यक्ष आढावा घेतला. त्यांच्या मते, ग्रामस्थांचा रोष अजूनही ओसरलेला नाही आणि प्रशासनाने ठोस पावले उचलली नाहीत तर पुढील काही दिवसांत आंदोलन पुन्हा तीव्र होण्याची शक्यता आहे.
