सेल्फी काढताना MBBS विद्यार्थिनी व भावोजीचा तलावात मृत्यू; राजस्थानातील धक्कादायक घटना
सेल्फी काढताना MBBS विद्यार्थिनी व भावोजीचा तलावात मृत्यू; राजस्थानातील धक्कादायक घटनासेल्फी काढताना MBBS विद्यार्थिनी व भावोजीचा तलावात मृत्यू; राजस्थानातील धक्कादायक घटना
राजस्थानातील झुंझुनू जिल्ह्यात सेल्फी काढताना 19 वर्षीय MBBS विद्यार्थिनी पाय घसरून तलावात पडली आणि तिला वाचवताना 28 वर्षीय भावोजींचाही मृत्यू झाला. ही घटना शोकांतिका ठरली.
सायली मेमाणे
पुणे ३० ऑगस्ट २०२५ : जयपूर : राजस्थानातील झुंझुनू जिल्ह्यात घडलेल्या एका दुर्दैवी घटनेने परिसरात हळहळ व्यक्त केली जात आहे. 19 वर्षीय MBBS विद्यार्थिनी सेल्फी काढत असताना तोल जाऊन तलावात पडली आणि तिला वाचवण्यासाठी धावून आलेल्या 28 वर्षीय मेहुण्याचाही बुडून मृत्यू झाला. एकाच वेळी दोन जणांचा जीव गेलेली ही घटना शुक्रवारी सकाळी घडली असून कुटुंबावर शोककळा पसरली आहे.
मृत विद्यार्थिनीचे नाव शिबू असून ती मूळ उत्तर प्रदेशातील बुलंदशहर येथील रहिवासी होती. नुकतीच तिने NEET परीक्षा उत्तीर्ण केली होती आणि नोएडा येथे MBBS अभ्यासक्रमासाठी प्रवेश मिळाला होता. कुटुंबीयांसोबत ती उदयपूरवाटी जवळील छपोली गावात असलेल्या कदंब कुंड परिसरात फिरायला आली होती. तेथे फोटो व सेल्फी काढत असताना अचानक पाय घसरल्याने ती तलावात पडली.
घटनेच्या वेळी तिचा मेहुणा कृष्णा कुमार (वय 28) सुद्धा सोबत होता. शिबू पाण्यात पडताच तिला वाचवण्यासाठी त्याने क्षणाचाही विलंब न करता तलावात उडी मारली. मात्र, पाण्याच्या खोलीमुळे आणि मदतीसाठी कोणीही जवळ नसल्याने दोघांचाही श्वास गुदमरून मृत्यू झाला.
उदयपूरवाटी पोलीस ठाण्याचे प्रभारी कस्तूर वर्मा यांनी सांगितले की, सकाळी साडेनऊ वाजताच्या सुमारास अपघात झाला. प्रत्यक्षदर्शींच्या माहितीनुसार शिबूचा भाऊ, मोठी बहीण आणि दोन चुलत भाऊ घटनास्थळी उपस्थित होते. मात्र, मदतीसाठी कोणीही नसल्याने प्रयत्न अपयशी ठरले. जवळच्या मंदिरातील पुजाऱ्याने पोलिसांना माहिती दिली आणि त्यानंतर गावकऱ्यांच्या मदतीने दोघांचे मृतदेह बाहेर काढण्यात आले.
ही घटना आणखीनच हृदय पिळवटून टाकणारी ठरली कारण मृत्यूच्या आदल्या दिवशीच कृष्णा कुमार यांच्या नवजात कन्येचे नामकरण सोहळा झाला होता. गुरुवारी सिकर जिल्ह्यातील नीम का थाना येथे हा कार्यक्रम पार पडला होता. त्यानंतर दुसऱ्या दिवशी कुटुंबीय पिकनिकसाठी गेले असता हा अपघात झाला. पोलिसांनी शवविच्छेदन करून मृतदेह कुटुंबीयांच्या ताब्यात दिले.
दरम्यान, अशा प्रकारचे अपघात देशभरात वारंवार होताना दिसत आहेत. विशेषतः तरुण पिढी सोशल मीडियासाठी फोटो आणि व्हिडिओ काढण्याच्या नादात सुरक्षिततेकडे दुर्लक्ष करत आहे. यामुळे अनेकांचा जीव गेला असून ही घटना त्याचाच एक धक्कादायक पुरावा आहे. कुटुंबातील दोन जणांना गमावल्यामुळे शोकाकुल वातावरण असून गावातही हळहळ व्यक्त होत आहे.
दरम्यान, महाराष्ट्रातील भंडारा जिल्ह्यात गेल्या आठ महिन्यांत रस्ते अपघातांमुळे 140 जणांचा मृत्यू झाल्याची धक्कादायक माहिती समोर आली आहे. जिल्ह्यातील राज्य आणि राष्ट्रीय महामार्गांवरील ब्लॅक स्पॉट्सवर पोलिसांकडून विशेष देखरेख ठेवली जाणार आहे. अपघात कमी करण्यासाठी पथक दर दुसऱ्या दिवशी दोन तास गस्त घालणार आहे. या उपक्रमामुळे अपघातांची संख्या कमी होण्याची अपेक्षा व्यक्त केली जात आहे.
राजस्थानातील सेल्फी दुर्घटना असो किंवा महामार्गावरील अपघात, दोन्ही घटनांनी सुरक्षिततेबाबत गंभीर विचार करण्याची वेळ पुन्हा एकदा आपल्यासमोर आणली आहे.
