१४ नोव्हेंबरपर्यंत भिडे पूल खुला; १५ नोव्हेंबरपासून रात्रीच्या वेळी वाहतूक बंद राहणार
१४ नोव्हेंबरपर्यंत भिडे पूल खुला; १५ नोव्हेंबरपासून रात्रीच्या वेळी वाहतूक बंद राहणार
महामेट्रोच्या पादचारी पुलाच्या कामामुळे बंद असलेला बाबाराव भिडे पूल १४ नोव्हेंबरपर्यंत पूर्ण वेळ वाहतुकीसाठी खुला ठेवण्यात आला आहे. मात्र १५ नोव्हेंबर ते ३१ डिसेंबर दरम्यान दररोज रात्री १० ते सकाळी ६ या वेळेत पूल बंद राहील.
सायली मेमाणे
५ ऑक्टोबर २०२५ : पुणे : शहरातील महत्त्वाचा दुवा असलेला बाबाराव भिडे पूल आता १४ नोव्हेंबरपर्यंत वाहतुकीसाठी पूर्णपणे खुला ठेवण्याचा निर्णय घेण्यात आला आहे. पुणे मेट्रोच्या पादचारी पुलाच्या उभारणीचे काम सुरू असल्याने अलीकडेच हा पूल काही दिवसांसाठी बंद करण्यात आला होता. मात्र, त्यानंतर पेठ परिसरातील वाढती वाहतूक कोंडी आणि नागरिकांचा त्रास लक्षात घेऊन पुणे महानगरपालिका आणि महामेट्रो प्रशासनाने तात्पुरता दिलासा दिला आहे.
सध्या मंडई, शनिवार पेठ, नाना पेठ आणि कसबा पेठ या भागांमधील वाहतुकीचा भार भिडे पुलाच्या बंदीमुळे मोठ्या प्रमाणात वाढला होता. परिणामी या परिसरातील रस्त्यांवर सकाळी आणि संध्याकाळी वाहतूक कोंडी निर्माण होत होती. त्याचबरोबर आपत्कालीन सेवांनाही उशीर होत होता. या पार्श्वभूमीवर नागरिक आणि स्थानिक जनप्रतिनिधींनी प्रशासनाकडे तातडीने भिडे पूल खुला ठेवण्याची मागणी केली होती.
महामेट्रोकडून सुरू असलेल्या पादचारी पुलाच्या उभारणीचे काम सध्या प्रारंभिक टप्प्यात असून, त्यात काही तांत्रिक अडथळे आल्याने कामाचा वेग मंदावला आहे. त्यामुळे पूल कायमस्वरूपी बंद ठेवणे शक्य नसल्याचे महामेट्रोकडून स्पष्ट करण्यात आले. या अनुषंगाने तातडीने निर्णय घेऊन १४ नोव्हेंबरपर्यंत पूल खुला ठेवण्यात आला आहे.
महामेट्रोकडून प्रसिद्ध करण्यात आलेल्या निवेदनानुसार, १५ नोव्हेंबर ते ३१ डिसेंबर या कालावधीत दररोज रात्री १० ते सकाळी ६ या वेळेत पूल वाहतुकीसाठी बंद राहील. या वेळेत मेट्रोच्या पादचारी पुलाच्या स्टील स्ट्रक्चर आणि लाईटिंग सिस्टमसंबंधी काम पूर्ण करण्यात येणार आहे. दिवसाच्या वेळेत मात्र सर्व वाहनांना पूल वापरण्यास परवानगी असेल.
वाहतूक विभागाने नागरिकांना आवाहन केले आहे की, रात्रीच्या वेळेत पर्यायी मार्गांचा वापर करावा. लक्ष्मी रोड, शनिवार पेठ आणि टिळक रस्ता मार्गे जाणाऱ्या वाहनांना वेगवेगळ्या दिशांसाठी विशेष सिग्नल व्यवस्थापन आणि पोलिस बंदोबस्त करण्यात येणार आहे.
पोलिस अधिकाऱ्यांच्या माहितीनुसार, भिडे पूल बंदीच्या काळात सकाळी कामावर जाणाऱ्या आणि संध्याकाळी घरी परतणाऱ्या नागरिकांना मोठा त्रास सहन करावा लागला होता. त्यामुळे आता पूल खुला केल्याने वाहतूक पुन्हा सुरळीत होईल, अशी अपेक्षा व्यक्त केली जात आहे.
महामेट्रोच्या अधिकाऱ्यांनी सांगितले की, “भिडे पूल परिसरात पादचारी आणि वाहनचालकांची सुरक्षितता लक्षात घेऊन कामाच्या वेळेत योग्य ती खबरदारी घेतली जाईल. सर्व सुरक्षा मानकांचे पालन करण्यात येईल.”
नागरिकांनी पूल खुला ठेवण्याच्या निर्णयाचे स्वागत केले असून, रात्रीच्या बंदीच्या काळात पर्यायी मार्गांवर प्रभावी दिशादर्शक फलक आणि प्रकाशयोजना करावी, अशी मागणी स्थानिकांनी केली आहे.
पुणे शहरातील वाहतूक नियोजनाच्या दृष्टीने भिडे पूल हा अत्यंत महत्त्वाचा दुवा आहे. या पुलावरून दररोज हजारो वाहने प्रवास करतात. त्यामुळे आगामी दोन महिन्यांच्या रात्रीच्या बंदीच्या काळात वाहतूक विभाग आणि महामेट्रोकडून समन्वय राखणे अत्यावश्यक ठरणार आहे.
