Inspirational Story: ठाणे RTO ते इस्रो शास्त्रज्ञ! सुजाता मडके यांची प्रेरणादायी भरारी
Inspirational Story: ठाणे RTO ते इस्रो शास्त्रज्ञ! सुजाता मडके यांची प्रेरणादायी भरारी
ठाण्यातील RTO विभागात कार्यरत असलेल्या सुजाता मडके यांनी कठोर परिश्रम, दृढनिश्चय आणि स्वप्नांवरील विश्वासाच्या जोरावर ‘इस्रो’ शास्त्रज्ञ पद मिळवत ठाणे जिल्ह्याचे नाव उजळवले. त्यांच्या या प्रवासाने तरुणांना दिला प्रेरणेचा नवा धडा.
सायली मेमाणे
पुणे २८ ऑक्टोबर २०२५ : ठाण्यातील मोटार वाहन विभागात कार्यरत असलेल्या 29 वर्षीय सुजाता मडके यांनी आपल्या मेहनतीने आणि चिकाटीने अभूतपूर्व यश मिळवले आहे. ठाणे आरटीओमध्ये सहाय्यक मोटार वाहन निरीक्षक म्हणून काम करणाऱ्या सुजाता यांची आता इस्रो (Indian Space Research Organisation) मध्ये शास्त्रज्ञ म्हणून निवड झाली आहे. त्यांच्या या मोठ्या झेपेमुळे केवळ ठाणे जिल्हाच नव्हे, तर संपूर्ण महाराष्ट्र अभिमानाने भरून गेला आहे.
शहापूर तालुक्यातील शिरगाव या छोट्याशा गावातील सुजाता मडके या साध्या कुटुंबातील असून, शिक्षण आणि प्रगतीबद्दल त्यांना लहानपणापासूनच प्रचंड आवड होती. त्यांनी डॉ. बाबासाहेब आंबेडकर तंत्रज्ञान विद्यापीठ, लोणेरे (रायगड) येथून मेकॅनिकल इंजिनिअरिंगमध्ये बी.टेक पूर्ण केले. त्यानंतर आयआयटी-खरगपूरमधील व्हर्च्युअल लॅब प्रोजेक्टमध्ये त्यांनी रिसर्च इंजिनिअर म्हणून काम केले. या काळात त्यांनी तांत्रिक कौशल्य वाढवून स्वतःला स्पर्धात्मक बनवलं.
याचबरोबर त्यांनी एमपीएससी (MPSC) परीक्षा उत्तीर्ण करत ठाण्यात सहाय्यक मोटार वाहन निरीक्षक पदावर 2023 मध्ये रुजू झाल्या. परंतु सरकारी नोकरी मिळाल्यानंतरही त्यांनी समाधान न मानता आपल्या ध्येयाचा पाठपुरावा सुरू ठेवला. अंतराळ क्षेत्रात काम करण्याचं स्वप्न त्यांनी जपलं आणि अखेर इस्रोसारख्या प्रतिष्ठित संस्थेत शास्त्रज्ञ म्हणून निवड होऊन त्यांनी ते स्वप्न पूर्ण केलं.
सुजाता मडके यांनी आपल्या या यशाबद्दल बोलताना सांगितलं की, “माझे पालक हेच माझी खरी प्रेरणा आहेत. त्यांनी नेहमी मला मोठी स्वप्नं पाहायला शिकवलं आणि अपयशाला न घाबरता पुढे जाण्याचं बळ दिलं. आज त्यांच्यामुळेच मी इथपर्यंत पोहोचले आहे.” त्यांच्या या वक्तव्यातून त्यांच्या नम्रतेचा आणि मेहनतीचा प्रत्यय येतो.
परिवहन मंत्री प्रताप सरनाईक यांनीदेखील सुजाता मडके यांचं अभिनंदन करत म्हटलं की, “यशासाठी कोणताही शॉर्टकट नसतो. दृढनिश्चय, कठोर परिश्रम आणि स्वप्नांवर विश्वास असल्यास व्यक्ती अंतराळापर्यंतही भरारी घेऊ शकते.” त्यांनी ट्विटरवरून सुजाता मडके यांना शुभेच्छा देताना सांगितलं की, “शिरगावसारख्या छोट्या गावातून निघालेल्या सुजाताने ठाणे आणि संपूर्ण राज्याचं नाव अभिमानाने उजळवलं आहे. तिचा प्रवास प्रत्येक तरुणासाठी प्रेरणादायी आहे.”
सुजाता मडके यांची कहाणी ही फक्त यशाची गोष्ट नाही, तर ती धैर्य, सातत्य आणि आत्मविश्वासाचा आदर्श आहे. स्पर्धा परीक्षांपासून ते संशोधन क्षेत्रापर्यंतच्या प्रवासात त्यांनी दाखवलेली निष्ठा अनेक तरुणांना मार्गदर्शक ठरेल. इस्रोमध्ये त्यांच्या नव्या भूमिकेतून त्या देशाच्या वैज्ञानिक क्षेत्रात आपला मोलाचा वाटा उचलतील, यात शंका नाही.
आजच्या काळात जिथे अनेकजण सहजपणे हार मानतात, तिथे सुजाता मडके यांची कथा हे दाखवते की, यश मिळवण्यासाठी केवळ बुद्धिमत्ता नव्हे, तर ध्येयावरचा विश्वास आणि अथक परिश्रमही तितकेच आवश्यक आहेत. त्यांच्या या भरारीने केवळ ठाणे नव्हे, तर महाराष्ट्रातील असंख्य तरुणांच्या मनात ‘मीही करू शकतो’ अशी नवचेतना निर्माण केली आहे.
