Mumbai Airport : 13 किलो ड्रग्स आणि 87 लाखांचं परकीय चलन जप्त; मुंबई विमानतळावर सीमाशुल्क विभागाच्या सलग 5 मोठ्या कारवाया
Mumbai Airport : 13 किलो ड्रग्स आणि 87 लाखांचं परकीय चलन जप्त; मुंबई विमानतळावर सीमाशुल्क विभागाच्या सलग 5 मोठ्या कारवाया
मुंबईच्या छत्रपती शिवाजी महाराज आंतरराष्ट्रीय विमानतळावर सीमाशुल्क विभागाने ४ दिवसांत तब्बल १३ किलो हायड्रोपोनिक वीड आणि ८७ लाख रुपयांचं परकीय चलन जप्त केलं. ३१ ऑक्टोबर ते ३ नोव्हेंबर दरम्यान झालेल्या या कारवायांत ५ प्रवाशांना अटक करून NDPS आणि Customs Act अंतर्गत गुन्हे दाखल करण्यात आले.
सायली मेमाणे
५ ऑक्टोबर २०२५ : मुंबई : मुंबईतील छत्रपती शिवाजी महाराज आंतरराष्ट्रीय विमानतळावर सीमाशुल्क विभागाने मागील चार दिवसांत सलग पाच मोठ्या कारवाया करत ड्रग्स आणि परकीय चलनाचा मोठा साठा जप्त केला आहे. ३१ ऑक्टोबर ते ३ नोव्हेंबर २०२५ या कालावधीत झालेल्या या ऑपरेशन्सदरम्यान एकूण १३ किलोहून अधिक हायड्रोपोनिक वीड आणि सुमारे ८७ लाख रुपयांचं परकीय चलन सीमाशुल्क अधिकाऱ्यांनी जप्त केलं आहे. या सर्व कारवायांत आरोपी प्रवाशांना अटक करण्यात आली असून त्यांच्याविरोधात NDPS Act, 1985 आणि Customs Act, 1962 अंतर्गत गुन्हे दाखल करण्यात आले आहेत.
सीमाशुल्क विभागाच्या मुंबई झोन-३ अंतर्गत या कारवाया करण्यात आल्या. अधिकाऱ्यांनी दिलेल्या माहितीनुसार, विमानतळावर वेगवेगळ्या देशांतून येणाऱ्या प्रवाशांची गुप्त माहितीच्या आधारे तपासणी करण्यात आली. तपासादरम्यान ५ वेगवेगळ्या प्रकरणांमध्ये ड्रग्स आणि परकीय चलन लपवून आणल्याचे उघडकीस आले.
पहिल्या प्रकरणात कोलंबोहून UL143 फ्लाइटने मुंबईत आलेल्या एका प्रवाशाच्या ट्रॉली बॅगमध्ये २.५६८ किलो हायड्रोपोनिक वीड आढळले. या ड्रग्जची आंतरराष्ट्रीय बाजारातील किंमत सुमारे ₹२५.६ दशलक्ष म्हणजेच सुमारे ₹२.५६ कोटी एवढी आहे. आरोपी प्रवाशाला तात्काळ ताब्यात घेण्यात आले.
दुसऱ्या प्रकरणात बँकॉकहून फ्लाइट क्रमांक 6E-1052 मधून आलेल्या प्रवाशाकडे २.३९ किलो हायड्रोपोनिक वीड आढळले. विशेष म्हणजे आरोपींनी ड्रग्ज चॉकलेट आणि चिप्सच्या पॅकेटमध्ये लपवले होते. या जप्त मालाची किंमत सुमारे ₹२.३९ कोटी असल्याचा अंदाज व्यक्त करण्यात आला आहे.
तिसऱ्या प्रकरणात पुन्हा बँकॉकहून आलेल्या SL218 फ्लाइटमधील प्रवाशाची बॅग तपासली असता शॅम्पूच्या बाटल्यांमध्ये १.१४४ किलो हायड्रोपोनिक वीड लपवलेले आढळले. या ड्रग्जची किंमत अंदाजे ₹१.१४ कोटी आहे. आरोपी प्रवाशाला अटक करून चौकशी सुरू आहे.
चौथ्या कारवाईत बँकॉकहून फ्लाइट AI2353 मधून आलेल्या प्रवाशाच्या चेक-इन ट्रॉली बॅगमधून तब्बल ६.९७५ किलो हायड्रोपोनिक वीड जप्त करण्यात आले. या प्रकरणातही प्रवाशाला ताब्यात घेऊन अधिक तपास सुरू आहे.
पाचव्या कारवाईत सीमाशुल्क अधिकाऱ्यांनी मुंबईहून दुबईला जाणाऱ्या फ्लाइट AI2201 मधील प्रवाशाला थांबवले. तपासात त्याच्या ट्रॉली बॅगमध्ये ८.७ दशलक्ष रुपये (सुमारे ₹८७ लाख) इतकं परकीय चलन लपवून नेण्याचा प्रयत्न केल्याचं उघड झालं. संबंधित प्रवाशाला कस्टम्स कायद्यानुसार अटक करण्यात आली आहे.
सीमाशुल्क विभागाने सांगितले की, “या सर्व प्रकरणांत जप्त करण्यात आलेल्या मालाची एकत्रित किंमत १३ कोटी रुपयांच्या आसपास आहे. ड्रग्जची तस्करी आणि अवैध चलन वाहतुकीविरोधात आमचे ऑपरेशन्स सातत्याने सुरू राहतील.”
मुंबई विमानतळावर अशा कारवाया गेल्या काही महिन्यांत वाढल्या आहेत. विशेषतः आग्नेय आशियातील देशांमधून ड्रग्ज तस्करीचे प्रमाण वाढल्याचे अधिकाऱ्यांनी सांगितले. सीमाशुल्क विभाग आणि एअर इंटेलिजन्स युनिट यांच्यातील समन्वयामुळे अशा गुन्ह्यांवर आळा बसवण्यात यश मिळत आहे.
