KDMC निवडणुकीपूर्वी राजकीय खळबळ! शिवसेना-मनसेच्या आजी-माजी आमदारांचा हळदीत एकत्र डान्स; व्हायरल व्हिडिओवर चर्चा
KDMC निवडणुकीपूर्वी राजकीय खळबळ! शिवसेना-मनसेच्या आजी-माजी आमदारांचा हळदीत एकत्र डान्स; व्हायरल व्हिडिओवर चर्चा
KDMC निवडणूक तोंडावर असताना शिवसेना शिंदे गट आणि मनसेचे माजी आमदार हळदी कार्यक्रमात एकत्र नाचल्याचा व्हिडिओ व्हायरल. युती-आघाडीच्या तर्कवितर्कांना उधाण.
सायली मेमाणे
१६ नोव्हेंबर २०२५ : कल्याण-डोंबिवली महापालिकेची निवडणूक अगदी तोंडावर येऊन ठेपली आहे आणि राजकीय वर्तुळात युती-आघाडीच्या चर्चांनी तापलेले वातावरण अधिकच गडद होत आहे. अशातच एका विवाहातील हळदी समारंभाचा व्हिडिओ सोशल मीडियावर प्रचंड व्हायरल झाला असून या व्हिडिओमुळे स्थानिक राजकारणात अक्षरशः खळबळ उडाली आहे. कारण या व्हिडिओमध्ये शिवसेना शिंदे गटाचे नेते आणि माजी आमदार राजेश मोरे तसेच मनसेचे नेते आणि माजी आमदार राजू पाटील हे दोघेही एकत्र नाचताना दिसत आहेत. प्रतिस्पर्धी गटातील म्हणून ओळखल्या जाणाऱ्या या दोन्ही नेत्यांचा एकत्रित धमाकेदार डान्स पाहून अनेकांच्या भुवया उंचावल्या आहेत.
हा व्हिडिओ व्हायरल होताच राजकीय वर्तुळात अचानक चर्चांना वेग आला आहे. KDMC निवडणुकीच्या पार्श्वभूमीवर दोन वेगवेगळ्या पक्षांचे नेते लग्नसोहळ्यात इतक्या जवळून सहभागी झाले आणि एकत्र नाचले, याचा अर्थ काय? येणाऱ्या निवडणुकीत शिवसेना शिंदे गट आणि मनसे एकत्र येणार का? अशी चर्चा सोशल मीडियावर आणि स्थानिक राजकीय मंडळीत जोर धरू लागली आहे. युती-आघाडीबाबत आधीच सुरू असलेल्या तर्क-वितर्कांना या व्हिडिओने आणखी खतपाणी घातले आहे.
कल्याण-डोंबिवली महापालिका निवडणुका जाहीर होण्याच्या मार्गावर आहेत. सर्वच पक्षांनी मोर्चेबांधणीला सुरुवात केली आहे. शिवसेना शिंदे गट आणि भाजपमध्ये सुरू असलेली इनकमिंग, नगरसेवकांचे प्रवेश, महायुतीचे बदलते चित्र या पार्श्वभूमीवर स्थानिक समीकरणे सतत बदलत आहेत. दुसरीकडे महाविकास आघाडी KDMC मध्ये एकत्र लढणार का, हे अजूनही अनिश्चित आहे. याच दरम्यान हा व्हिडिओ समोर आल्याने राजकीय आकडेमोड आणि भविष्यातील संभाव्य युतींवर विविध अंदाज बांधले जात आहेत.
राजू पाटील आणि राजेश मोरे हे दोन्ही नेते आपल्या कार्यकर्त्यांमध्ये लोकप्रिय असून परिसरात प्रभावशाली नेते म्हणून ओळखले जातात. दोघांचा हळदी समारंभातील उत्स्फूर्त नाच हा केवळ वैयक्तिक संबंधांचा भाग असू शकतो, असे काहींचे मत असले तरी या व्हिडिओमुळे निर्माण झालेल्या चर्चांवर विराम बसलेला नाही. KDMC निवडणूक ही राज्यातील महत्त्वाच्या लढतींपैकी एक मानली जात असल्याने प्रत्येक हालचालीवर राजकीय तज्ज्ञांचे लक्ष आहे.
युतीच्या शक्यतांच्या चर्चेत हा व्हिडिओ अधिक रस निर्माण करणारा ठरला असून, दोन्ही पक्षांचे कार्यकर्तेदेखील या दृश्यावर उत्सुकतेने चर्चा करत आहेत. शिवसेना शिंदे गट आणि भाजपमध्ये आधीच जवळीक वाढताना दिसत आहे. मनसेची या निवडणुकीतील भूमिका नेहमीच महत्त्वाची मानली जाते. त्यामुळे तीन पक्षांतील संभाव्य समीकरणांवर आता पुन्हा एकदा प्रश्नचिन्ह निर्माण झाले आहे.
महापालिका निवडणुकांच्या पार्श्वभूमीवर नेत्यांमधील अशा मैत्रीपूर्ण क्षणांचा राजकीय अर्थ लावला जाणे स्वाभाविकच आहे. परंतु हे दृश्य आगामी युतीची झलक आहे की केवळ एका कार्यक्रमातील आनंदाचा क्षण, हे पुढील काही दिवसांत स्पष्ट होणार आहे. KDMC निवडणुकीत कोण बाजी मारणार, कोण कोणाशी हातमिळवणी करणार आणि राजकीय चित्र कसे बदलणार, याकडे आता सर्वांचे लक्ष लागले आहे.
