Kolhapur News: रिलस्टार कृष्णराज महाडिक यांची महापालिकेत एन्ट्री? नेत्याच्या मुलाच्या राजकारणातील तिसऱ्या पिढीची चर्चा
Kolhapur News: रिलस्टार कृष्णराज महाडिक यांची महापालिकेत एन्ट्री? नेत्याच्या मुलाच्या राजकारणातील तिसऱ्या पिढीची चर्चा
Kolhapur Municipal Election: खासदार धनंजय महाडिक यांचे पुत्र कृष्णराज महाडिक महापालिका निवडणूक लढवण्याच्या तयारीत. रीलस्टार ते नगरसेवक असा प्रवास होणार का?
पुणे २५ डिसेंबर २०२५ : स्थानिक स्वराज्य संस्थांच्या निवडणुकांचा माहोल राज्यभर तापलेला असताना कोल्हापूरच्या राजकारणात एक नवं नाव जोरात चर्चेत आलं आहे. निवडणुका म्हटलं की पारंपरिक नेते, कार्यकर्ते आणि आता त्यांच्या पुढच्या पिढ्यांचंही राजकारणात आगमन हे चित्र सर्वसामान्य झालं आहे. आगामी कोल्हापूर महानगरपालिका निवडणुकीच्या पार्श्वभूमीवर भाजपचे राज्यसभा खासदार धनंजय महाडिक यांचे सुपुत्र कृष्णराज महाडिक हे महापालिकेच्या रिंगणात उतरण्याच्या तयारीत असल्याची जोरदार चर्चा सुरू आहे.
विधानसभा निवडणुकीत संधी मिळाली नाही, त्यानंतर आता थेट महानगरपालिका निवडणूक लढवण्याचा निर्धार कृष्णराज महाडिक यांनी केल्याचं बोललं जात आहे. कोल्हापूर महानगरपालिकेची उमेदवारी मिळावी यासाठी त्यांनी उमेदवारी अर्ज घेतल्याची माहिती समोर आली असून, त्यामुळे राजकीय वर्तुळात खळबळ उडाली आहे. सूत्रांच्या माहितीनुसार, कृष्णराज महाडिक हे प्रभाग क्रमांक तीनमधून निवडणूक लढवू शकतात. ही उमेदवारी निश्चित झाली, तर कोल्हापूरच्या राजकारणात महाडिक कुटुंबाची तिसरी पिढी थेट सक्रिय राजकारणात उतरेल.
कृष्णराज महाडिक हे केवळ राजकीय पार्श्वभूमीमुळे ओळखले जाणारे नाव नाही, तर ते सोशल मीडियावरही मोठ्या प्रमाणात प्रसिद्ध आहेत. ते एक रीलस्टार, युट्यूबर आणि कार रेसर म्हणून तरुणांमध्ये लोकप्रिय आहेत. सोशल मीडियावरील मोठा फॉलोअर्स वर्ग आणि युवा वर्गातील ओळख हीच त्यांची मोठी ताकद मानली जात आहे. मात्र याच मुद्द्यावरून राजकीय वर्तुळात संमिश्र प्रतिक्रिया उमटताना दिसत आहेत. सोशल मीडियावर लोकप्रियता मिळवून नेता होणं आजकाल सोपं झालं आहे, अशा टीकाही होत आहेत.
विधानसभा निवडणुकीपूर्वी कृष्णराज महाडिक हे उमेदवारीसाठी इच्छुक होते. शिवसेना आणि भाजप या दोन्ही पक्षांकडून तिकीट मिळवण्यासाठी प्रयत्न झाले, मात्र त्यावेळी त्यांना संधी मिळाली नाही. त्यानंतर आता महानगरपालिका निवडणुकीकडे त्यांनी आपलं लक्ष वळवलं आहे. एखादं पद मिळालं, तर आपण निश्चितच चांगलं काम करून दाखवू, असं विधान कृष्णराज महाडिक यांनी यापूर्वी केल्याचंही चर्चेत आहे.
या संपूर्ण घडामोडींमध्ये खासदार धनंजय महाडिक यांची भूमिका महत्त्वाची मानली जात आहे. मात्र आतापर्यंत त्यांनी मुलाच्या उमेदवारीबाबत कोणतीही अधिकृत प्रतिक्रिया दिलेली नाही. राजकीय अनुभव, संघटनात्मक ताकद आणि घरातलं मोठं नेतृत्व असलं, तरी निवडणूक जिंकण्यासाठी प्रत्यक्ष मैदानात उतरून मेहनत घ्यावीच लागते, हे वास्तवही तितकंच खरं आहे.
कोल्हापूरमध्ये आधीच राजकीय समीकरणं गुंतागुंतीची असताना कृष्णराज महाडिक यांच्या एन्ट्रीमुळे ही लढत अधिक रंगतदार होण्याची शक्यता आहे. युवा चेहरा, सोशल मीडियावरची लोकप्रियता आणि घराणेशाहीची पार्श्वभूमी या सगळ्यांचा मिलाफ मतदारांना कितपत आकर्षित करतो, हे निकालानंतरच स्पष्ट होईल. मात्र, रीलस्टार ते नगरसेवक असा प्रवास घडतो का, याकडे संपूर्ण कोल्हापूरचे लक्ष लागले आहे.
Follow us on our social media handles:
Instagram – https://www.instagram.com/newsdotz/
YouTube – https://www.youtube.com/@NewsDotz
Facebook – https://www.facebook.com/NewsDotz/
Twitter – https://x.com/NewsDotz
Also Read: Pune’s Latest Information
