PCMC Election 2026: एका उमेदवाराला दोन पक्षांचे एबी फॉर्म! पिंपरी-चिंचवड निवडणुकीत उमेदवारीचा अभूतपूर्व पेच
PCMC Election 2026: एका उमेदवाराला दोन पक्षांचे एबी फॉर्म! पिंपरी-चिंचवड निवडणुकीत उमेदवारीचा अभूतपूर्व पेच
PCMC Election 2026 मध्ये मोठा तांत्रिक घोळ समोर आला आहे. पिंपरी-चिंचवड महानगरपालिका निवडणुकीत दोन उमेदवारांनी दोन-दोन पक्षांचे एबी फॉर्म जोडल्याने निवडणूक आयोगासमोर पेच निर्माण झाला आहे. नेमका नियम काय सांगतो? सविस्तर वाचा.
पुणे ०२ डिसेंबर २०२५ : पिंपरी चिंचवड महानगरपालिका निवडणूक 2026 च्या रणधुमाळीत उमेदवारी अर्ज छाननीनंतर एक अत्यंत अजब आणि खळबळजनक प्रकार समोर आला आहे. प्रभाग क्रमांक 20 ‘ब’ आणि 30 ‘अ’ मध्ये दोन उमेदवारांनी चक्क दोन-दोन राजकीय पक्षांचे अधिकृत ‘एबी’ फॉर्म जोडून उमेदवारी अर्ज दाखल केल्याचे उघड झाले आहे. विशेष म्हणजे, निवडणूक अधिकाऱ्यांकडून छाननीदरम्यान हे दोन्ही अर्ज वैध ठरवण्यात आल्याने उमेदवारांसह निवडणूक आयोगासमोरही मोठा तांत्रिक पेच निर्माण झाला आहे.
प्रभाग क्रमांक 20 ‘ब’ मधून नीलम म्हात्रे यांनी राष्ट्रवादी काँग्रेस (शरद पवार गट) आणि शिवसेना (उद्धव ठाकरे गट) या दोन महाविकास आघाडीतील पक्षांचे एबी फॉर्म जोडले आहेत. दुसरीकडे, प्रभाग क्रमांक 30 ‘अ’ मधून संदीप गायकवाड यांनी राष्ट्रवादी काँग्रेस (शरद पवार गट) आणि शिवसेना (एकनाथ शिंदे गट) या परस्परविरोधी युतीतील पक्षांचे एबी फॉर्म अर्जासोबत सादर केले आहेत. नियमानुसार एका उमेदवाराने फक्त एका पक्षाचा अधिकृत एबी फॉर्म जोडणे अपेक्षित असते, मात्र या दोघांनीही दोन पक्षांचे फॉर्म दिल्याने कागदोपत्री ते दोन्ही पक्षांचे उमेदवार म्हणून दिसत आहेत.
या प्रकारामुळे राजकीय वर्तुळात मोठी चर्चा सुरू झाली असून, नेमका उमेदवार कोणत्या पक्षाचा आहे, याबाबत संभ्रम निर्माण झाला आहे. विशेष म्हणजे, या दोन्ही उमेदवारांचे अर्ज छाननीत वैध ठरल्याने आज, 2 जानेवारी रोजी दुपारी 3 वाजेपर्यंत त्यांच्याकडे एका पक्षाची उमेदवारी मागे घेण्याचा अंतिम पर्याय उपलब्ध आहे. उमेदवारी अर्ज मागे घेण्याच्या मुदतीत त्यांनी स्वतःहून निर्णय घेतल्यास हा पेच सुटू शकतो.
मात्र, जर दुपारी 3 वाजेपर्यंत नीलम म्हात्रे आणि संदीप गायकवाड यांनी कोणत्याही एका पक्षाची अधिकृत निवड केली नाही, तर निवडणूक आयोगाला नियमानुसार हस्तक्षेप करावा लागणार आहे. निवडणूक नियमांनुसार, उमेदवाराने ज्या पक्षाचा उमेदवारी अर्ज आणि एबी फॉर्म वेळेच्या नोंदीनुसार सर्वात आधी दाखल केला असेल, त्याच पक्षाची उमेदवारी ग्राह्य धरली जाते. दुसऱ्या पक्षाचा एबी फॉर्म आणि संबंधित उमेदवारी अर्ज आपोआप बाद ठरतो. एकदा आयोगाने हा निर्णय घेतल्यानंतर उमेदवारांकडे कोणताही पर्याय शिल्लक राहत नाही.
या पार्श्वभूमीवर पिंपरी-चिंचवडमधील राजकीय वातावरण अधिक तापले आहे. दोन वेगवेगळ्या युतींमधील पक्षांचे एबी फॉर्म एकाच उमेदवाराकडे कसे आले, यावरही प्रश्नचिन्ह उपस्थित केले जात आहे. पक्षांतर्गत गोंधळ, समन्वयाचा अभाव की जाणूनबुजून केलेला डाव, यावर राजकीय वर्तुळात वेगवेगळ्या चर्चा रंगल्या आहेत.
आता सर्वांचे लक्ष दुपारी 3 वाजता उमेदवार काय निर्णय घेतात याकडे लागले आहे. उमेदवार स्वतः निर्णय घेतात की निवडणूक आयोग हस्तक्षेप करतो, हे पाहणे महत्त्वाचे ठरणार आहे. या निर्णयाचा थेट परिणाम संबंधित प्रभागांतील निवडणूक समीकरणांवर होणार असून, PCMC Election 2026 मधील ही घटना निवडणूक इतिहासातील एक वेगळी नोंद ठरण्याची शक्यता आहे.
Follow us on our social media handles:
Instagram – https://www.instagram.com/newsdotz/
YouTube – https://www.youtube.com/@NewsDotz
Facebook – https://www.facebook.com/NewsDotz/
Twitter – https://x.com/NewsDotz
Also Read: Pune’s Latest Information
