भिवंडीतील धक्कादायक प्रकार: कॅन्सरग्रस्त पत्नीवर हुंड्यासाठी छळ, घराबाहेर अघोरी जादूटोणा; 6 जणांवर गुन्हा
भिवंडीतील धक्कादायक प्रकार: कॅन्सरग्रस्त पत्नीवर हुंड्यासाठी छळ, घराबाहेर अघोरी जादूटोणा; 6 जणांवर गुन्हा
भिवंडीत कॅन्सरग्रस्त पत्नीला हुंड्यासाठी छळत घराबाहेर अघोरी जादूटोणा केल्याचा धक्कादायक प्रकार उघड; पतीसह सासरच्या 6 जणांविरोधात गुन्हा दाखल.
पुणे 2४ जानेवारी २०२६ : भिवंडी शहरात माणुसकीला काळीमा फासणारी आणि समाजाला हादरवून टाकणारी एक धक्कादायक घटना समोर आली आहे. कर्करोगासारख्या गंभीर आजाराशी झुंज देणाऱ्या पत्नीला आधार देण्याऐवजी, पती आणि सासरच्या मंडळींनी हुंड्यासाठी तिचा छळ करत चक्क अघोरी जादूटोणा केल्याचा प्रकार उघडकीस आला आहे. या घटनेमुळे परिसरात एकच खळबळ उडाली असून, निजामपूर पोलिसांनी पतीसह सासरच्या सहा जणांविरोधात गंभीर स्वरूपाचे गुन्हे दाखल केले आहेत.
मिळालेल्या माहितीनुसार, ३६ वर्षीय पीडित महिला चौथ्या टप्प्यातील कर्करोगाशी झुंज देत आहे. तिचे लग्न सन 2015 मध्ये झाले असून, लग्नानंतरपासूनच सासरच्या मंडळींकडून हुंड्यासाठी मानसिक आणि शारीरिक छळ सुरू होता. पीडितेच्या तक्रारीनुसार, सासरी प्रत्येक अमावस्येला काळ्या जादूची पूजा मांडली जात असे आणि तिला ‘अपशकुनी’ ठरवून अपमानित केले जात होते. दीर्घकाळ चाललेल्या या अमानवी वागणुकीमुळे तिचे मानसिक खच्चीकरण झाले होते.
सप्टेंबर 2025 मध्ये पीडितेला कर्करोगाचे निदान झाल्यानंतर परिस्थिती आणखी गंभीर बनली. आजारपणाच्या काळात पतीकडून आधार मिळण्याची अपेक्षा असताना, 7 डिसेंबर 2025 रोजी तिला तिच्या लहान मुलासह घराबाहेर हाकलून देण्यात आले. त्यानंतर ती आपल्या माहेरी भिवंडीत राहण्यासाठी आली होती. मात्र, छळ इथेही थांबला नाही. 22 जानेवारी 2026 रोजी पतीने पीडितेच्या माहेरच्या घराच्या दरवाजासमोर कापलेले लिंबू, कुंकू, काळ्या रंगाची बाहुली आणि अघोरी पूजेचे साहित्य टाकून तिच्या जीवाला धोका पोहोचवण्याचा प्रयत्न केल्याचा आरोप आहे.
या अघोरी कृत्यामुळे संपूर्ण परिसरात भीतीचे वातावरण निर्माण झाले. पीडितेने धैर्याने पुढे येत निजामपूर पोलीस ठाण्यात तक्रार दाखल केली. तिच्या तक्रारीवरून योगेशकुमार केशरवानी (पती), ओमकारनाथ केशरवानी (सासरा), चंद्रावती केशरवानी (सासू) तसेच भावना मल्होत्रा, अनुराधा अरोरा आणि श्रद्धा बोबडे या नणंदांविरोधात गुन्हा नोंदवण्यात आला आहे.
पोलिसांनी भारतीय न्याय संहिता (BNS) कलम 85, 115(2), 127 सह महाराष्ट्र नरबळी आणि इतर अमानुष, अनिष्ट अघोरी प्रथा व जादूटोणा प्रतिबंधक कायद्याच्या कलम 3(2) अंतर्गत गुन्हा दाखल केला आहे. पोलीस उपायुक्त शशिकांत बोराटे यांच्या मार्गदर्शनाखाली पोलीस निरीक्षक पाटील या प्रकरणाचा अधिक तपास करत आहेत. या घटनेमुळे समाजात आजही हुंड्यासाठी होणारा छळ, अंधश्रद्धा आणि अमानवी प्रथा किती भयावह स्वरूप धारण करत आहेत, हे पुन्हा एकदा अधोरेखित झाले आहे.
Follow us on our social media handles:
Instagram – https://www.instagram.com/newsdotz/
YouTube – https://www.youtube.com/@NewsDotz
Facebook – https://www.facebook.com/NewsDotz/
Twitter – https://x.com/NewsDotz
Also Read: Pune’s Latest Information
