SJ-100 विमानाची भारतात एन्ट्री! HAL-रशिया करारामुळे देशात बनणार सुखोई सुपरजेट
SJ-100 विमानाची भारतात एन्ट्री! HAL-रशिया करारामुळे देशात बनणार सुखोई सुपरजेट
HAL आणि रशियाच्या United Aircraft Corporation मध्ये करार. भारतात सुखोई SJ-100 आणि SBJ-100 विमानांची निर्मिती शक्य. Wings India 2026 मध्ये विमान ठरले आकर्षण. वाचा सविस्तर माहिती.
पुणे २८ जानेवारी २०२६ : भारताच्या नागरी विमानवाहतूक क्षेत्रासाठी एक महत्त्वाचा आणि ऐतिहासिक टप्पा ठरू शकणारी घडामोड समोर आली आहे. भारत आणि रशिया एकत्र येऊन प्रवासी विमाने तयार करण्याच्या तयारीत आहेत. सरकारी एरोस्पेस कंपनी हिंदुस्तान एरोनॉटिक्स लिमिटेड (HAL) आणि रशियाची United Aircraft Corporation (UAC) यांच्यात मोठा करार झाला असून, या कराराअंतर्गत भारतात सुखोई सुपरजेट-100 (SJ-100) विमानाची निर्मिती केली जाणार आहे.
भारताचा सर्वात मोठा सिव्हिल एव्हिएशन शो असलेल्या Wings India 2026 मध्ये यंदा रशियाचे SJ-100 आणि त्याचा लक्झरी प्रकार SBJ-100 (Sukhoi Business Jet-100) हे प्रमुख आकर्षण ठरले. विशेष म्हणजे, हा बिझनेस आणि व्हिआयपी प्रकारचा जेट पहिल्यांदाच भारतीय विमानवाहतूक बाजारात सादर करण्यात आला आहे. यामुळे बिझनेस एव्हिएशन आणि रीजनल कनेक्टिव्हिटी या दोन्ही क्षेत्रांमध्ये भारतासाठी नव्या संधी निर्माण झाल्या आहेत.
SBJ-100 म्हणजे सुखोई सुपरजेट-100 चाच लक्झरी बिझनेस जेट प्रकार आहे. हे पारंपरिक प्रवासी विमान नसून, आकाशात उडणाऱ्या व्हिआयपी ऑफिससारखी रचना असलेले विमान आहे. यात 15 ते 19 व्हिआयपी प्रवाशांची क्षमता असून मोठे मल्टी-झोन केबिन, लक्झरी लाउंज, मीटिंग एरिया, विश्रांती झोन आणि विशेष वॉशरूमची सोय आहे. लांब पल्ल्याच्या उड्डाणांसाठी हे विमान उपयुक्त असून आधुनिक एव्हिऑनिक्स आणि हाय-स्पीड क्रूझ क्षमता यामुळे ते खास मानले जाते.
भारतामध्ये कॉर्पोरेट प्रवास, सरकारी प्रतिनिधिमंडळांची वाहतूक आणि हाय-एंड चार्टर फ्लाइट्सची मागणी झपाट्याने वाढत आहे. अशा परिस्थितीत SBJ-100 हे मोठ्या बिझनेस जेट्सपेक्षा किफायतशीर आणि छोट्या बिझनेस जेट्सपेक्षा अधिक प्रशस्त पर्याय ठरू शकते. त्यामुळे भारतीय बाजारासाठी हे विमान विशेष महत्त्वाचे मानले जात आहे.
दुसरीकडे, SJ-100 हे रशियाच्या Sukhoi Superjet कुटुंबातील सुधारित आणि आधुनिक रिजनल जेट विमान आहे. हे 70 ते 100 प्रवाशांच्या क्षमतेचे असून लहान आणि मध्यम अंतराच्या मार्गांसाठी डिझाइन करण्यात आले आहे. टियर-2 आणि टियर-3 शहरांसाठी अशा प्रकारच्या विमानांची भारताला मोठी गरज आहे. तज्ज्ञांच्या मते, या श्रेणीत भारताला पुढील काळात 200 किंवा त्याहून अधिक विमानांची आवश्यकता भासू शकते.
करारानुसार पुढील दीड वर्षांत जवळपास 10 SJ-100 विमाने भारतात आणली जाऊ शकतात. पुढील तीन वर्षांत HAL आपल्या विद्यमान सुविधांमध्ये सेमी नॉक-डाउन (SKD) पद्धतीने सुपरजेट-100 विमाने तयार करण्यास सुरुवात करणार आहे. HAL ला विमान आणि त्याचे सुटे भाग तयार करण्याचा परवाना मिळेल, तर रशियन कंपनीकडून तांत्रिक मदत, डिझाइन सपोर्ट आणि प्रशिक्षण दिले जाईल.
SJ-100 मध्ये नवीन PD-8 स्वदेशी रशियन इंजिन, आधुनिक ग्लास कॉकपिट, जास्त इंधन कार्यक्षमता आणि प्रादेशिक उड्डाणांसाठी अनुकूल अशी रचना आहे. हे विमान आधीच रशियातील अनेक एअरलाइन्समध्ये सेवेत असून त्याचा ऑपरेशनल अनुभव सकारात्मक मानला जातो.
हा करार भारतासाठी अनेक अर्थांनी महत्त्वाचा आहे. एकीकडे UDAN सारख्या प्रादेशिक हवाई कनेक्टिव्हिटी योजनांना बळ मिळेल, तर दुसरीकडे ‘मेक इन इंडिया’ उपक्रमाला मोठी चालना मिळेल. नागरी विमान उत्पादन, मेंटेनन्स, रिपेअर आणि ओव्हरहॉल (MRO) इकोसिस्टम अधिक मजबूत होईल. तसेच भारत-रशिया नागरी विमानवाहतूक सहकार्याला नवी दिशा मिळेल.
Wings India 2026 मध्ये SJ-100 आणि SBJ-100 ची उपस्थिती हा केवळ शो-स्टॉपर क्षण न राहता, भविष्यात हे विमान प्रत्यक्षात भारतीय आकाशात उड्डाण करताना दिसते का, याकडे संपूर्ण विमानन क्षेत्राचे लक्ष लागले आहे. जर हे प्रकल्प यशस्वी झाले, तर भारत बिझनेस आणि रीजनल एव्हिएशनमध्ये आत्मनिर्भरतेकडे एक मोठे पाऊल टाकेल.
Follow us on our social media handles:
Instagram – https://www.instagram.com/newsdotz/
YouTube – https://www.youtube.com/@NewsDotz
Facebook – https://www.facebook.com/NewsDotz/
Twitter – https://x.com/NewsDotz
Also Read: Pune’s Latest Information
